ટ્રમ્પે હુમલા અટકાવ્યા, વિશ્વભરના સ્ટોક માર્કેટમાં તેજી,સેન્સેક્સની મોટી છલાંગ

વાટાઘાટો ઉચ્ચ સ્તરે પહોંચતાં નિર્ધારિત હુમલા રદ : વિશ્વને હાશકારો,અર્થતંત્રની ગાડી પાટે ચડવાની આશા

ઈરાન – અમેરિકા વચ્ચેના યુદ્ધમાં મહત્વપૂર્ણ વણાંક આવ્યો છે.છેલ્લા બે દિવસથી થતાં સામસામાં હુમલાઓ અને ઈરાન ઉપર હુમલા વધી તીવ્ર બનાવવાની અગાઉ ટ્રમ્પે આપેલી ચેતવણી વચ્ચે સમાધાનનો માર્ગ મોકળો થવાની આશા બળવતર બની છે.ખુદ ટ્રમ્પે શાંતિ સમજૂતી હાથવગી હોવાનો દાવો કરી પૂર્વનિર્ધારિત હુમલાઓ રદ કર્યાની જાહેરાત કરતા સમગ્ર વિશ્વએ હાશકારો અનુભવ્યો છે. ટ્રમ્પની આ ઘોષણાને પગલે વિશ્વભરના સ્ટોક માર્કેટમાં તેજીનો પવન ફૂંકાયો હતો.ભારતનું શેર બજાર પણ ચેતનવંતુ બન્યું હોય તેમ સેન્સેક્સમાં 1695 અને નિફ્ટીમાં 461 પોઇન્ટનો વધારો નોંધાયો હતો.

ઈરાન સામે કડક કાર્યવાહી અને ભારે હુમલાની ચેતવણી આપ્યાના થોડા જ કલાકોમાં અમેરિકી પ્રમુખ ડોનાલ્ડ ટ્રમ્પે યુ-ટર્ન લઈ, ઈરાન સાથેની વાટાઘાટો નોંધપાત્ર રીતે આગળ વધી રહી હોવાની અને નિર્ધારિત હવાઈ હુમલા તથા બોમ્બમારો રદ કરવામાં આવ્યો હોવાની જાહેરાત કરી હતી. ટ્રમ્પે દાવો કર્યો કે અમેરિકા સહિત અનેક પ્રાદેશિક દેશોની સહમતિથી કરારના માળખા અને મહત્વના મુદ્દાઓ પર સમજૂતી બની ગઈ છે. કરાર પર હસ્તાક્ષર માટેનો સમય અને સ્થળ ટૂંક સમયમાં જાહેર કરવામાં આવશે. ટ્રમ્પની આ જાહેરાત બાદ મધ્યપૂર્વમાં વધતા તણાવ વચ્ચે રાજદ્વારી ઉકેલની આશા વધુ મજબૂત બની છે, જોકે અંતિમ કરાર અંગેની સત્તાવાર પ્રક્રિયા હજુ બાકી છે.

આ પણ વાંચો: અમેરિકાએ જ ભારતને રશિયા પાસેથી ઓઇલ ખરીદવા કહ્યું હતું : જયશંકર

શેરબજારમાં સઘળું ગ્રીન ગ્રીન રોકાણકારોના જીવમાં જીવ આવ્યો

આ જાહેરાત બાદ વિશ્વભરના સ્ટોક માર્કેટમાં તેજીનો ચમકારો દેખાયો હતો.US માર્કેટ્સમાં S&P 500 1.75%, Dow Jonesમાં 1.86% અને  Nasdaqમાં 2.54%નો નોંધપાત્ર ઉછાળો આવ્યો હતો .Wall Street પર મોટી તેજી જોવા મળી હતી.એશિયન માર્કેટ્સમાં પણ મોટાભાગના સૂચકાંકો મજબૂત ફાયદા સાથે ખુલ્યા હતા.

ભારતીય શેરબજારમાં પણ જીવમાં જીવ આવ્યો છે.

સેન્સેક્સ 1695ના ઉછાળા સાથે 75527 પર અને નિફ્ટી 461 પોઇન્ટના વધારા સાથે 23622 પોઇન્ટ પર બંધ રહ્યા હતા.રિયલ્ટી, ઓટો, બેન્કિંગ સહિત મોટાભાગના સેક્ટર્સ ગ્રીનમાં રહ્યા હતા. ઈરાન-યુએસ તણાવ ઘટવાથી જીઓપોલિટિકલ રિસ્ક ઓછું  થવાની અને થયું, તેલની સપ્લાય વિક્ષેપનો ભય ઓછો થતાં અને રોકાણકારો રિસ્ક-ઓન મોડમાં આવ્યા હોય તેવું ચિત્ર ઉપસ્યું છે.

ક્રૂડ 90 ડોલરથી નીચે સરક્યું

આ જાહેરાત બાદ વૈશ્વિક તેલબજારમાં રાહત જોવા મળી હતી. બ્રેન્ટ ક્રૂડનો ભાવ ઘટીને પ્રતિ બેરલ 90 ડોલરથી નીચે 89.37 ડોલર પર પહોંચ્યો હતો, જ્યારે ડબ્લ્યુટીઆઈ ક્રૂડ 86.85 ડોલર પ્રતિ બેરલની સપાટીએ ટ્રેડ થતું હતું. તણાવમાં ઘટાડાની શક્યતાને કારણે બજારમાં વેચવાલીનું દબાણ વધ્યું હોવાનું માનવામાં આવે છે.