“PM મોદી સાથે અઘટિત ઘટના બની શકે તેવો ભય હતો, મેં તેમને ગૃહમાં હાજરી ન આપવા વિનંતી કરી,” લોકસભામાં ઓમ બિરલાનું નિવેદન

પ્રધાનમંત્રી નરેન્દ્ર મોદી 4 ફેબ્રુઆરીના રોજ સાંજે 5 વાગ્યે લોકસભામાં આભાર પ્રસ્તાવ પરની ચર્ચાનો જવાબ આપવાના હતા. હોબાળાને કારણે, આ શક્ય બન્યું નહીં, અને પ્રધાનમંત્રીના પ્રતિભાવ વિના ધ્વનિ મત દ્વારા આભાર પ્રસ્તાવ પસાર કરવામાં આવ્યો. આભાર પ્રસ્તાવ પસાર થયા પછી, સ્પીકર ઓમ બિરલાએ જણાવ્યું કે PM મોદી સાથે લોકસભામાં કંઈક અઘટિત થવાની શક્યતા હતી તેથી મે જ તેમણે પ્રધાનમંત્રીને 4 ફેબ્રુઆરીએ ગૃહમાં હાજર ન રહેવા વિનંતી કરી હતી.

સાંસદોને સંયમ રાખવા અને શિષ્ટાચારનું પાલન કરવા અપીલ

લોકસભાના અધ્યક્ષ ઓમ બિરલાએ બુધવારે બજેટ સત્ર દરમિયાન ગૃહની પરિસ્થિતિ પર આકરી ટિપ્પણી કરી હતી. તેમણે કહ્યું હતું કે જો તે દિવસે કોઈ અનિચ્છનીય ઘટના બની હોત, તો તે ખૂબ જ દુર્ભાગ્યપૂર્ણ હોત અને દેશના લોકશાહી માળખાને નુકસાન પહોંચાડ્યું હોત. અધ્યક્ષ ઓમ બિરલાએ સ્પષ્ટપણે જણાવ્યું હતું કે સંસદ લોકશાહીનું સૌથી પવિત્ર મંચ છે, અને આવું વર્તન માત્ર અસ્વીકાર્ય જ નથી પણ રાષ્ટ્રની ગરિમાને પણ નુકસાન પહોંચાડે છે. તેમણે તમામ સાંસદોને સંયમ રાખવા અને સંસદીય શિષ્ટાચારનું પાલન કરવાની અપીલ કરી હતી.

આ પણ વાંચો :જો ચાઇનીઝ દોરીથી મૃત્યુ થશે તો હ*ત્યાનો કેસ થશે દાખલ: CM યોગીએ પોલીસને રાજ્યભરમાં દરોડા પાડવાનો આદેશ આપ્યો

વડાપ્રધાનને ગૃહમાં હાજરી ન આપવા વિનંતી કરી

અધ્યક્ષ ઓમ બિરલાએ એ પણ ખુલાસો કર્યો હતો કે જ્યારે વડા પ્રધાન રાષ્ટ્રપતિના અભિભાષણ પર આભાર પ્રસ્તાવ દરમિયાન જવાબ આપવાના હતા, ત્યારે તેમને નક્કર માહિતી મળી હતી કે કેટલાક કોંગ્રેસ સભ્યો અણધાર્યા પગલાં લઈ શકે છે. અધ્યક્ષે સમજાવ્યું હતું કે, સંભવિત પરિસ્થિતિની અપેક્ષા રાખીને અને કોઈપણ અનિચ્છનીય ઘટનાને રોકવા માટે, તેમણે વ્યક્તિગત રીતે વડા પ્રધાનને ગૃહમાં હાજરી ન આપવા વિનંતી કરી હતી. તેમણે જણાવ્યું હતું કે આ નિર્ણય ફક્ત સાવચેતીના પગલા તરીકે લેવામાં આવ્યો હતો, જેથી પરિસ્થિતિ વધુ વણસે તે પહેલાં તેને નિયંત્રિત કરી શકાય. તેમણે એમ કહીને સમાપન કર્યું કે સંસદ ફક્ત ચર્ચા માટેનું મંચ નથી, પરંતુ લોકશાહીનો આત્મા છે, અને તેની ગરિમા જાળવવી એ બધા સભ્યોની સામૂહિક જવાબદારી છે.

હોબાળાને કારણે લોકસભા મુલતવી

સતત સૂત્રોચ્ચાર અને વિક્ષેપને કારણે, લોકસભાની કાર્યવાહી બપોરે 3 વાગ્યા સુધી સ્થગિત કરવી પડી. ગૃહમાં વ્યવસ્થા જાળવવાના તમામ પ્રયાસો છતાં, પરિસ્થિતિ કાબુમાં આવી શકી નહીં.

પીએમના નિવેદન વિના આભાર પ્રસ્તાવ પસાર

વિપક્ષ દ્વારા હોબાળા અને સૂત્રોચ્ચાર વચ્ચે રાષ્ટ્રપતિના ભાષણ પર આભાર પ્રસ્તાવ લોકસભામાં પસાર કરવામાં આવ્યો. નોંધનીય છે કે, વડા પ્રધાન નરેન્દ્ર મોદીએ આ સમય દરમિયાન રિવાજ મુજબ પોતાનું ભાષણ આપ્યું ન હતું. 2004 પછી આ પહેલી વાર છે જ્યારે સંસદમાં વડાપ્રધાનના ભાષણ વિના આભાર પ્રસ્તાવ પસાર કરવામાં આવ્યો હતો. આ પ્રસ્તાવ ધ્વનિ મતથી પસાર થયો. લોકસભા અધ્યક્ષ ઓમ બિરલાએ આભાર પ્રસ્તાવમાં વિપક્ષના

સુધારાઓને મતદાન માટે મૂક્યા, જે ફગાવી દેવામાં આવ્યા. ત્યારબાદ સ્પીકરે 28 જાન્યુઆરીએ આપેલા રાષ્ટ્રપતિના ભાષણ પર આભાર પ્રસ્તાવ વાંચી સંભળાવ્યો, જે ધ્વનિ મતથી પસાર થયો. આ દરમિયાન, વિપક્ષે હંગામો ચાલુ રાખ્યો.