મહાપાલિકા ૪૬૪.૩૯ કરોડના ખર્ચે બનાવશે ૩,૧૭૦ આવાસ

બજેટમાં પ્રથમ વખત થઈ જોગવાઇ: બિલ્ડરને અપાશે પ્લોટ

ટેન્ડર પ્રક્રિયા બાદ જેટલી રકમનો ખર્ચ મંજૂર થશે તેટલી રકમનો રહેણાક અથવા કોમર્શિયલ
હેતુનો પ્લોટ અપાશે જેથી મહાપાલિકાને આવાસ યોજના નિર્માણનો કોઈ ખર્ચ નહીં આવે

મહાપાલિકાના ૨૦૨૬-૨૭ના ડ્રાફ્ટ બજેટમાં લોકોને ઘરનું ઘર મળી રહે તે માટે આવાસ યોજના હેઠળ કરાતા ફ્લેટની ફાળવણીને વધુ સુદૃઢ બનાવવા તેમજ યોજના બનાવ્યા બાદ મહાપાલિકાની તિજોરી ઉપર કોઈ ભારણ ન આવે તે માટે મહત્ત્વપૂર્ણ જાહેરાત કરવામાં આવી હતી. હવેથી મહાપાલિકા દ્વારા આવાસ યોજના બનાવી આપનાર બિલ્ડરને પ્લોટ આપવાનું નક્કી કરવામાં આવ્યું છે. આમ ઘરના ઘરનું સ્વપ્ન જોતાં અસંખ્યો પૈકીના ૩૧૭૦ નસીબવંતા લોકોને આવાસ મળી જશે અને બદલામાં મહાપાલિકાના કિંમતી પ્લોટ મળવાને કારણે આવાસ યોજના બનાવનાર એજન્સીઓ વચ્ચે હરિફાઈ પણ જોવા મળશે.
મ્યુનિસિપલ કમિશનર તુષાર સુમેરાએ જણાવ્યું કે મહાપાલિકા દ્વારા આવાસ યોજનાના નિર્માણ ખર્ચને પહોંચી વળવા માટે બી.ઓ.ટી. (બિલ્ડ ઓપરેટ ટ્રાન્સફર) ધોરણે ટેન્ડર પ્રક્રિયા કરવાનું આયોજન કરવામાં આવશે. આ માટે મહાપાલિકા દ્વારા ટેન્ડર પ્રક્રિયા કરી મંજૂર થયેલ પ્રોજેક્ટ માટે બાંધકામની સામે મહાપાલિકા હસ્તકના રહેણાક હેતુ તેમજ કોમર્શિયલ હેતુના પ્લોટ બિલ્ડરને આપવામાં આવશે જેથી મહાપાલિકા ઉપર કોઈ આર્થિક ભારણ આવશે નહીં. આ ઉપરાંત ૨૦૨૫-૨૬ દરમિયાન ૧૧૯૦.૫ કરોડના ખર્ચે અલગ-અલગ કુલ સાત આવાસ યોજનામાં ૧૦૧૦ આવાસ નિર્માણનું કામ હાથ પર લેવામાં આવ્યું હતું જે ફેબ્રુઆરીના અંત સુધીમાં પૂર્ણ થઈ જશે. આ તમામ આવાસ યોજનાઓમાં ગ્રીન બિલ્ડિંગ કોન્સેપ્ટને આધારિત આયોજન કરવામાં આવ્યું હતું. ઘરમાં આરામદાયક વાતાવરણ જળવાઈ રહે તે માટે બહારની બાજુએ પોલાણવાળી દિવાલની સુવિધા, કોમન લાઈટિંગ માટે એલઈડી બલ્બનો ઉપયોગ, વરસાદી પાણી વેડફાઈ ન જાય તે માટે વોટર હાર્વેસ્ટિંગ સિસ્ટમ, આવાસના ચણતર માટે એએસી બ્લોક્સનો ઉપયોગ સહિતની સુવિધા આપવામાં આવી છે. ૨૦૨૬-૨૭ના વર્ષમાં અલગ-અલગ વિસ્તારોમાં ૩૧૭૦ આવાસનું નિર્માણ કરવામાં આવશે જેના પાછળ ૪૬૪.૩૯ કરોડથી વધુનો ખર્ચ થવાનો અંદાજ છે. જ્યારે એક વર્ષમાં કુલ ૧૭ આવાસ યોજનાના ખાલી રહેલા ૮૯૨ ક્વાર્ટરની ડ્રો મારફતે ફાળવણી કરવામાં આવી હોવાનું જાહેર કરવામાં આવ્યું હતું. જ્યારે પ્રધાનમંત્રી આવાસ યોજના હેઠલ ઝુપડપટ્ટીમાં રહેતા લોકોને વિનામૂલ્યે આવાસ આપવા માટે હિંગળાજનગર-૨માં ૩૩૭ આવાસ બની રહ્યા છે જેનું કામ હાલ ચાલી રહ્યું છે.

ફેબ્રુઆરીના અંતમાં ૧૦૧૦ મળી કુલ ૪૫૧૭ આવાસ નિર્માણ કરવાની બજેટમાં જાહેરાત: એક વર્ષમાં ૧૭ આવાસયોજનાના ૮૯૨ ફ્લેટની ફાળવણી કરાઈ