Ghosting, Breadcrumbing… પ્રેમની દરેક મૂંઝવણ માટે નવું નામ, મજેદાર છે Gen-Zની ડેટિંગ ડિક્શનરી!
આજના જમાનામાં ગામડાના કે શહેરના જુવાનીયાઓની વાતો સાંભળીએ તો આપણને નવાઈ લાગે. તે લોકો કહે છે “મારું તો ઘોસ્ટિંગ થઈ ગયું”, “એ તો મને બેન્ચિંગ કરે છે”, “અમારી તો સિચ્યુએશનશિપ હતી.” આપણને થાય કે આ શું બોલે છે? પણ ડરવા જેવું નથી. આ બધા શબ્દોનો અર્થ બહુ સીધો છે. આપણા વખતમાં જે થતું હતું, એને જ આજના છોકરાઓએ નવા નામ આપ્યા છે. ચાલો માંડીને વાત કરીએ, એકદમ ધીમે-ધીમે અને ચોખ્ખી ગુજરાતી ભાષામાં.
પહેલા વાત કરીએ ટોકિંગ સ્ટેજની
ગામમાં કોઈ છોકરાને કોઈ છોકરી ગમે. બંનેના નંબરની આપ-લે થાય. પછી રોજ વાતો શરૂ. સવારે ઉઠતા જ “ગુડ મોર્નિંગ”, રાત્રે સુતી વખતે “ગુડ નાઈટ”. વચ્ચે દિવસમાં કેટલીય વાર ફોન. એકબીજાને ગીતો મોકલે, ફોટા મોકલે, હસી-મજાક કરે. બંનેના મનમાં થાય કે સામેવાળું ગમે છે.
પણ હજુ સુધી કોઈએ એમ નથી કહ્યું કે “તું મારી ગર્લફ્રેન્ડ છે” કે “તું મારો બોયફ્રેન્ડ છે.” મા-બાપ પૂછે તો કહે “અમે તો બસ દોસ્ત છીએ, વાતો કરીએ છીએ.” આ જે વચ્ચેનો સમય છે ને, જ્યારે વાતો તો પાક્કી પણ સંબંધ કાચો, એને આજના છોકરા ટોકિંગ સ્ટેજ કહે છે. એટલે કે માત્ર વાતચીત કરવાનો તબક્કો. આમાં કોઈ જવાબદારી નહીં, કોઈ વચન નહીં. બસ એકબીજાને પારખવાનો સમય. ઘણીવાર આ ટોકિંગ સ્ટેજમાંથી જ આગળ વાત વધે છે, અને ઘણીવાર અહીં જ પૂરી થઈ જાય છે.
હવે સમજો સિચ્યુએશનશિપ એટલે શું ??
ધારો કે ટોકિંગ સ્ટેજ લાંબુ ચાલ્યું. હવે બંને જણા બધે સાથે દેખાય છે. મેળામાં સાથે જાય, હોટલમાં સાથે ચા પીએ, એકબીજાના ઘરની બધી ખબર રાખે. તકલીફ પડે તો દોડીને આવે. ગામ લોકો પણ કહેવા માંડે કે “આ બંનેનું તો નક્કી જ છે.” પણ જ્યારે છોકરી હિંમત કરીને પૂછે કે “આપણે હવે શું કરવાનું ?? તારા ઘરે વાત કરીશ ??”, ત્યારે છોકરો કહે “અત્યારે ઉતાવળ ન કર, જોઈએ, સમય આવ્યે વિચારીશું.” એટલે કે તેને તમારી સાથે ફરવું ગમે છે, તમારો સાથ ગમે છે, પણ તમને પોતાની બનાવીને જવાબદારી લેવી નથી.
આવા અધૂરા સંબંધને સિચ્યુએશનશિપ કહેવામાં આવે છે. એટલે પરિસ્થિતિ જેવો સંબંધ. નામ વગરનો સંબંધ. આમાં એક જણું ઘણીવાર સાચા દિલથી પ્રેમ કરતું હોય છે, જ્યારે બીજું જણું માત્ર મજા માટે સાથે હોય છે. એટલે આમાં દુઃખ પણ બહુ થાય છે.
બ્રેડક્રમ્બિંગ એટલે એક પ્રકારની બીજાની લાગણી સાથે રમત
આ તો બહુ લોકો સાથે થાય છે. તમે કોઈને સાચા દિલથી ચાહો છો. સામેવાળું તમને સાવ છોડી દેતું નથી. અઠવાડિયામાં એકાદ વાર મેસેજ કરશે “શું કરે છે ?? તારી બહુ યાદ આવે છે.” તમે રાજી થઈ જાઓ. તમને થાય કે ચાલો, તેને પણ મારી પડી છે. તમે તરત જવાબ આપો.
પણ પછી પાછા તે ગાયબ. તમે ફોન કરો તો ઉપાડે નહીં. ચાર દિવસ પછી પાછો તમારા ઇન્સ્ટાગ્રામના ફોટા પર લાઈક આવશે. બસ, આમ થોડું-થોડું ધ્યાન આપીને તમને આશામાં ને આશામાં રાખવા. જેમ આપણે કૂતરાને રોટલીનો ટુકડો બતાવીને પાછળ-પાછળ ફેરવીએ, એમ તમને પ્રેમના નાના-નાના ટુકડા બતાવીને પાછળ ફેરવવા. તેને તમારી સાથે ઘર માંડવું નથી, બસ તમે તેને ભૂલી ન જાઓ એટલે આ નાટક કરે છે. આ ખરાબ ટેવને બ્રેડક્રમ્બિંગ કહે છે.
