ISRO હેડક્વાર્ટર બોમ્બ ઈમેઈલથી ખાલી, સર્ચમાં કંઈ નહીં પણ સુરક્ષા પર સવાલ

ગુરુવારે બેંગલુરુનું સન્નાટો તોડી નાખે તેવા સમાચાર આવ્યા. દેશના ગૌરવ સમા ISROના મુખ્યાલયને બોમ્બથી ઉડાવી દેવાની ધમકીવાળો ઈમેઈલ મળતા જ તંત્ર દોડતું થયું. વૈજ્ઞાનિકો અને કર્મચારીઓને તાત્કાલિક કેમ્પસ ખાલી કરાવવામાં આવ્યું અને બોમ્બ સ્ક્વોડે ખૂણે ખૂણો ફેંદી નાખ્યો.

ધમકીભર્યો ઈમેઈલ અને તાત્કાલિક એક્શન 

ગુરુવારે સવારે ભારતીય અવકાશ સંશોધન સંગઠન ISROના બેંગલુરુ સ્થિત મુખ્યાલયને એક અજાણ્યા ઈમેઈલ દ્વારા બોમ્બથી ઉડાવી દેવાની ધમકી મળી. ઈમેઈલ મળતા જ સુરક્ષા એજન્સીઓ એલર્ટ મોડમાં આવી ગઈ. કટોકટી પ્રોટોકોલ લાગુ કરીને તાત્કાલિક સમગ્ર કેમ્પસ ખાલી કરાવવામાં આવ્યું. વૈજ્ઞાનિકો સહિત તમામ કર્મચારીઓને સુરક્ષિત સ્થળે ખસેડાતા થોડા સમય માટે ગભરાટનો માહોલ સર્જાયો હતો.

કલાકો સુધી સર્ચ, શંકાસ્પદ કંઈ નહીં 

ઘટનાની જાણ થતા જ બેંગલુરુ પોલીસ, બોમ્બ ડિસ્પોઝલ સ્ક્વોડ અને અન્ય સુરક્ષા એજન્સીઓની ટીમો ઘટનાસ્થળે પહોંચી ગઈ. આસપાસના વિસ્તારમાં પણ સુરક્ષા વધારી દેવામાં આવી. કલાકો સુધી ચાલેલા સઘન સર્ચ ઓપરેશનમાં ISRO કેમ્પસમાંથી કોઈ શંકાસ્પદ વસ્તુ કે વિસ્ફોટક મળી આવ્યો નથી. જોકે એજન્સીઓએ આ ધમકીને હળવાશથી લીધી નથી અને તપાસ ચાલુ રાખી છે.

આ પણ વાંચો: 2 કલાકમાં 4 ઈંચ! કેશોદ-માળિયા જળમગ્ન, સૌરાષ્ટ્રમાં છોતરાફાડ ચોમાસાની ધબધબાટી

સાયબર સેલ તપાસમાં જોડાયું, IP એડ્રેસ ટ્રેસ કરાશે 

બેંગલુરુ પોલીસ કમિશનરના જણાવ્યા મુજબ દેશભરની સુરક્ષા એજન્સીઓ સાથે મળીને આ મામલાની તપાસ થઈ રહી છે. સાયબર સેલ ધમકીભર્યા ઈમેઈલનું IP એડ્રેસ, મોકલનારની ઓળખ અને તેનો હેતુ શોધવા માટે કામે લાગ્યું છે. ISRO જેવી સંવેદનશીલ અને વ્યૂહાત્મક સંસ્થાને મળેલી ધમકીને આતંકવાદી કૃત્ય કે અફવા બંને એંગલથી તપાસવામાં આવી રહી છે.

સુરક્ષા વ્યવસ્થા પર સવાલ, ISROએ આપી ખાતરી 

ચંદ્રયાન, ગગનયાન જેવા મહત્વના મિશનને કારણે ISRO હંમેશા વિદેશી ગુપ્તચર એજન્સીઓના નિશાના પર રહ્યું છે. આ ઘટનાએ દેશની અગ્રણી વૈજ્ઞાનિક સંસ્થાની સુરક્ષા વ્યવસ્થા પર પણ સવાલો ઉભા કર્યા છે. જોકે ISRO દ્વારા સત્તાવાર રીતે જણાવવામાં આવ્યું છે કે તમામ કર્મચારીઓ સુરક્ષિત છે અને સામાન્ય કામગીરી ટૂંક સમયમાં ફરી શરૂ કરવામાં આવશે. પોલીસનું કહેવું છે કે આવી ધમકીઓ ઘણીવાર ખોટી પુરવાર થાય છે, પરંતુ કોઈપણ જોખમ લેવાય નહીં. ISRO કેમ્પસની સુરક્ષા વધુ કડક કરી દેવામાં આવી છે અને ભવિષ્યમાં આવી ઘટના ન બને તે માટે વધારાના પગલાં લેવાશે.