ભાજપના સભ્યો દ્વારા સંસદ પરિસરમાં ધર્મેન્દ્ર પ્રધાન ઝિંદાબાદના જોશીલા નારા

ટોપી અને શાલ ઓઢાડી ઉમંગભેર સ્વાગત: પોતે સ્ટ્રીટ ફાઈટર હોવાનો કોંગ્રેસને જવાબ

નીટ પેપર લીક મામલે થયેલા ઐતિહાસિક આંદોલન બાદ

કેન્દ્રીય શિક્ષણ મંત્રીના પદેથી રાજીનામું આપવા મજબૂર બનેલા ધર્મેન્દ્ર પ્રધાન સોમવારે સંસદમાં આવ્યા ત્યારે સંસદ પરિસરમાં ભાજપના અન્ય સાંસદો દ્વારા તેમનું જોશભેર સ્વાગત કરવામાં આવ્યું હતું.તેમના રાજીનામાને પરાજય નહીં, પરંતુ રાજકીય જવાબદારી, બલિદાન અને રાષ્ટ્રહિતના પ્રતીક તરીકે રજૂ કરવાનો ભાજપ પ્રયાસ કરી રહ્યું હોય તેવું ચિત્ર ઉપસ્યું છે.

સોમવારે સંસદ ભવન ખાતે પહોંચેલા ધર્મેન્દ્ર પ્રધાન કારમાંથી ઉતરતાં જ ભાજપ અને એનડીએના સાંસદોએ “ધર્મેન્દ્ર પ્રધાન ઝિંદાબાદ”ના નારાઓ સાથે તેમનું ઉષ્માભર્યું સ્વાગત કર્યું હતું. અનેક સાંસદો તેમની આસપાસ એકત્ર થયા હતા. એક સાંસદે તેમને પરંપરાગત ટોપી પહેરાવી હતી તો અન્ય એક સાંસદે શાલ ઓઢાડી સન્માન કર્યું હતું.

આ પણ વાંચો: કાર અને બાઈકનો થર્ડ પાર્ટી ઇન્સ્યોરન્સ મોંઘો થવાના એંધાણ

આ દરમિયાન કોંગ્રેસના વરિષ્ઠ સાંસદ જયરામ રમેશે પ્રધાનને “આવું તો થતું રહે છે” એવી ટિપ્પણી કરી હતી. તેના જવાબમાં ધર્મેન્દ્ર પ્રધાને કહ્યું હતું કે, “કંઈ થયું જ નથી. હું સ્ટ્રીટ ફાઈટર છું, એસી રૂમમાં બેસીને રાજકારણ કરતો કાર્યકર નથી.” તેમના આ જવાબને ભાજપના સાંસદોએ તાળીઓ અને નારાઓથી વધાવી લીધો હતો.

ભાજપમાં મોટું પ્રદાન

ધર્મેન્દ્ર પ્રધાન માત્ર ઓડિશાના જ નહીં પરંતુ ભાજપના રાષ્ટ્રીય સ્તરના સૌથી અસરકારક સંગઠનકારોમાં ગણાય છે. બિહાર વિધાનસભા ચૂંટણીમાં તેઓ પાર્ટીના પ્રભારી રહ્યા હતા. પશ્ચિમ બંગાળની ભવાનીપુર બેઠક પર મમતા બેનર્જી સામે સુવેન્દુ અધિકારીની રાજકીય લડત મજબૂત બનાવવા તેમની મહત્વની ભૂમિકા રહી હતી. 2024ની લોકસભા ચૂંટણી બાદ હરિયાણામાં ભાજપના વિજયમાં પણ તેમણે મહત્વપૂર્ણ યોગદાન આપ્યું હતું. ઉત્તર પ્રદેશ, મધ્ય પ્રદેશ, ઉત્તરાખંડ અને કર્ણાટક સહિત અનેક રાજ્યોમાં ચૂંટણી પ્રભારી તરીકે તેઓ સફળ વ્યૂહરચનાકાર રહ્યા છે.

ઓડિશાના રાજકારણમાં દબદબો

57 વર્ષીય ધર્મેન્દ્ર પ્રધાન ઓડિશા ભાજપના સૌથી પ્રભાવશાળી નેતાઓમાંના એક માનવામાં આવે છે. 2014 પછી રાજ્યમાં ભાજપના સંગઠનના વિસ્તરણથી લઈને 2024ની વિધાનસભા ચૂંટણીમાં મળેલી ઐતિહાસિક સફળતા સુધી તેમની ભૂમિકા નિર્ણાયક રહી છે. રાજ્યના 78 ભાજપ ધારાસભ્યોમાંથી મોટા ભાગના અને ઓડિશા સરકારના આશરે 40 ટકા મંત્રીઓ તેમની નજીકના માનવામાં આવે છે.