કોલકત્તામાં હવે કઈ મહિલા પર થયો હુમલો ? જુઓ
કોલકાતામાં મહિલાઓ પર હુમલાના બનાવ વધી રહ્યા છે. લોકોમાં આક્રોશ છે ત્યારે વધુ એક ચોંકાવનારી ઘટના બની હતી જેમાં બાઈક સવારે બંગાળી અભિનેત્રીની કાર પર હુમલો કર્યો હતો. આરોપ છે કે બાઈક સવારે એક્ટ્રેસ પાયલ મુખર્જીની કારના કાચને મુક્કો મારીને તોડી દીધો અને કથિતરીતે તેની પર હુમલો કરવાનો પ્રયત્ન કર્યો હતો. આ ઘટના શુક્રવારે સાંજે સાઉથ કોલકાતાના સધર્ન એવન્યુમાં બની હતી. ઘટના દરમિયાન બંગાળી એક્ટ્રેસે પોતાની ફેસબુક પ્રોફાઈલ પર લાઈવ સ્ટ્રીમિંગ શરૂ કર્યું અને સમગ્ર ઘટના રડતાં રડતાં જણાવી હતી.
વીડિયોમાં જોઈ શકાય છે કે એક્ટ્રેસ રડતાં-રડતાં પોતાના કારનો તૂટેલો કાચ બતાવી રહી છે. આ દરમિયાન તે સવાલ ઉઠાવતી નજર આવી કે કોલકાતાના રસ્તા પર મહિલાઓની સુરક્ષા ક્યાં છે? તેણે જણાવ્યું કે બાઈક સવારે મને વિંડો ખોલવા માટે કહ્યું, પરંતુ મે ખોલી નહીં. પછી તેણે વિંડો પર મુક્કો માર્યો અને તેને તોડી દીધો. કાચના ટુકડા મારા સમગ્ર શરીર પર પડ્યાં.
લાઈવ સ્ટ્રીમિંગ દરમિયાન તેની પોસ્ટ પર ઘણા લોકોએ મદદ માટે કોલકાતા પોલીસને ટેગ કરી. સોશિયલ મીડિયાથી માહિતી મળ્યા બાદ કોલકાતા પોલીસની એક ટીમ તાત્કાલિક ઘટના સ્થળે પહોંચી ગઈ હતી. જોધપુર પાર્ક વિસ્તારની નજીક ડ્યૂટી પર હાજર પોલીસ કર્મચારીએ આરોપી બાઈક સવારને પકડી લીધો હતો.
પાયલ બંગાળી ફિલ્મો સિવાય સાઉથની ફિલ્મોમાં પણ કામ કરી ચૂકી છે. તે ધ સીવેજ ઓફ રોબિન હૂડ, ગિરગિટ, શ્રીરંગપુરમ, ચોલ કંતુલ અને માઈકલ જેવી ફિલ્મોમાં કામ કરી ચૂકી છે. આ સિવાય તેણે સંજય મિશ્રાની સાથે હિંદી ફિલ્મ ‘વો તીન દિન’ માં પણ કામ કર્યું છે. તેણે ટોલીવુડની ફિલ્મ ‘દેખ કમો લગે’ (2017) થી ડેબ્યૂ કર્યું હતું.
