નવસારીમાં 15 શ્રમિકોને એરલિફ્ટ કરાયા; રાજ્યભરમાંથી 38,000થી વધુ લોકોનું સ્થળાંતર

Fri, July 24 2026

સંકટ સમયની રાહત કામગીરી: દક્ષિણ ગુજરાત સહિત સમગ્ર રાજ્યમાં વરસી રહેલા અવિરત મુશળધાર વરસાદને કારણે સ્થિતિ અતિ ગંભીર બની છે. નવસારી અને વલસાડમાં જળબંબાકારની સ્થિતિ વચ્ચે ઇન્ડિયન કોસ્ટ ગાર્ડ, બુલડોઝર અને એરફોર્સની મદદથી યુદ્ધના ધોરણે બચાવ કામગીરી હાથ ધરવામાં આવી રહી છે.

નવસારીમાં 18 કલાકથી ફસાયેલા 15 મજૂરોનું એરલિફ્ટિંગ

નવસારી જિલ્લામાં સતત વરસાદથી નદીઓ અને તળાવો છલકાતાં અનેક વિસ્તારો જળમગ્ન થયા છે.

ગણદેવી તાલુકાના મેંધર ભાટ ગામે ઝીંગાના તળાવ પર કામ કરતા 15 મજૂરો છેલ્લા 18 કલાકથી પાણીના ભારે પ્રવાહ વચ્ચે ફસાયા હતા.

શ્રમિકોએ વિડિયો બનાવીને મદદ માટે અપીલ કર્યા બાદ ઇન્ડિયન કોસ્ટ ગાર્ડ (ICG) ની ટીમે તાત્કાલિક સ્થળ પર પહોંચી હેલિકોપ્ટરની મદદથી તમામ 15 લોકોને એરલિફ્ટ કરીને સુરક્ષિત સ્થળે ખસેડ્યા હતા.

કોસ્ટ ગાર્ડ દ્વારા બીલીમોરા, ગણદેવી તેમજ તાપી અને વલસાડના વિસ્તારોમાં એરિયલ સર્વે અને રાહત કામગીરી ચાલુ રાખવામાં આવી છે.

આ પણ વાંચો: રાધનપુરમાં 9 ઇંચ વરસાદથી જળબંબાકાર; 242 તાલુકામાં મેઘમહેર

હાલોલ-શામળાજી હાઈવે પર પાણી ભરાતાં ડિવાઈડર તોડવું પડ્યું

પંચમહાલના શહેરા વિસ્તારમાં રાત્રિ દરમિયાન 6 ઈંચથી વધુ વરસાદ ખાબકતા હાલોલ-શામળાજી હાઈવે પર જળબંબાકાર થયો હતો. વાહનવ્યવહાર પૂર્વવત કરવા અને ભરાયેલા વરસાદી પાણીનો ઝડપી નિકાલ કરવા માટે તંત્રને JCB (બુલડોઝર) ની મદદથી હાઈવેના ડિવાઈડર તોડવાની ફરજ પડી હતી.