દારૂબંધી માત્ર કાગળ પર? સાણંદ પોલીસે હાઇ પ્રોફાઇલ દારૂ અને હુક્કા પાર્ટી પર દરોડા પાડ્યા: 81 લોકોની અટકાયત, 2.91 કરોડનો મુદ્દામાલ જપ્ત
ગાંધીના ગુજરાતમાં દારૂબંધી માત્ર કાગળ પર જ રહી ગઈ છે એવા અનેક કિસ્સાઓ સામે આવતા હોય છે ત્યારે આજે સાણંદમાં પોલીસ દ્વારા મોટી કાર્યવાહી કરવામાં આવી છે . સાણંદ પોલીસે બુધવારે રાત્રે સાણંદ-નલસરોવર રોડ પર સ્થિત નિર્વાણ ગ્રીન્સ નામના વીકેન્ડ હોમમાં હાઇ-પ્રોફાઇલ દારૂ અને હુક્કા પાર્ટી પર દરોડો પાડ્યો હતો, જેમાં 43 પુરુષો અને 38 મહિલાઓ સહિત 81 લોકોની અટકાયત કરવામાં આવી હતી.
આદર્શ અગ્રવાલના 25મા લગ્ન જયંતિની ઉજવણી માટે આ પાર્ટીનું આયોજન કરવામાં આવ્યું હતું જેમાં મોટી સંખ્યામાં મહેમાનો હાજર રહ્યા હતા, જેમાં અમદાવાદના બિલ્ડરો, વેપારીઓ અને ડોકટરો પણ સામેલ હતા. ત્યારે પોલીસ દ્વારા દારૂ અને હુક્કાની મહેફિલ માણતા 81 લોકોની અટકાયત કરવામાં આવતા ખળભળાટ મચી જવા પામ્યો છે. આ દરોડાના વિડીયો પણ સામે આવ્યા છે જેમાં જોઈ શકાય છે કે પોલીસની બસમાંથી મહિલાઓ અને પુરુષોને પોલીસ સ્ટેશન લઈ જવામાં આવી રહ્યા છે.
20થી વધુ લક્ઝરી વાહનો જપ્ત
પોલીસના જણાવ્યા અનુસાર, ખાનગી સ્થળે 11 ટેબલ પર કેક, હુક્કા અને દારૂ ગોઠવવામાં આવ્યો હતો. ગુપ્ત માહિતીના આધારે, અધિકારીઓએ મોડી રાત્રે દરોડો પાડ્યો હતો જેમાં દારૂ, હુક્કાનો સામાન અને BMW અને Audi કાર સહિત 20 થી વધુ લક્ઝરી વાહનો જપ્ત કરવામાં આવ્યા હતા. જપ્ત કરાયેલી વસ્તુઓની કુલ કિંમત આશરે ₹2.91 કરોડ હોવાનો અંદાજ છે.
આ પણ વાંચો :ફાઇટ ટુ ફિનિશ: આજે વડોદરામાં WPL ગ્રાન્ડ ફાઇનલમાં બે મિત્રો વચ્ચે મુકાબલો, RCB અને દિલ્હી કેપિટલ્સ વચ્ચે રમાશે મેચ
તમામ અટકાયતીઓને સાણંદ પોલીસ સ્ટેશન લઈ જવામાં આવ્યા હતા અને બાદમાં તબીબી તપાસ માટે સરકારી હોસ્પિટલમાં ખસેડવામાં આવ્યા હતા. અટકાયતીઓની તબીબી તપાસ ચાલુ છે, સાથે સાથે બેકગ્રાઉન્ડની ચકાસણી પણ કરવામાં આવી રહી છે. મોટાભાગના આરોપીઓ 40 વર્ષથી ઓછી ઉંમરના હોવાનું કહેવાય છે. પોલીસે જણાવ્યું હતું કે આ કાર્યવાહી સાણંદ વિસ્તારમાં ખાનગી દારૂ-હુક્કા પાર્ટીઓના વધતા જતા કિસ્સાઓને ઉજાગર કરે છે અને આવા ઉલ્લંઘનો પ્રત્યે શૂન્ય-સહિષ્ણુતાનો અભિગમ અપનાવે છે. આ કેસમાં વધુ તપાસ ચાલુ છે.
