ઉદ્યોગપતિઓનાં ‘ગુપ્ત બીઝનેસ પાર્ટનર’ સાંવલિયા શેઠના દરબારમાં એક મહિનામાં કરોડોનું દાન

-દાનપેટીમાંથી ૩૩ કરોડ રોકડા મળ્યા, બાકીના ઓનલાઈન આવ્યા

ઉદ્યોગપતિઓ જેને પોતાના ગુપ્ત બીઝનેસ પાર્ટનર માને છે તે રાજસ્થાનમાં ભગવાન શ્રીકૃષ્ણના પરમ ધામ તરીકે દેશ-વિદેશમાં પૂજાતા પ્રખ્યાત શ્રી સાંવલિયા શેઠ મંદિરમાં ભક્તોની અતૂટ શ્રદ્ધાએ ફરી એકવાર નવો ઈતિહાસ રચ્યો છે.મંદિરમાં એક જ મહિનામાં ૪૦ કરોડ રોકડ દાન આવ્યું છે . આ ઉપરાંત સોનુ અને ચાંદી પણ મળ્યા છે. મંદિરના સમગ્ર ઈતિહાસમાં અત્યાર સુધીનો સૌથી મોટો આંકડો અને ઐતિહાસિક સીમાચિહ્નરૂપ ગણાવવામાં આવી રહ્યો છે.

સાંવલિયા શેઠ મંદિરની આ દાનપેટી ગત 14 જૂનના રોજ ખોલવામાં આવી હતી, જે બાદ ચલણી નોટોની ગણતરી માટે એક ખૂબ જ મોટું ઓપરેશન હાથ ધરવામાં આવ્યું હતું. સમગ્ર ગણતરી પ્રક્રિયામાં સંપૂર્ણ પારદર્શિતા જળવાઈ રહે તે માટે કડક સીસીટીવી કેમેરાની દેખરેખ હેઠળ સાત અલગ-અલગ તબક્કામાં નોટો ગણવાનું કામ પૂરું કરાયું હતું. મંદિર બોર્ડના ઉચ્ચ અધિકારીઓની સીધી દેખરેખ હેઠળ અંદાજે 180 જેટલા સ્ટાફ સભ્યોએ દિવસ-રાત સતત મહેનત કરીને આ અતિભારે કામગીરી સંભાળી હતી.

મંદિરમાં આવેલા દાનના આંકડાઓ પર નજર કરીએ તો, માત્ર મુખ્ય દાનપેટીમાંથી જ 33.15 કરોડથી વધુની જંગી રોકડ રકમ પ્રાપ્ત થઈ છે. આ સિવાય મંદિરના અર્પણ ખંડ, મની ઓર્ડર અને વિવિધ ઓનલાઈન માધ્યમો દ્વારા 7.66 કરોડથી વધુનું દાન અલગથી મળ્યું હતું.

આ ઉપરાંત 1 કિલો 738 ગ્રામ સોનું, 110 કિલો 648 ગ્રામ ચાંદી અને વિશ્વના અંદાજે 25 થી 30 અલગ-અલગ દેશોની વિદેશી ચલણી નોટોનો સમાવેશ થાય છે.

આ ભવ્ય દાન પાછળ મંદિર સાથે જોડાયેલી એક અત્યંત અનોખી અને રસપ્રદ માન્યતા જવાબદાર છે. દેશ અને વિદેશના અગ્રણી ઉદ્યોગપતિઓ, વેપારીઓ અને ઉદ્યોગસાહસિકો ભગવાન સાંવલિયા શેઠને પોતાના બિઝનેસમાં એક ‘ગુપ્ત ભાગીદાર’ માને છે. તેઓ પોતાના વ્યાપારમાંથી થતા નફાનો એક ચોક્કસ અને નક્કી કરેલો હિસ્સો સીધો ભગવાનના ચરણોમાં અર્પણ કરે છે. વેપારીઓ દ્રઢપણે માને છે કે સાંવલિયા સરકારને પોતાના વ્યવસાયમાં ભાગીદાર રાખવાથી તેમના વેપાર-ધંધામાં ઘાતાંકીય વૃદ્ધિ થાય છે અને ક્યારેય ખોટ જતી નથી. આ જ કારણ છે કે અહીં દર મહિને ચઢાવાનો ગ્રાફ એક નવો જ રેકોર્ડ સ્થાપિત કરે છે.