કોર્ટ કાર્યવાહીના લાઇવ-સ્ટ્રીમ રેકોર્ડિંગ પોસ્ટ કરવા, શેર કરવા, એડિટિંગ કરવા અથવા મુદ્રીકરણ કરવા પર પ્રતિબંધ

નવી દિલ્હી: અદાલતની કોઈ પણ કાર્યવાહીનો વિડીયો કે ઓડિયો કોર્ટની મંજુરી વગર સોશિયલ મીડિયા કે પછી કોઈ પણ ડિજીટલ મીડિયા ઉપર પોસ્ટ, શેર કે અપલોડ નહી કરી શકાય. સુપ્રીમ કોર્ટે આ એક મોટો ચુકાદો આપ્યો છે. સુપ્રીમ કોર્ટે સ્પષ્ટ કર્યું છે કે રેકોર્ડિંગનું સંપાદન અથવા મુદ્રીકરણ પણ પ્રતિબંધિત રહેશે.

ચીફ જસ્ટિસ સૂર્યકાંતની આગેવાની હેઠળની બેન્ચે જણાવ્યું હતું કે સુપ્રીમ કોર્ટ અથવા કોઈપણ હાઇકોર્ટના લાઇવ-સ્ટ્રીમ રેકોર્ડિંગનો ઉપયોગ કરતા પહેલા, સંબંધિત કોર્ટની પરવાનગી જરૂરી રહેશે. સુપ્રીમ કોર્ટના રેકોર્ડિંગ માટે, સેક્રેટરી જનરલની પરવાનગી જરૂરી રહેશે, અને હાઇકોર્ટના રેકોર્ડિંગ માટે, સંબંધિત હાઇકોર્ટના રજિસ્ટ્રાર જનરલની પરવાનગી જરૂરી રહેશે. કોર્ટે જણાવ્યું હતું કે પરવાનગી વિના સોશિયલ મીડિયા, યુટ્યુબ અથવા અન્ય કોઈપણ ડિજિટલ પ્લેટફોર્મ પર રેકોર્ડિંગ અપલોડ કરવા, શેર કરવા અથવા ફરીથી પોસ્ટ કરવાને નિયમોનું ઉલ્લંઘન ગણવામાં આવશે.

આ પણ વાંચો: દિલ્હી યુનિ. અને જેએનયુના વિદ્યાર્થીઓને જંતર મંતર ન જવા સૂચના, કડક પગલાની ગર્ભિત ધમકી

સુપ્રીમ કોર્ટે તેના આદેશમાં જણાવ્યું હતું કે પરવાનગી વિના કોર્ટ કાર્યવાહીના અલગ ભાગને એડિટ કરીને  શેર કરવા, વિડિઓ અથવા ઑડિઓમાં ફેરફાર કરવા અથવા તેને અલગ સંદર્ભમાં રજૂ કરવાની મંજૂરી આપવામાં આવશે નહીં. વધુમાં, કોર્ટ રેકોર્ડિંગનું કોઈપણ મુદ્રીકરણ પણ પ્રતિબંધિત રહેશે. કોર્ટે જણાવ્યું હતું કે અપૂર્ણ અથવા બદલાયેલા વિડિઓઝ લોકોમાં મૂંઝવણ પેદા કરી શકે છે અને ન્યાયિક પ્રક્રિયાની નિષ્પક્ષતા અને ગરિમા સાથે ચેડા કરી શકે છે. તેથી, રેકોર્ડિંગ્સના અનધિકૃત ઉપયોગને અટકાવવા જરૂરી છે.

સુપ્રીમ કોર્ટે સ્પષ્ટતા કરી હતી કે આ આદેશ ફક્ત કોર્ટના ઑડિઓ અને વિડિયો રેકોર્ડિંગના અનધિકૃત ઉપયોગ પર લાગુ પડે છે. મીડિયા સંસ્થાઓ પહેલાની જેમ કોર્ટ કાર્યવાહી સંબંધિત સમાચારનું રિપોર્ટિંગ કરી શકશે. કોર્ટે સુપ્રીમ કોર્ટના સેક્રેટરી જનરલ અને તમામ હાઇકોર્ટના રજિસ્ટ્રાર જનરલોને આ આદેશને તેમની સત્તાવાર વેબસાઇટ પર જાહેર કરવાનો નિર્દેશ આપ્યો હતો જેથી દરેકને માહિતી મળી શકે.

સોશિયલ મીડિયા અને અન્ય ડિજિટલ પ્લેટફોર્મ પર કોર્ટ કાર્યવાહીના વીડિયોના અનધિકૃત પ્રસારણ અને મુદ્રીકરણ પર પ્રતિબંધ મૂકવાની માંગ કરતી અરજીની સુનાવણી દરમિયાન આ આદેશ આપવામાં આવ્યો હતો. સુપ્રીમ કોર્ટે આ મામલે કેન્દ્ર સરકાર અને તમામ રાજ્ય સરકારોને નોટિસ ફટકારી છે, જેમાં તેમના જવાબો માંગ્યા છે. કોર્ટે સરકારોને પૂછ્યું છે કે કોર્ટ રેકોર્ડિંગના અનધિકૃત ઉપયોગને રોકવા માટે શું પગલાં લઈ શકાય. આ નિર્ણયને ન્યાયિક પ્રક્રિયાની ગરિમા જાળવવા અને કોર્ટ કાર્યવાહીના દુરુપયોગને રોકવા તરફ એક મહત્વપૂર્ણ પગલું માનવામાં આવે છે.