દેશ વિરોધી પ્રવૃત્તિ કરતાં મૌલાનાને ફંડ આપતા બે શખસોની ધરપકડ

ભાવનગરના બન્ને વિધર્મીને નાણા ક્યાંથી આવતા હતા, પોલીસે શરૂ કરી તપાસ

ભાવનગર નજીક સીદસર (શામપર) ગામે હાઉસિંગ બોર્ડના ક્વાર્ટરમાં ગેરકાયદેસર મદ્રેસા ચલાવી દેશવિરોધી પ્રવૃત્તિકરતાં મૌલાનાની પોલીસે ધરપકડ કરી ૧૦ દિવસના રિમાન્ડ પર મેળવ્યા બાદ મૌલાનાની આકરી પૂછપરછમાં તેને દેશ વિરોધી પ્રવૃત્તિ કરવા માટે ભંડોળ પુરૂ પાડતા વધુ બે વિધર્મીના નામ ખૂલતા મોડીરાતે પોલીસે તેમની પણ ધરપકડ કરી અત્યાર સુધી મૌલાનાને કેટલું ફન્ડિંગ પુરૂ પાડ્યું અને આ નાણાં ક્યાંથી આવ્યા તે બાબતે સઘન પૂછપરછ હાથ ધરવામાં આવી છે.

આ અંગેની જાણવા મળતી વિગતો મુજબ ભાવનગર નજીક વરતેજ પોલીસ સ્ટેશનની હદમાં આવેલ સીદસર (શામપર) ગામે આવેલ ૨૫ વારિયા હાઉસિંગ બોર્ડના ક્વાર્ટરમાં છેલ્લા ઘણા સમયથી દેશ વિરોધી ભેદી પ્રવૃત્તિ ચાલતી હોવાની માહિતી પરથી પોલીસે સ્પેશિયલ સેલની રચના કરી છાપો માર્યો હતો જેમાં ગેરકાયદેસર મદ્રેસા ચલાવતા બનાસકાંઠાના બાદરગઢ ગામના મૌલાના મોહંમદ શરીફ અબ્બાસ મરેડિયા (ઉ.વ.૨૬) મળી આવતા તેના વિરૂધ્ધ દેશ વિરૂધ્ધ પ્રવૃત્તિ કરી બાળકોના માનસમાં દેશ વિરૂધ્ધ ઝેર ભરવામાં આવતું હતું. એટલું જ નહીં મૌલાનાએ હાઉસિંગ બોર્ડનો ગેરકાયદેસર કબજો મેળવ્યો હતો અને તેની પાસેથી ધાર્મિક વૈમનસ્ય ફેલાવે તેવા પુસ્તકો તેમજ ધાર્મિક લાગણીને ઠેસ પહોંચાડે તેવા સાહિત્ય અને ઉશ્કેરણીજનક લખાણો મળી આવ્યા હતા.

દેશ વિરોધી ભેદી પ્રવૃત્તિ કરતાં મૌલાનાને મોડીસાંજે રિમાન્ડની માંગણી સાથે કોર્ટમાં રજૂ કરતાં અદાલતે ૧૦ દિવસના રિમાન્ડ પર સોંપવા હુકમ કર્યો છે.

બીજી બાજુ મૌલાનાની એસઓજીએ સઘન પૂછપરછ કરી દેશ વિરોધી પ્રવૃત્તિ કરવા માટે ભંડોળ ક્યાંથી આવતું હતું તે બાબતે પૂછપરછ કરતાં ભાવનગરના યુસુફ આરીફ મારફાળી (ઉ.વ.૨૬) અને અનસભાઈ મોહંમદસીદીક લાખાણી (ઉ.વ.૨૪) નાણાકીય ફંડ પુરૂ પાડતા હોવાનું ખૂલતા પોલીસે બન્ને આરોપીઓની પણ ધરપકડ કરી છે.

પકડાયેલા બન્ને આરોપીને દેશ વિરૂધ્ધ ભેદી પ્રવૃત્તિ કરવા અને કટ્ટરપંથી તૈયાર કરવા માટે ક્યાંથી નાણાં આવતા હતા તે જાણવા સઘન પૂછપરછ કરી બન્ને આરોપીઓને રિમાન્ડ સાથે કોર્ટમાં રજૂ કરવાની કાર્યવાહી હાથ ધરી છે.