1 જુલાઈથી 6 મહિના સુધી આધાર ધારકો માટે આ સુવિધા બિલકુલ ફ્રી
આજના ડિજિટલ યુગમાં આધાર કાર્ડ વગર એક પણ સરકારી કામ શક્ય નથી. પણ જો તમારા આધાર સાથે ઈમેલ લિંક ન હોય તો મહત્વની સૂચનાઓ મિસ થઈ શકે છે. આ સમસ્યાને ધ્યાનમાં રાખીને UIDAI એ આધાર ધારકોને મોટી ભેટ આપી છે. હવે 1 જુલાઈ 2026થી 31 ડિસેમ્બર 2026 સુધી તમે આધારમાં ઈમેલ આઈડી અપડેટ કરાવી શકશો એકદમ મફતમાં. જેના માટે અત્યાર સુધી ₹75 ચાર્જ લેવાતો હતો.
યુનિક આઈડેન્ટિફિકેશન ઓથોરિટી ઓફ ઈન્ડિયા – UIDAI એ આધાર સેવાઓને વધુ સરળ બનાવવા માટે મોટી જાહેરાત કરી છે. UIDAIના નવા નિયમ મુજબ, 1 જુલાઈ 2026થી 31 ડિસેમ્બર 2026 સુધી એટલે કે આગામી 6 મહિના સુધી આધાર કાર્ડમાં ઈમેલ આઈડી અપડેટ કે ચેન્જ કરવાની સુવિધા સંપૂર્ણપણે મફત રહેશે.
માત્ર મોબાઈલ એપ દ્વારા જ મળશે ફાયદો
આ મફત સુવિધાનો લાભ લેવા માટે એક શરત છે. સામાન્ય રીતે આધાર સેવા કેન્દ્ર કે ssc.updaar.gov.in પર ઈમેલ અપડેટ માટે GST સાથે ₹75 ફી ચૂકવવી પડે છે. પરંતુ આ 6 મહિના સુધી જો તમે ફક્ત ‘આધાર મોબાઈલ એપ’ દ્વારા જ ઈમેલ અપડેટ કરશો તો કોઈ ચાર્જ નહીં લાગે. જો તમે સેન્ટર પર જઈને કે બીજા માધ્યમથી અપડેટ કરાવશો તો નિયત ₹75 ફી આપવી પડશે.
આ પણ વાંચો: અમદાવાદમાં 149મી રથયાત્રા માટે ભગવાન જગન્નાથના ભવ્ય શણગારની તડામાર તૈયારી
આધાર સાથે ઈમેલ લિંક કેમ જરૂરી?
આધાર સાથે મોબાઈલ નંબરની જેમ ઈમેલ લિંક હોવું પણ ખૂબ ફાયદાકારક છે:
1. ત્વરિત સૂચનાઓ: આધારમાં કોઈ ફેરફાર, ડાઉનલોડ કે KYC થાય તો તરત ઈમેલ પર અલર્ટ મળી જાય છે.
2. સુરક્ષા: જો કોઈ તમારા આધારનો દુરુપયોગ કરવાનો પ્રયાસ કરે તો શંકાસ્પદ પ્રવૃત્તિનું મેસેજ તરત ઈમેલ પર આવે છે.
3. સરળ રિકવરી: ભવિષ્યમાં આધાર નંબર કે એનરોલમેન્ટ આઈડી ભૂલી જાવ તો ઈમેલ દ્વારા ઓનલાઈન જ ફરી મેળવી શકાય છે.
ઘરે બેઠા 2 મિનિટમાં વેરિફાય કરો
તમારો ઈમેલ પહેલાથી લિંક છે કે નહીં તે ચેક કરવા UIDAIની વેબસાઈટ પર જાઓ. ‘My Aadhaar’ > ‘Verify Email/Mobile Number’ > ‘Verify Email Address’ પર ક્લિક કરો. આધાર નંબર, ઈમેલ અને કેપ્ચા નાખી OTP સબમિટ કરતાં જ ‘Aadhaar Authentication Successful’ મેસેજ મળી જશે.
UIDAIની આ પહેલથી કરોડો લોકો ₹75 બચાવીને પોતાનો આધાર વધુ સુરક્ષિત બનાવી શકશે. જો તમારો ઈમેલ હજુ લિંક નથી તો 1 જુલાઈની રાહ જુઓ અને મોબાઈલ એપ દ્વારા ફ્રીમાં અપડેટ કરાવી લો.
