દુબઈ ઇન્ટરનેશનલ એરપોર્ટ નજીક ઈરાનના બે ડ્રોન ખાબક્યા: ચાર લોકો થયા ઘાયલ, ઇજાગ્રસ્તોમાં એક ભારતીય કર્મચારી

દુબઈ આંતરરાષ્ટ્રીય એરપોર્ટ (DXB) નજીક બુધવારે સવારે બે ડ્રોન ખાબકતાં ચાર લોકો ઇજાગ્રસ્ત થયા હોવાનું દુબઈ સત્તાવાળાઓએ જણાવ્યું છે. ઇજાગ્રસ્તોમાં બે ઘાનાના નાગરિકો, એક બાંગ્લાદેશી અને એક ભારતીયનો સમાવેશ થાય છે. તેમાં ભારતીય નાગરિકને મધ્યમ ઇજા પહોંચી છે, જ્યારે અન્ય ત્રણને સામાન્ય ઇજાઓ થઈ હોવાનું જણાવાયું છે. આ ઘટના છતાં એર ટ્રાફિક સામાન્ય રીતે ચાલુ રહ્યો હતો.

જો કે ફ્લાઈટસના સમયપત્રકમાં ફેરફાર થઈ રહ્યો હોવાથી મુસાફરોને તેમની ફ્લાઇટ અંગે એરલાઇન તરફથી પુષ્ટિ ન મળે ત્યાં એરપોર્ટ તરફ ન આવવાની સૂચના આપવામાં આવી છે.અત્રે યાદ કરવું જરૂરી છે કે આ પહેલા 1 માર્ચે DXBના એક કોનકોર્સ વિસ્તારમાં પણ નાની ક્ષતિ થવાની ઘટના બની હતી, જેને તાત્કાલિક કાબૂમાં લઈ લેવાઈ હતી.

આ પણ વાંચો: 5 વર્ષમાં 2 વન-ડે, 2 ટી-20 વર્લ્ડકપ, એક ચેમ્પિયન્સ ટ્રોફી, 3 WTC ફાઈનલ રમાશે: ભારતને પણ મળશે વર્લ્ડકપ-ચેમ્પિયન્સ ટ્રોફીનું યજમાનપદ

એરપોર્ટના અગાઉના નિવેદન મુજબ તે ઘટનામાં ચાર સ્ટાફ સભ્યો ઇજાગ્રસ્ત થયા હતા અને તેમને તાત્કાલિક સારવાર આપવામાં આવી હતી.સત્તાવાળાઓએ જણાવ્યું હતું કે આગોતરા સુરક્ષા યોજનાઓ અમલમાં હોવાથી મોટાભાગના ટર્મિનલમાંથી મુસાફરોને અગાઉથી ખાલી કરાવી દેવામાં આવ્યા હતા, જેના કારણે મોટી દુર્ઘટના ટળી હતી.

શું સુપ્રીમ લીડર મોજતબા ઘાયલ છે?

મધ્ય પૂર્વમાં યુદ્ધ ચાલુ છે. ઇઝરાયલ અને ઈરાન સતત એકબીજા પર હુમલો કરી રહ્યા છે. ઈરાનના નવા સુપ્રીમ લીડર, મોજતબા ખામેનીને લડાઈ દરમિયાન ઈજા થઈ છે. ઈરાનના રાષ્ટ્રપતિના પુત્ર, યુસુફ પેઝેશ્કિઆને આ વાતની પુષ્ટિ કરી છે. ખામેનીના સ્વાસ્થ્ય અને ઠેકાણા અંગે ચાલી રહેલી અટકળો વચ્ચે આ નિવેદન આવ્યું છે.

પેઝેશ્કિઆને વધુમાં જણાવ્યું હતું કે તેમની ઇજાઓ છતાં, નવા સુપ્રીમ લીડર, જે યુએસ-ઇઝરાયલી હુમલામાં તેમના પિતા અલી ખામેનીના મૃત્યુ પછી તેમના સ્થાને આવ્યા હતા, “સલામત અને સ્વસ્થ” છે.

તેમની ટેલિગ્રામ ચેનલ પર પોસ્ટ કરતા, પેઝેશ્કિઆને કહ્યું, “મેં સમાચાર સાંભળ્યા કે શ્રી મોજતબા ખામેનીને ઈજા થઈ છે. મેં તેમના કેટલાક મિત્રોને પૂછ્યું જેમના તેમના સાથે સંબંધ હતા. તેઓએ મને કહ્યું કે, ભગવાનનો આભાર, તેઓ સુરક્ષિત અને સ્વસ્થ છે.”

ન્યૂ યોર્ક ટાઈમ્સ અનુસાર, ખામેનીને ઈરાન પર યુએસ અને ઇઝરાયલી હુમલાના પહેલા દિવસે જ ઈજા થઈ હતી.