વિદ્યાર્થીઓને ડ્રગ કેસમાં ફિટ કરી દેવાની ધમકી: હોબાળો થતાં પોલીસમેન સસ્પેન્ડ

કહ્યું” બધાની બેગમાં 50 ગ્રામ પાવડર મૂકીને જિંદગી બરબાદ કરી દઇશ, આખી જિંદગી જેલમાં સબડશો”

મુંબઈમાં કોકરોચ જનતા પાર્ટી (CJP)ના આહ્વાન પર ચાલી રહેલા વિદ્યાર્થી આંદોલન દરમિયાન પોલીસના એક જવાને અટકાયતમાં લેવાયેલા વિદ્યાર્થીઓને ખોટા ડ્રગ કેસમાં ફસાવી દેવાની ધમકી આપતો વીડિયો વાયરલ થતાં ભારે વિવાદ સર્જાયો છે. ઘટનાની ગંભીરતા ધ્યાનમાં લઈ મુંબઈ પોલીસે સંબંધિત પોલીસકર્મીને હાલની ફરજ પરથી હટાવી સસ્પેન્ડ કર્યો છે અને સમગ્ર મામલે વિભાગીય તપાસ શરૂ કરી છે.

છેલ્લા કેટલાક દિવસોથી મુંબઈના શિવાજી પાર્ક, ચેમ્બુર અને આઝાદ મેદાન સહિત વિવિધ સ્થળોએ વિદ્યાર્થીઓ અને નાગરિકો દ્વારા વિરોધ પ્રદર્શન કરવામાં આવી રહ્યા છે. આ દરમિયાન કોંગ્રેસની મુંબઈ એકમ દ્વારા સોશિયલ મીડિયા પર શેર કરાયેલા વીડિયોમાં પોલીસ વાનમાં બેઠેલા કેટલાક વિદ્યાર્થીઓને એક પોલીસકર્મી ધમકી આપતો સંભળાય છે.

વીડિયોમાં પોલીસકર્મી વિદ્યાર્થીઓને કહે છે કે ફરી પ્રદર્શનમાં દેખાશો તો તમારું જીવન બરબાદ કરી દઈશ. તે આગળ એમ પણ કહે છે કે તેમની બેગમાં 50-50 ગ્રામ ડ્રગ્સનો પાવડર મૂકી ખોટા એનડિપીએસ કેસમાં ફસાવી દેશે, જેથી આખું જીવન જેલમાં સબડવું પડશે.. સાથે જ તે વિદ્યાર્થીઓના આંદોલનને કારણે પોતાની મુશ્કેલીઓ વધી હોવાનું પણ કહે છે.

આ પણ વાંચો: રાજકોટ શહેર-જિલ્લામાં શરતભંગના ૧૮ કેસમાં ૨,૧૮,૧૧,૪૩૬નો દંડ ફટકારતા કલેક્ટર

વીડિયો વાયરલ થતાં મુંબઈ પોલીસે ઘટનાની સત્યતા અને સમગ્ર સંજોગોની તપાસ શરૂ કરી છે. તપાસ પૂર્ણ ન થાય ત્યાં સુધી વીડિયોમાં દેખાતા યુનિફોર્મધારી પોલીસકર્મીને હાલની પોસ્ટિંગ પરથી દૂર કરવામાં આવ્યો છે.

કોંગ્રેસે આ વીડિયોને લોકશાહી અધિકારો પર સીધો હુમલો ગણાવ્યો છે. પાર્ટીએ જણાવ્યું કે જો વીડિયો સાચો હોય તો વિદ્યાર્થીઓના પ્રશ્નોના જવાબ આપવાના બદલે તેમને ખોટા કેસમાં ફસાવવાની ધમકી આપવી અત્યંત ગંભીર બાબત છે અને શાંતિપૂર્ણ વિરોધ કરવાનો અધિકાર કોઈ ગુનો નથી.

મુંબઈ પોલીસની અન્ય કાર્યવાહી સામે પણ સવાલ…

વિદ્યાર્થી આંદોલનોને રોકવા માટે મુંબઈ પોલીસ દ્વારા અપનાવવામાં આવી રહેલી અન્ય પદ્ધતિઓ પણ ચર્ચાના કેન્દ્રમાં આવી છે. અગાઉના પ્રદર્શનોમાં નામ નોંધાયેલા અથવા એફઆઈઆરમાં સામેલ વિદ્યાર્થીઓને સ્થાનિક પોલીસ સ્ટેશનોમાંથી સીધા ફોન કરી ફરી પ્રદર્શનમાં ન જોડાવાની ચેતવણી આપવામાં આવી રહી હોવાના આક્ષેપ થયા છે. કેટલાક વિદ્યાર્થીઓને વોટ્સએપ પર સતત પોતાની લાઇવ લોકેશન શેર કરવા માટે પણ કહેવામાં આવ્યું હોવાનું સામે આવ્યું છે. ઉપરાંત, ભારતીય નાગરિક સુરક્ષા સંહિતા (BNSS)ની કલમ 35(3) હેઠળ ડિજિટલ નોટિસ મોકલી અગાઉના પ્રદર્શન અંગે પૂછપરછ માટે હાજર થવાનો આદેશ આપવામાં આવ્યો હોવાનું પણ જણાવાયું છે. આ પ્રકારની કાર્યવાહીથી વિરોધ પ્રદર્શનના બંધારણીય અધિકારો પર દબાણ લાવવાનો પ્રયાસ થઈ રહ્યો હોવાના આરોપો ઉઠ્યા છે.