વરસાદનો એક રાઉન્ડ પૂરો થાય તે પહેલાં બીજાની તૈયારી, 7 જિલ્લામાં રેડ એલર્ટ

ગુજરાતવાસીઓને વરસાદથી હજુ રાહત મળે તેવા એંધાણ નથી. એક તરફ રાજ્યમાં હાલ વરસી રહેલો વરસાદી રાઉન્ડ સક્રિય છે, તો બીજી તરફ બંગાળની ખાડીમાં બીજું લો પ્રેશર સિસ્ટમ બનતા હવામાન વિભાગે ફરી એકવાર વરસાદી રાઉન્ડની આગાહી કરી છે. હાલ ગુજરાત-રાજસ્થાન સરહદે એક લો પ્રેશર, ચોમાસાની ધરી અને દક્ષિણ ગુજરાતમાં ઓફશોર ટ્રફ સક્રિય હોવાથી રાજ્યમાં ભારેથી અતિભારે વરસાદનો દોર યથાવત રહેવાનો છે.

સિઝનનો 52.5% વરસાદ, ડેમો છલકાયા 

આ સાર્વત્રિક વરસાદને કારણે રાજ્યમાં સિઝનનો કુલ વરસાદ સરેરાશના 50% થી વધુ નોંધાઈ ચૂક્યો છે. અત્યાર સુધીમાં રાજ્યમાં 20 ઇંચ એટલે કે 52.5% વરસાદ પડ્યો છે, જે ગત વર્ષે આ જ સમયગાળાના 51.6% કરતા વધુ છે.

પ્રદેશવાર આંકડા જોઈએ તો દક્ષિણ ગુજરાતમાં સૌથી વધુ 77%, મધ્ય ગુજરાત અને સૌરાષ્ટ્રમાં 44-44%, ઉત્તર ગુજરાતમાં 35% અને કચ્છમાં 19% વરસાદ નોંધાયો છે. સત વરસાદના કારણે રાજ્યના 207 જળાશયોમાં 69% પાણીનો સંગ્રહ થયો છે. નર્મદા ડેમ પણ 69% ભરાયો છે. રાજ્યના 25 ડેમ 100% ભરાઈ ગયા છે. સ્થિતિને જોતા 21 ડેમ હાઈ એલર્ટ, 4 ડેમ એલર્ટ અને 14 ડેમ વોર્નિંગ પર મૂકાયા છે.

આ પણ વાંચો: સાબરમતીના છારાનગર-રબારીવાસમાં મકાનો ડૂબ્યા, 11 લોકો ધાબે ફસાયા

સ્થળાંતર, રેસ્ક્યુ અને એલર્ટની વિગતો 

ભારે વરસાદ અને જળાશયોમાં પાણીની આવક વધતા વહીવટી તંત્ર સતર્ક બન્યું છે. અત્યાર સુધીમાં 40,675 લોકોનું સુરક્ષિત સ્થળાંતર કરવામાં આવ્યું છે અને 6,766 લોકોનું રેસ્ક્યુ કરાયું છે. વરસાદને કારણે રાજ્યના 648 માર્ગો બંધ છે. એસ.ટી.ની 485 રૂટની 2,065 ટ્રીપ પણ બંધ રાખવી પડી છે. ખેતીમાં 60% વાવેતર પૂર્ણ થયું છે.

આજે હવામાન વિભાગે મહેસાણા, સાબરકાંઠા, ગાંધીનગર, અરવલ્લી, ખેડા, મહિસાગર અને સુરેન્દ્રનગર માટે રેડ એલર્ટ જાહેર કર્યું છે. અહીં અત્યંત ભારે વરસાદની શક્યતા છે. બનાસકાંઠા, પાટણ, અમદાવાદ, આણંદ, પંચમહાલ, દાહોદ, વડોદરા, છોટાઉદેપુર, ભરૂચ, રાજકોટ, અમરેલી, ભાવનગર, મોરબી અને બોટાદમાં ઓરેન્જ એલર્ટ છે. દક્ષિણ ગુજરાતના નર્મદા, સુરત, તાપી, ડાંગ, નવસારી, વલસાડ, દમણ-દાદરા નગર હવેલી અને સૌરાષ્ટ્રના જામનગર, પોરબંદર, જૂનાગઢ, દ્વારકા, ગીર સોમનાથ, કચ્છમાં યલો એલર્ટ સાથે ભારે વરસાદની આગાહી છે.