ઘોસ્ટિંગ એટલે ભૂતની જેમ ગાયબ થઈ જવું
આ શબ્દ આજકાલ બહુ સાંભળવા મળે છે. વિચાર કરો, તમારી કોઈ સાથે રોજ વાત થાય છે. તમે બંને એકબીજાને મળો છો, સપના જુઓ છો. નાની-મોટી રિસામણા-મનામણા પણ થાય છે. અને એક સવારે તમે ઉઠો તો સામેવાળાનો કોઈ પત્તો જ નહીં. તમે ફોન કરો, ફોન બંધ આવે. મેસેજ કરો, વાદળી ટીક તો થાય પણ જવાબ ન આવે. સોશિયલ મીડિયામાં બ્લોક કરી દીધા હોય. ગામમાં સામે મળે તો આંખ ચોરાવીને જતો રહે. તમને એ પણ ન કહે કે તેણે તમને કેમ છોડ્યા? તમારો વાંક શું હતો ??
જેમ ભૂત દેખાતા-દેખાતા અદ્રશ્ય થઈ જાય, એમ આ માણસ તમારી જિંદગીમાંથી અદ્રશ્ય થઈ જાય. પાછળ તમે મહિનાઓ સુધી રડતા રહો, વિચારતા રહો. આ બહુ જ દુઃખદાયી વર્તન છે, અને તેને ઘોસ્ટિંગ કહેવાય છે. ફોનના જમાનામાં આ કરવું સહેલું થઈ ગયું છે, એટલે આ બહુ વધી ગયું છે.
બેન્ચિંગ એટલે અધવચ્ચે લટકતી તલવાર જેવુ
આપણે શેરી ક્રિકેટ રમતા હોઈએ ત્યારે વધારાના છોકરાઓને બાંકડા પર બેસાડી રાખીએ છીએ, ખરું ને ?? જરૂર પડે ત્યારે જ બોલાવીએ. બસ, પ્રેમમાં પણ આવું થાય છે, તેને બેન્ચિંગ કહે છે. સામેવાળી વ્યક્તિ તમને ચોખ્ખી ના નથી પાડતી. તે એમ નથી કહેતી કે “મને તું નથી ગમતી, મારો પીછો છોડ.” તે તમને એમ પણ નથી કહેતી કે “હા, તું જ મારી છે.” તે તમને વચ્ચે રાખે છે. તે બીજા બે-ત્રણ છોકરા કે છોકરીઓ સાથે પણ વાતો ચાલુ રાખે છે. તે જુએ છે કે ક્યાં સારો સોદો મળે છે.
જો તેને તમારા કરતાં કોઈ સારું, પૈસાદાર કે દેખાવડું મળી જાય, તો તે તમારો ફોન ઉપાડવાનું બંધ કરી દેશે. અને જો બધેથી ના સંભળાય, તો તમારી પાસે પાછો આવશે અને કહેશે “તારા જેવું કોઈ નહીં.” એટલે તમે તેની પહેલી પસંદ નથી, તમે તો તેનો બીજો વિકલ્પ છો, બેકઅપ છો. તમને સાચવી રાખવાની આ રીતને બેન્ચિંગ કહે છે.
લવ બોમ્બિંગ એટલે શરૂઆતમાં ખોટો ઉભરો બતાવવો
ભાઈ, આનાથી તો ખાસ ચેતજો. આમાં સામેવાળો શરૂઆતમાં તમને આકાશે ચડાવી દે. પહેલા જ અઠવાડિયામાં મોંઘી ગિફ્ટો આપશે, રોજ તમારા રૂપના વખાણ કરશે, કહેશે “તારા વગર હું જીવી નહીં શકું, તું તો મારા સપનાની રાણી છો કે રાજા છો.” તમને એમ થાય કે વાહ, આનાથી સારો જીવનસાથી કોણ હોઈ શકે ?? પણ આ બધો દેખાડો હોય છે. તેનો અસલી ઈરાદો તમને પોતાના વશમાં કરવાનો હોય છે. એકવાર તમે તેની મીઠી-મીઠી વાતોમાં આવી જાઓ, તેના વગર રહી ન શકો, પછી તે પોતાનો અસલી રંગ બતાવે. પછી તે કહેશે “આ નહીં પહેરવાનું, તારા મિત્રો સાથે નહીં ફરવાનું, મને પૂછ્યા વગર બહાર નહીં જવાનું વગેરે જેવી વાતો તમને કહેશે અને પછી.. તે તમારા પર પોતાનો હુકમ ચલાવવા માંડશે. શરૂમાં જે પ્રેમનો વરસાદ કર્યો હતો, એ તો તમને ફસાવવાની જાળ હતી. આ જાળને લવ બોમ્બિંગ કહે છે.
જુઓ, સાચી વાત એ છે કે આ બધું પહેલાના જમાનામાં પણ થતું હતું. આપણામાંથી કોને એવો અનુભવ નથી થયો કે કોઈએ વાતો કરીને અધવચ્ચે છોડી દીધા ?? કોઈએ આશા આપીને રાહ જોવડાવી ?? ફરક માત્ર એટલો છે કે આપણે મનમાં ને મનમાં સહન કરતા હતા, આપણી પાસે તેને કહેવા માટે શબ્દો નહોતા. આજના છોકરાઓ હોશિયાર છે. તેમણે દરેક દુઃખને, દરેક મુંઝવણને એક નામ આપી દીધું છે. એટલે હવે કોઈ છોકરી તરત કહી શકે છે કે “એ તો મારું ઘોસ્ટિંગ કરી ગયો”, એટલે બધા સમજી જાય છે કે તેની સાથે શું થયું. આ નામોને કારણે લોકો જલ્દી સાવધાન થઈ જાય છે અને ખોટા સંબંધમાંથી બહાર નીકળી શકે છે.
