RMCની તવાઈ: વાસી ખોરાક પીરસતી 2 હોટલ સીલ: 84,400નો દંડ
પેટની સાથે છેડછાડ નહીં! રાજકોટ મહાનગરપાલિકાના આરોગ્ય વિભાગના ફૂડ સેફ્ટી સ્કવોડે ગંદકી અને ભેળસેળ સામે સર્જિકલ સ્ટ્રાઈક કરી છે. સર્વેલન્સ ચેકિંગ દરમિયાન વાસી-અખાદ્ય ખોરાક સ્ટોર કરતી અને હાઈજીનના ધજાગરા ઉડાડતી હોટલો પર તવાઈ બોલાવી દેવામાં આવી. એક જ દિવસમાં 2 રેસ્ટોરન્ટ સીલ, 385 કિલોથી વધુ ખરાબ ખોરાકનો નાશ અને લાખો રૂપિયાનો દંડ – RMCની આ કાર્યવાહીએ ફૂડ વેપારીઓમાં ફફડાટ ફેલાવી દીધો છે.
2 મોટી હોટલ સીલ, ટનબંધ વાસી ખોરાક નાશ
ફૂડ વિભાગની ટીમે ગોંડલ રોડ, બોમ્બે હોટલ સામે વૃધ્ધાશ્રમ પાસે આવેલ “શ્રી રામ ચાઇનીઝ & પંજાબી રેસ્ટોરન્ટ”માં દરોડા પાડ્યા. ત્યાંથી લગભગ 10-12 KG વાસી અખાદ્ય ખોરાક મળી આવતા હોટલને તાત્કાલિક સીલ કરી દેવામાં આવી અને હાઈજેનિક કન્ડિશન જાળવવા નોટિસ ફટકારવામાં આવી.
બીજો ફટકો મવડી બાયપાસ રોડ, રિયલ પ્રાઇમ સામે આવેલ “બાલાજી ઢોસા સેન્ટર” પર પડ્યો. અહીં અનહાઈજેનિક કન્ડિશનમાં ખોરાક બનાવવાની સાથે વાસી માલનો સ્ટોક મળી આવ્યો. પરિણામે હોટલ સીલ, લાઇસન્સ મેળવવાની સૂચના, અંદાજે 115 KG વાસી ખોરાકનો નાશ અને ₹10,000નો દંડ વસૂલવામાં આવ્યો.
આ પણ વાંચો: RMCની તવાઈ: વાસી ખોરાક પીરસતી 2 હોટલ સીલ: 84,400નો દંડ
63 જગ્યાએ તપાસ, 74,400નો દંડ
RMCની ટીમે મવડી ચોકડીથી બાપા સીતારામ ચોક, 150 ફૂટ રિંગરોડ, સર્વેશ્વરચોક, રેસકોર્સ રિંગ રોડ, 80 ફૂટ રોડ, ITI હોકર્સ ઝોન, આજી ડેમથી માંડા ડુંગર સુધી અને કોઠારીયા મેઇન રોડ સહિત કુલ 63 પેઢી, રેસ્ટોરન્ટ અને હોકર્સ ઝોનની ચેકિંગ કરી. તેમાંથી કુલ 260 KG અખાદ્ય વાસી જથ્થો નાશ કરવામાં આવ્યો. સ્ટોરેજ અને સ્વચ્છતા ન જાળવનારી 26 પેઢીઓને નોટિસ આપવાની સાથે ₹74,400ની પેનલ્ટી વસૂલ કરી.
6 ફૂડ સેમ્પલ લેબમાં મોકલાયા
ફૂડ સેફ્ટી સ્ટાન્ડર્ડ એક્ટ-2006 હેઠળ શંકાસ્પદ ખાદ્ય પદાર્થોના 6 નમૂના પણ લેવામાં આવ્યા છે. જેમાં શ્રીજી મઠાવાલા, નાનામવા રોડના અમેરિકન ડ્રાયફ્રુટ શ્રીખંડ અને વેનીલા આઇસ્ક્રીમ, આશુતોષ કોઠી આઇસ્ક્રીમ, રેસકોર્સના ડ્રાયફ્રૂટ ડીલાઇટ અને રાવણા જાંબુ આઇસ્ક્રીમ, તેમજ મહેશ વિજય ડેરીફાર્મ, અમિન માર્ગના પાઈનેપલ શ્રીખંડ અને મેંગો ચિપ્સ શ્રીખંડનો સમાવેશ થાય છે. લેબ રિપોર્ટ બાદ આગળની કાર્યવાહી કરવામાં આવશે.
RMCના આરોગ્ય અધિકારીઓએ સ્પષ્ટ ચેતવણી આપી છે કે શહેરીજનોના સ્વાસ્થ્ય સાથે રમત કરનાર કોઈપણ ફૂડ યુનિટને બક્ષવામાં આવશે નહીં. નાગરિકોને પણ અપીલ છે કે શંકાસ્પદ ખોરાક કે ગંદકી જણાય તો તુરંત ફૂડ વિભાગને જાણ કરે.
