રાજકોટ શહેર-જિલ્લામાં શરતભંગના ૧૮ કેસમાં ૨,૧૮,૧૧,૪૩૬નો દંડ ફટકારતા કલેક્ટર

રાજકોટ શહેર અને જિલ્લામાં ખેતીની જમીન અને ખુલ્લા પ્લોટમાં મંજૂરી વગર કોમર્શિયલ બાંધકામ કરી તગડી કમાણી કરતા આસામીઓ સામે જિલ્લા કલેક્ટરે શરૂ કરેલી ઝૂંબેશમાં છેલ્લા ચાર મહિનામાં શરતભંગના ૧૮ જેટલા કેસ ચલાવી મંજૂરી વગર કોમર્શિયલ બાંધકામ કરી વેપાર કરતા આસામીઓ પાસેથી ૨.૭૮ કરોડનો દંડ વસુલી સરકારની તિજોરીમાં જમા કરાવી દીધા છે.

રાજકોટ શહેર અને જિલ્લામાં ખેતીની જમીનને બિનખેતી કરાવ્યા વગર અથવા તો એન.એ. થયેલ જમીનના ખુલ્લા પ્લોટમાં મંજૂરી વગર કોમર્શિયલ બાંધકામ ખડકી દઈ વેપાર-ધંધો કરવામાં આવતો હોવાની ફરિયાદો ઉઠી હતી.

જિલ્લા કલેક્ટર ઓમપ્રકાશને મળેલી ફરિયાદોના આધારે મામલતદારોને તપાસ કરી રિપોર્ટ કરવા આદેશ આપ્યો હતો જેમાં રાજકોટ શહેર અને જિલ્લાના ૧૮ જેટલા સ્થળે મંજૂરી વગર બાંધકામ કરવામાં આવ્યું હતું જેઓને નોટિસ ફટકારી શરતભંગના કેસ ચલાવી ૧૮ આસામીઓ પાસેથી કુ ૨,૧૮,૧૧,૪૩૬ રૂપિયા દંડ વસુલવામાં આવ્યો છે.

આ પણ વાંચો: ચાંદીપુરા વાયરસ પોઝિટિવ આવતા પાંચિયાવદરમાં ૧૫૦ મકાનનો સર્વે કરાયો

શરતભંગના કેસમાં ખોખળદળ ગામે સર્વે નં.૯૦/૧ પૈકી ૨માં ૪૦૫૭ ચો.મી. જમીનનો વાણિજ્ય ઉપયોગ થતો હોય ૨,૭૭,૬૩૦ દંડ કર્યો હતો. જ્યારે મુંજકા સર્વે નં.૧૭/૧૦ પૈકીની રહેણાંક હેતુ માટેની ૫૮૮ ચો.મી. જમીનનો વાણિજ્ય ઉપયોગ કરતા હોય ૧,૭૦,૮૪૬ દંડ કર્યો હતો.

આ ઉપરાંત મુંજકા સર્વે નં.૩૧ પૈકીની ૧૭૮૦૬ ચો.મી. જમીનનો વાણિજ્ય ઉપયોગ કરી વેપાર કરતા હોય ૨૪,૭૭,૩૬૦ દંડ કરાયો છે. જ્યાર આટકોટમાં સર્વે નં.૨૩૬ પૈકીની ૨૫૦ ચો.મી. જમીનમાં વાણિજ્ય ઉપયોગ થતો હોય ૧૨,૧૪૧ દંડ કરાયો છે. જ્યારે પાળ સર્વે નં.૧૮૬ ૧૩૩,૨૫ ચો.મી. જમીન બિનખેતી કરાવ્યા વગર પાર્ટી લોન્સ તરીકે ઉપયોગ થતો હોય ૭,૪૬,૨૩૦ દંડ કરાયો છે. આટકોટ સર્વે નં.૮૦/૧ની ૧૭૨૭૮ ચો.મી. ખેતીની જમીનમાં હોટલ ખડકી દેતા આસામીને ૭૯૮૬નો દંડ કરાયો છે.

જેતપુર સર્વે નં.૧૧૭ પૈકી ૧ની ૧૦,૦૦૦ ચો.મી. ખેતીની જમીનમાં પાર્ટી પ્લોટ બનાવનારને ૧૩,૨૦,૨૭૦નો દંડ કરાયો છે. જ્યારે નવાગામ જસદણ સર્વે નં.૬૨ પૈકી ૨ની ખેતીની ૧૬૧૮૮ ચો.મી. જમીનનો વાણિજ્ય ઉપયોગ કરનારને ૪૮૬૪નો દંડ ફટકારવામાં આવ્યો છે. ધોરાજીના ફરેણી ગામે સર્વે નં.૧૪૩/૧ પૈકીની ૧,૦૫,૫૭૪ ચો.મી. ખેતીની જમીનનો ધાર્મિક હેતુ માટે ઉપયોગ કરનારને ૪૯,૨૦૦નો દંડ કરાયો છે.

લોધીકાના પારડી ગામે સર્વે નં.૩૫૨ની ૨૬,૧૨૫ ચો.મી. ખેતીની જમીનમાં મંજૂરી વગર ઓઈલ મિલ બનાવી નાખનાર આસામીને ૫,૨૮,૦૦૦નો દંડ કરાયો છે. જ્યારે પાળ ગામે સર્વે નં.૪૮૭, ૪૮૮/૨ના પ્લોટમાં પાર્ટી પ્લોટ ઉભો કરનારને ૧૦,૮૫,૭૮૦ના દંડ કરવામાં આવ્યો છે.

લોધીકાના ઢોલરા ગામે સર્વે નં.૨૨ પૈકી ૨ ના પ્લોટમાં પાર્ટી પ્લોટ બનાવનારને ૪,૦૪,૯૧૦નો દંડ કરાયો છે. જ્યારે ઢોલરા ગામે સર્વે નં.૨૨/૧માં પાર્ટી પ્લોટ બનાવી નાખનારને પણ ૬,૧૪,૧૦૦નો દંડ કરવામાં આવ્યો છે.

રૈયા સર્વે નં.૧૬ અને ૧૭ પૈકીની ૧૫૫૮૧ ચો.મી. ખેતીની જમીનમાં તન્ના સ્પોર્ટ્સ સંકૂલ બનાવી વાણિજ્ય ઉપયોગ કરનાર આસામીને ૩૩,૧૨,૨૭૦નો દંડ ફટકારવામાં આવ્યો છે. જ્યારે પાળ ગામે સર્વે નં.૪૯૯ અને ૪૯૭ની ખેતીની જમીનમાં પાર્ટી પ્લોટ ઉભા કરી દેનાર બે આસામીને અનુક્રમે ૨૭,૨૯,૦૧૦ અને ૨૭,૨૯,૦૧૦નો દંડ ફટકારવામાં આવ્યો છે. ખોખળદળ ગામે સર્વે નં.૨૬૦ પૈકીની ૬૧૧૩ ચો.મી. ખેતીની જમીનનો વેપાર માટે ઉપયોગકરનારને ૪,૯૧,૦૧૦ અને રાજકોટ સર્વે નં.૨૬૯ પૈકીની ૩ની ખેતીની જમીનનો વાણિજ્ય ઉપયોગ કરનારને ૪૮,૫૦,૭૯૦નો દંડ કરવામાં આવ્યો છે.