પાંચ રાષ્ટ્રોના જાસૂસી સમૂહ “ફાઈવ આય”ની ગંભીર ચેતવણી

સાયબર સુરક્ષાનું ચિત્ર સંપૂર્ણ બદલાઈ જશે

*આગામી મહિનાઓમાં સાયબર હુમલાઓ વધુ ઝડપી અને ઘાતક બનશે

“આપોઅપ ખતરનાક કોડ તૈયાર, એક સાથે અનેક નેટવર્ક પર હુમલાનું જોખમ

કૃત્રિમ બુદ્ધિમત્તા (AI) ટેક્નોલોજી માનવજાત માટે અનેક નવી તકો ઊભી કરી રહી છે, પરંતુ તેની સાથે નવા જોખમો પણ વધી રહ્યા છે. અમેરિકા, બ્રિટન, કેનેડા, ઓસ્ટ્રેલિયા અને ન્યૂઝીલેન્ડના ગુપ્તચર દેખરેખ સંગઠનોના સમૂહ “ફાઈવ આય”એ ચેતવણી આપી છે કે આગામી થોડા મહિનાઓમાં AI સાયબર સુરક્ષાની દુનિયાને સંપૂર્ણપણે બદલી શકે છે. AIના કારણે સાયબર હુમલાઓ વધુ ઝડપી, વધુ વ્યાપક અને વધુ ઘાતક બની શકે છે.

ફાઈવ આય ઇન્ટેલિજન્સ ઓવરસાઇટ એન્ડ રિવ્યૂ કાઉન્સિલ (FIORC) દ્વારા જાહેર કરાયેલા સંયુક્ત નિવેદનમાં જણાવાયું છે કે અત્યાધુનિક AI મોડેલ્સ હાલની ધારણાઓ કરતાં વધુ ઝડપથી વિકસિત થઈ રહ્યા છે. આ ટેક્નોલોજી સાયબર સુરક્ષા ક્ષેત્રમાં રક્ષણાત્મક ક્ષમતાઓ વધારશે, પરંતુ સાથે જ હેકરોને પણ અગાઉ કરતાં વધુ શક્તિશાળી બનાવશે.

નિષ્ણાતોના જણાવ્યા મુજબ અત્યાર સુધી કોઈ કમ્પ્યુટર સિસ્ટમમાં ખામી શોધવામાં અને તેનો દુરુપયોગ કરવામાં દિવસો કે અઠવાડિયા લાગી જતા હતા. હવે AIની મદદથી આવી ખામીઓ મિનિટો કે કલાકોમાં શોધી શકાય છે. એટલું જ નહીં, હુમલાખોરો આપોઆપ ખતરનાક કોડ તૈયાર કરી શકે છે અને એકસાથે અનેક નેટવર્ક પર હુમલો કરી શકે છે.

ફાઈવ આયના જણાવ્યા અનુસાર AIના કારણે કોઈ ખામી શોધાય અને તેનો દુરુપયોગ થાય તે વચ્ચેનો સમયગાળો સતત ઘટી રહ્યો છે. પરિણામે બેંકિંગ, નાણાકીય વ્યવહારો, સરકારી ડેટા, આરોગ્ય સેવાઓ અને કોર્પોરેટ નેટવર્ક્સ પરના જોખમોમાં વધારો થઈ શકે છે.

આ પણ વાંચો: કતાર ગેસ પ્લાન્ટ વિસ્ફોટમાં માર્યા ગયેલા 13 લોકોમાંથી 12 ભારતીય

નિવેદનમાં સ્પષ્ટ જણાવાયું છે કે સાયબર સુરક્ષાને હવે માત્ર IT વિભાગની જવાબદારી તરીકે જોવાનો સમય વીતી ગયો છે. કંપનીઓના બોર્ડ, મુખ્ય કાર્યકારી અધિકારીઓ (CEO) અને વરિષ્ઠ મેનેજમેન્ટે પણ તેને વ્યૂહાત્મક અને વ્યવસાયિક જોખમ તરીકે જોવું પડશે. કાગળ પરની નીતિઓ પૂરતી નથી, પરંતુ વાસ્તવિક હુમલા સમયે કાર્યક્ષમ રહે તેવી સુરક્ષા વ્યવસ્થાઓ ઊભી કરવી જરૂરી છે.

કાંટા સામે કાંટો:AI સામે AIની જ સુરક્ષા વ્યવસ્થા મજબૂત બનાવવા અનુરોધ

જોકે આ ટેક્નોલોજીનું બીજું પાસું પણ છે. AI માત્ર હુમલાખોરો માટે જ નહીં પરંતુ સુરક્ષા એજન્સીઓ માટે પણ અસરકારક હથિયાર બની શકે છે. AI આધારિત સિસ્ટમો શંકાસ્પદ પ્રવૃત્તિઓ ઝડપથી શોધી શકે છે, સંભવિત હુમલાઓ અંગે અગાઉથી ચેતવણી આપી શકે છે અને સુરક્ષા ટીમોને ઝડપી પ્રતિસાદ આપવામાં મદદરૂપ બની શકે છે. ફાઈવ આયએ સરકારો, ઉદ્યોગો અને ખાનગી કંપનીઓને AI સામે AIનો ઉપયોગ કરીને સાયબર સુરક્ષા મજબૂત બનાવવા અનુરોધ કર્યો છે. નિવેદન અનુસાર સાયબર જોખમો અંગેની જૂની ધારણાઓ હવે વર્ષોમાં નહીં પરંતુ મહિનાઓમાં જૂની પડી શકે છે. તેથી સમયસર તૈયારી જ સૌથી મોટું રક્ષણ બની શકે છે.

AIથી સામાન્ય લોકોને શું જોખમ?

* ઓનલાઈન બેંકિંગ અને UPI ફ્રોડ વધુ સ્માર્ટ બની શકે

* ફિશિંગ ઈમેલ અને મેસેજ વધુ વિશ્વસનીય દેખાઈ શકે

* ડીપફેક વીડિયો અને નકલી અવાજથી છેતરપિંડી વધી શકે

* વ્યક્તિગત માહિતી ચોરીના બનાવોમાં વધારો થઈ શકે

* સોશિયલ મીડિયા પર નકલી માહિતી અને ભ્રામક પ્રચાર વધુ અસરકારક બની શકે

“ફાઈવ આય”:શું છે?

ફાઈવ આય (Five Eyes) વિશ્વના પાંચ અંગ્રેજીભાષી દેશોનું ગુપ્તચર સહયોગ મંચ છે. તેમાં અમેરિકા, બ્રિટન, કેનેડા, ઓસ્ટ્રેલિયા અને ન્યૂઝીલેન્ડનો સમાવેશ થાય છે. આ દેશો આતંકવાદ, સાયબર સુરક્ષા, જાસૂસી અને વૈશ્વિક સુરક્ષા સંબંધિત માહિતીની આપ-લે કરે છે. વિશ્વના સૌથી શક્તિશાળી ગુપ્તચર સહયોગી સમૂહોમાં તેની ગણના થાય છે.