ઈશાન કિશનની કપ્તાનીમાં સાઉથ ઝોનને હરાવી ઈસ્ટ ઝોને જીતી દુલિપ ટ્રોફી!

ઘરેલુ ક્રિકેટના સૌથી પ્રતિષ્ઠિત એવા દુલિપ ટ્રોફીના મુકાબલામાં ઈસ્ટ ઝોને અદ્ભુત રમતનું પ્રદર્શન કરીને ૧૩ વર્ષના લાંબા અંતરાળ બાદ ટાઇટલ પોતાના નામે કરી લીધું છે. યુવા અને ઊર્જાવાન વિકેટકીપર બેટ્સમેન ઈશાન કિશનની શાનદાર કપ્તાની હેઠળ ઈસ્ટ ઝોને ફાઈનલ મેચમાં સાઉથ ઝોન સામે પ્રથમ ઇનિંગની મજબૂત લીડના આધારે આ ઐતિહાસિક વિજય મેળવ્યો છે. ફાઇનલ મુકાબલો ભલે ડ્રોમાં સમાપ્ત થયો હોય, પરંતુ મેચ દરમિયાન ઈસ્ટ ઝોનના ખેલાડીઓએ દરેક ક્ષેત્રે સાઉથ ઝોન પર પોતાનું વર્ચસ્વ જમાવી રાખ્યું હતું.

372 રનની જંગી લીડ અને બીજી ઇનિંગનો સ્કોર

ફાઈનલ મેચના પાંચમા અને અંતિમ દિવસે મેચ ડ્રોમાં પરિણમી હતી, પરંતુ ઈસ્ટ ઝોને પોતાની પ્રથમ ઇનિંગમાં જ ૭૦૮ રનનો વિશાળ સ્કોર બનાવીને ૩૭૨ રનની જંગી લીડ પ્રાપ્ત કરી લીધી હતી. ત્યારબાદ મેચના અંતિમ દિવસે ઈસ્ટ ઝોને પોતાની બીજી ઇનિંગમાં ૭ વિકેટના નુકસાને ૩૮૮ રન બનાવ્યા હતા, જેના કારણે તેમની કુલ લીડ ૭૬૦ રન સુધી પહોંચી ગઈ હતી. આ ઇનિંગમાં મોહમ્મદ કૌનેન કુરેશીએ અણનમ ૧૧૬ રન બનાવીને પોતાની ફર્સ્ટ-ક્લાસ કારકિર્દીની પ્રથમ સદી ફટકારી હતી અને અનુકૂળ રોય (૬૪ રન) સાથે ૧૫૦ રનની અત્યંત મહત્ત્વપૂર્ણ ભાગીદારી નોંધાવી હતી.

આ પણ વાંચો: 1 કરોડ મહિલાઓને 1-1 લાખ રૂપિયા: યુપીની ચૂંટણી જીતવા યોગી સરકારનો માસ્ટરપ્લાન!

ઈશાન કિશનની બેવડી સદી અને મોહમ્મદ શમીની ઘાતક બોલિંગ

ઈસ્ટ ઝોનની આ ઐતિહાસિક જીતમાં કેપ્ટન ઈશાન કિશનની બેટિંગ અને નેતૃત્વ નિર્ણાયક સાબિત થયા. તેમણે પ્રથમ ઇનિંગમાં શાનદાર ૨૭૦ રનની વિરાટ ઇનિંગ રમીને રેડ-બોલ ક્રિકેટમાં પોતાના કમબેકનું શાનદાર એલાન કર્યું હતું. આ ઉપરાંત, પોતાની ૧૦૦મી ફર્સ્ટ-ક્લાસ મેચ રમી રહેલા અનુભવી ફાસ્ટ બોલર મોહમ્મદ શમીએ પોતાની બોલિંગથી વિરોધી ટીમ પર દબાણ બનાવ્યું હતું. ટીમ તરફથી કુમાર કુશાગ્રએ પોતાની છઠ્ઠી ફર્સ્ટ-ક્લાસ સદી ફટકારી હતી જ્યારે શિખર મોહને પણ અર્ધસદીનું યોગદાન આપ્યું હતું.

સાઉથ ઝોનની નબળી રણનીતિ અને કેપ્ટન ઈશાનનું નિવેદન

સાઉથ ઝોનના બોલરો આખી મેચ દરમિયાન દિશાહીન નજરે પડ્યા અને અનુભવી મોહમ્મદ સિરાજ સિવાય અન્ય કોઈ બોલર પ્રભાવ પાડી શક્યો નહીં. સાઉથ ઝોન મેનેજમેન્ટે કરુણ નાયર, મયંક અગ્રવાલ અને સાઈ કિશોર જેવા ફોર્મમાં ચાલતા ખેલાડીઓને પ્લેઇંગ ઇલેવનમાંથી બહાર રાખવાની ભૂલ પણ કરી હતી. ટ્રોફી જીત્યા બાદ કેપ્ટન ઈશાન કિશને પોતાની રણનીતિ વિશે જણાવ્યું હતું કે, પરિસ્થિતિને પારખીને પ્રથમ ઇનિંગમાં મજબૂત લીડ મેળવવાનો અમારો મુખ્ય હેતુ હતો, જેમાં ટીમ સફળ રહી.

૧૩ વર્ષ પછી દુલિપ ટ્રોફી જીતીને ઈસ્ટ ઝોને સાબિત કરી દીધું કે સાચું ટીમ વર્ક અને સચોટ રણનીતિ કોઈપણ મુકાબલાનું પાસું પલટી શકે છે. ઈશાન કિશનની શિસ્તબદ્ધ કપ્તાની, યુવા ખેલાડીઓની સદીઓ અને સિનિયર ખેલાડીઓનો અનુભવ આ જીતની મુખ્ય ચાવી બન્યા. આ વિજય આગામી ઘરેલુ અને આંતરરાષ્ટ્રીય ક્રિકેટ સિઝન માટે ઈસ્ટ ઝોનના ખેલાડીઓનોત્મવિશ્વાસ ચોક્કસપણે વધારશે.