રોયલ ચેલેન્જર્સ બેંગ્લુરુ સૌથી કિંમતી ટીમ: બ્રાન્ડ વેલ્યુ 2979 કરોડને પાર
રોયલ ચેલેન્જર્સ બેંગ્લુરુ આઈપીએલની પહેલી એવી ટીમ બની ગઈ છે જેની બ્રાન્ડ વેલ્યુ ૩૦૦ મિલિયન ડોલર મતલબ કે અંદાજે ૨૯૭૯ કરોડ રૂપિયાને પાર પહોંચી જવા પામી છે. બીજી બાજુ આઈપીએલની કુલ આવક ૨૦ બિલિયન ડોલર એટલે કે ૧.૯૬ લાખ કરોડ રૂપિયાને પાર પહોંચી છે. આના પરથી સ્પષ્ટ થાય છે કે વિશ્વની સૌથી અમીર ક્રિકેટ લીગ હવે માત્ર બે મહિના ચાલનારી ટૂર્નામેન્ટ નહીંપરંતુ આખું વર્ષ કમાણી કરાવનારો એક વૈશ્વિક બિઝનેસ બની ચૂક્યો છે. આઈપીએલનો કુલ બિઝનેસ પાછલા વર્ષના મુકાબલે ૧૧.૪% વધીને ૨૦.૬ બિલિયન ડોલરે પહોંચ્યો છે. એકલા આઈપીએલની બ્રાન્ડ વેલ્યુ ૧૦.૩%થી વધીને ૪.૩ બિલિયન ડોલર એટલે કે અંદાજે ૪૧૦૦૦ કરોડ રૂપિયા પર પહોંચી ગઈ છે.
આરસીબી આઈપીએલની સતત કિંમતી ટીમ બની રહી છે. તેની બ્રાન્ડ વેલ્યુ પાછલા વર્ષના મુકાબલે ૧૬% વધીને અંદાજે ૨૯૭૯ કરોડ રૂપિયા થઈ છે. તે ૩૦૦ મિલિયન ડોલરનો આંકડો પાર કરનારી પહેલી આઈપીએલ ટીમ પણ બની છે. આરસીબી ટીમના માલિકી હક્કને રેકોર્ડ ૧.૭૮ બિલિયન ડોલર એટલે કે ૧૭,૦૦૦ કરોડ રૂપિયામાં ખરીદવામાં આવ્યા હતા. આ ઉપરાંત રાજસ્થાન રોયલ્સને ૧૫૭૫૦ કરોડ રૂપિયામાં ખરીદવામાં આવી હતી.
આ પણ વાંચો: ગુજરાતમાં ચાલુ ખરીફ સિઝનમાં 70% એટલે કે 59.26 લાખ હેક્ટરમાં વાવેતર સંપન્ન
આરસીબીની અસલી તાકાત તેના ચાહક, સોશિયલ મીડિયા પર તેની જબરદસ્ત ફેન ફોલોઈંગ અને મજબૂત બિઝનેસ મોડલ છે. લીગની અન્ય ટીમની બ્રાન્ડ વેલ્યુમાં પણ ખાસ્સો વધારો થયો છે. સનરાઈઝર્સ હૈદરાબાદ ૧૬૮ મિલિયન ડોલર (અંદાજે ૧૬૦૪ કરોડ રૂપિયા) સાથે પાંચમા ક્રમે આવી ગઈ છે. આ પછી રાજસ્થાન રોયલ્સ ૧૬૧ મિલિયન ડોલર (અંદાજે ૧૫૩૭ કરોડ રૂપિયા), પંજાબ કિંગ્સ ૧૫૮ મિલિયન ડોલર (અંદાજે ૧૫૦૮ કરોડ રૂપિયા), ગુજરાત ટાઈટન્સ ૧૫૭ મિલિયન ડોલર (અંદાજે ૧૪૯૯ કરોડ રૂપિયા), દિલ્હી કેપિટલ્સ ૧૫૬ મિલિયન ડોલર (અંદાજે ૧૪૮૯ કરોડ રૂપિયા) અને લખનૌ સુપર જાયન્ટસ ૧૨૨ મિલિયન ડોલર (અંદાજે ૧૧૬૪ કરોડ રૂપિયા) છે.
ટીવી કરતા મોબાઈલ-સ્માર્ટ ટીવી પર વધી ગયો આઈપીએલનો ક્રેઝ
દર્શકોની મેચ જોવાની રીત પણ હવે સંપૂર્ણ બદલાઈ ચૂકી છે. જિઓસ્ટાર પ્રમાણે ૨૦૨૬ની સીઝનને કુલ ૧૦૬ કરોડ સ્ક્રીન્સ પર જોવામાં આવી હતી. સ્માર્ટ ટીવી ઉપર મેચ જોનારા લોકોની સંખ્યામાં ૨૬%નો જબરદસ્ત વધારો થયો છે જ્યારે જૂના સાધારણ ટીવી ઉપર વ્યૂઅરશિપ ૧૮.૮% ઘટી જવા પામી છે. માત્ર ઓપનિંગ વિકેન્ડમાં જ ૫૧.૫ કરોડ દર્શકોએ મેચ જોઈ હતી. ગત સીજનમાં આઈપીએલની કુલ કમાણી ૧૭૧૮૦ કરોડ રૂપિયાને પાર થઈ હતી.
