સાબરમતીના છારાનગર-રબારીવાસમાં મકાનો ડૂબ્યા, 11 લોકો ધાબે ફસાયા

ધોધમાર વરસાદે અમદાવાદના નીચાણવાળા વિસ્તારોને પાણીમાં ગરકાવ કરી દીધા. સાબરમતી નદી કિનારે આવેલા છારાનગર-રબારીવાસમાં સ્થિતિ સૌથી વધુ વિકટ બની. રાતોરાત પાણીનું સ્તર વધતા મકાનો ડૂબવા લાગ્યા અને પરિવારો મજબૂરીવશ પોતાના ઘરના ધાબા પર આશરો લેવા મજબૂર બન્યા. પરંતુ સમયસર પહોંચેલી ફાયર બ્રિગેડની ટીમે આ જીવ પર આવી પડેલી આફતને મોટી દુર્ઘટનામાં ફેરવાતી અટકાવી.

જળબંબાકાર: મકાનોમાં ઘૂસ્યા પાણી, લોકો ફસાયા ધાબે 

અમદાવાદ શહેર અને આસપાસમાં પડેલા ભારે વરસાદને કારણે છારાનગર-રબારીવાસમાં પાણીનું સ્તર ભયજનક રીતે વધી ગયું. વિસ્તારમાં જળબંબાકારની સ્થિતિ સર્જાતા અનેક મકાનોમાં પાણી ફરી વળ્યા. પોતાનો જીવ બચાવવા માટે વૃદ્ધો સહિત 11 સ્થાનિક રહીશોએ પોતાના મકાનના ધાબા પર આશરો લેવો પડ્યો. નીચે પાણી જ પાણી હોવાથી તેઓ નીચે ઉતરી શકવાની સ્થિતિમાં ન હતા.

આ પણ વાંચો: ગંગોત્રી-યમનોત્રી હાઈવે સહિત ઓરછા બેન્ડથી સયાનાચટ્ટી સુધીના રસ્તા ભૂસ્ખલનથી બંધ, યાત્રાળુઓ અટવાયા

ફાયર બ્રિગેડની ત્વરિત કાર્યવાહીથી બચાવ્યો જીવ 

ઘટનાની જાણ કંટ્રોલ રૂમને થતાં જ અમદાવાદ ફાયર વિભાગની ટીમ ત્વરિત ઘટનાસ્થળે દોડી આવી. ભારે વરસાદ અને પાણીના પ્રવાહ વચ્ચે જવાનોએ સૂઝ-સમજ અને સાવચેતી સાથે રેસ્ક્યુ ઓપરેશન હાથ ધર્યું. ફાયર બ્રિગેડના જવાનોએ ધાબા પર ફસાયેલા તમામ 11 લોકોને સુરક્ષિત રીતે નીચે ઉતાર્યા.

રેસ્ક્યુ બાદ તમામ નાગરિકોને પ્રાથમિક સારવાર અને જરૂરી મદ પૂરી પાડવામાં આવી. ત્યારબાદ તેમને સલામત સ્થળે અને સગા-સંબંધીઓના ઘરે ખસેડવામાં આવ્યા. ફાયર વિભાગની સમયસૂચકતા અને સ્થાનિક તંત્રના ઝડપી પ્રતિસાદના કારણે આ ઘટનામાં મોટી જાનહાનિ ટળી હતી.