માર્કેટિંગ યાર્ડ પાસે લોખંડનો ડેલો માથે પડતાં 6 વર્ષના બાળકનું મોત
બાળક ડેલા પાસે રમી રહ્યો હતો ત્યારે ડેલાને ધક્કો મારતા તેની માથે પડ્યો
શાહેરમાં બેડી ગામમાં રહેતાં અને સફાઇ કામ કરી ગુજરાન ચલાવતાં નેપાળી દંપતિનો છ વર્ષનો પુત્ર સાંજે લોખંડના ડેલા પાસે રમતો હતો ત્યારે ડેલાને ધક્કો મારવા જતાં ડેલો માથે પડતાં તેનું કરૂણ મોત થયું હતું.જેથી લાડકવાયાના મોતથી પરિવારમાં ગમગીની પ્રસરી જવા પામી છે.
માહિતી મુજબ મુળ નેપાળના અને અઢી ત્રણ વર્ષથી બેડી ગામે હોસ્ટેલ નજીક રહેતાં તેમજ સફાઇ કામ કરી ગુજરાન ચલાવતાં નરેન્દ્ર બહાદુર અને સિતા બહાદુરનો નાનો દિકરો વિકાસ (ઉ.વ.૬) હોસ્ટેલ નજીક લોખંડના ડેલા પાસે રમતો હતો. તે સમયે બાળકે ડેલાને ધક્કો મારવા જતાં તેની માથે પડતાં તે દબાઇ ગયો હતો. ચીસ સાંભળી તેના માતા પિતા સહિતના લોકો દોડી આવ્યા હતાં. અને વિકાસને ગંભીર ઇજા થતાં તેને લોહીલુહાણ હાલતમાં પ્રથમ ખાનગી હોસ્પિટલમાં અને ત્યાંથી સિવિલ હોસ્પિટલમાં ખસેડાયો હતો. પરંતુ અહિ તબિબે મૃત જાહેર કરતાં પરિવારજનોમાં કલ્પાંત સર્જાયો હતો. હોસ્પિટલ ચોકીના રામશીભાઇ વરૂ, કેતનભાઇ નિકોલા, ધર્મેન્દ્રભાઇ હુદડ,તોફિકભાઇ જુણાચે કુવાડવા રોડ પોલીસને જાણ કરતાં હેડકોન્સ. અજયભાઇ નિમાવતે જરૂરી કાર્યવાહી કરી હતી. મૃત્યુ પામનાર વિકાસ બે ભાઇ અને એક બહેનમાં નાનો હતો.હાલ બનાવથી પરિવારમાં અરેરાટી મચી જવા પામી છે.
