PFના નાણાં UPI અને ATMથી ઉપાડવાની સુવિધા ટૂંક સમયમાં

સભ્યો 75% સુધીની EPF રકમ તરત જ ઉપાડી શકશે

EPFO 3.0થી PF ઉપાડવું બનશે સરળ; UPI અને ATM મારફતે મળશે તાત્કાલિક રકમ

જૂનના અંત સુધી નવી ડિજિટલ સુવિધા શરૂ થશે

કર્મચારી ભવિષ્ય નિધિ સંસ્થા (EPFO) ટૂંક સમયમાં EPFO 3.0 ડિજિટલ પ્લેટફોર્મ લોન્ચ કરવા જઈ રહી છે, જેના હેઠળ EPF ખાતાધારકો UPI એપ અને EPF-લિંકડ ATM દ્વારા પોતાના PFના નાણાં ઉપાડી શકશે. આ સુવિધા જૂનના અંત સુધીમાં શરૂ થઈ શકે છે.

નેશનલ પેમેન્ટ્સ કોર્પોરેશન ઓફ ઇન્ડિયા (NPCI) સાથે મળીને વિકસાવાયેલી આ વ્યવસ્થાનું ટેસ્ટિંગ પૂર્ણ થઈ ચૂક્યું છે. નવી સુવિધા હેઠળ સભ્યો પોતાના EPF બેલેન્સમાંથી 75 ટકા સુધીની રકમ સીધી બેંક ખાતામાં તાત્કાલિક ટ્રાન્સફર કરી શકશે. હાલ PF ઉપાડવા માટે ક્લેમ પ્રક્રિયા અને મંજૂરીની રાહ જોવી પડતી હોવાથી સમય લાગે છે, જ્યારે નવી વ્યવસ્થા પ્રક્રિયાને વધુ ઝડપી, પારદર્શક અને સરળ બનાવશે.

આ પણ વાંચો: ટેલીગ્રામ નવું ડાર્ક વેબ, આતંકવાદ અને ગુનાખોરીની ગંગોત્રી: કેન્દ્રની એફિડેવિટ

EPFO દ્વારા EPF-લિંકડ ATM કાર્ડ પણ આપવામાં આવે તેવી શક્યતા છે, જે સામાન્ય ડેબિટ કાર્ડની જેમ કાર્ય કરશે. નિષ્ણાતોના મતે આ પગલું ખાસ કરીને આકસ્મિક જરૂરિયાત સમયે કર્મચારીઓને ઝડપથી નાણાં ઉપલબ્ધ કરાવવામાં મદદરૂપ બનશે, સાથે જ નિવૃત્તિ માટેના ભંડોળનું રક્ષણ પણ જાળવવામાં આવશે.

અન્ય મહત્વના ફેરફારો

 PF ક્લેમ માટેની ઓટો-સેટલમેન્ટ મર્યાદા 1 લાખથી વધારી 5 લાખ

 UMANG એપ મારફતે Face Authentication Technology (FAT) દ્વારા ઓળખ ચકાસણીની સુવિધા

 UAN એક્ટિવેશન પ્રક્રિયા વધુ ઝડપી અને સરળ બનશે

 PF પાસબુક ઓનલાઈન સરળતાથી ઉપલબ્ધ થશે

આધાર-લિંકડ વિગતોમાં સુધારા કરવાની પ્રક્રિયા વધુ સરળ બનશે

 PF ઉપાડ માટે દસ્તાવેજી પ્રક્રિયા અને રાહ જોવાનો સમય ઘટશે

 EPF બેલેન્સમાંથી મહત્તમ 75% રકમ ઉપાડી શકાશે, જ્યારે ઓછામાં ઓછા 25% ભંડોળ ભવિષ્ય માટે જાળવવું પડશે.