નરેન્દ્ર મોદીની ઇન્સ્ટાગ્રામ રીલે બનાવ્યો વર્લ્ડ રેકોર્ડ: 16 મિલિયન લાઇક્સ અને 1.5 મિલિયન કોમેન્ટ્સ મળી: 10 લાખ ફોલોઅર્સ વધ્યા
નવી દિલ્હી: પેપર લીક મુદ્દે વડાપ્રધાન નરેન્દ્ર મોદીએ ઇન્સ્ટાગ્રામ પર શેર કરેલી રીલે 24 કલાકમાં 305 મિલિયનથી વધુ વ્યૂઝ મેળવી નવો વર્લ્ડ રેકોર્ડ બનાવ્યો છે. નરેન્દ્ર મોદીના ફોલોઅર્સમાં પણ રાતોરાત ૧૦ લાખનો વધારો થયો છે.
નરેન્દ્ર મોદીએ લોકપ્રિય અમેરિકન કન્ટેન્ટ ક્રિએટર અને સ્ટ્રીમર IShowSpeed નો અગાઉનો રેકોર્ડ તોડી નાખ્યો છે. અગાઉ ફીફા વર્લ્ડ કપ દરમિયાન કોરિયન બેન્ડ BTS ના સભ્યો સાથેની IShowSpeed ની રીલને 24 કલાકમાં આશરે 300 મિલિયન વ્યૂઝ મળ્યા હતા.
આ પણ વાંચો: પાકિસ્તાની હેન્ડલ્સ દ્વારા મોદી અને પિયુષ ગોયેલના ફેક વીડિયો વાયરલ
મીડિયા રિપોર્ટ્સ અને જાહેર ઇન્સ્ટાગ્રામ મેટ્રિક્સ અનુસાર, ગુરુવારે રાત્રે શેર કરાયેલી વડાપ્રધાન મોદીની સેલ્ફી-સ્ટાઇલ રીલે 24 કલાકમાં 305 મિલિયન વ્યૂઝ, 16 મિલિયનથી વધુ લાઇક્સ અને 1.5 મિલિયનથી વધુ કોમેન્ટ્સ મેળવી છે. આ વિડિયો વાયરલ થતાં જ વડાપ્રધાનના ઇન્સ્ટાગ્રામ એકાઉન્ટમાં એક જ રાતમાં અંદાજે 10 લાખ નવા ફોલોઅર્સનો વધારો થયો છે.
આ રેકોર્ડબ્રેકિંગ રીલમાં પીએમ મોદીએ દેશના લાખો વિદ્યાર્થીઓ અને તેમના પરિવારોના ભવિષ્ય સાથે જોડાયેલા પેપર લીક મુદ્દાની ગંભીરતા સ્વીકારી હતી. તેમણે સ્પષ્ટ કર્યું કે, આ કેસમાં સંડોવાયેલા જવાબદાર લોકોની ઓળખ કરીને તેમની સામે કડક કાર્યવાહી કરવામાં આવી રહી છે અને હાલ તેઓ જેલમાં છે.
શુક્રવારે રાત્રે વડાપ્રધાન મોદીએ વધુ એક ઇન્સ્ટાગ્રામ રીલ શેર કરી હતી, જેમાં તેમણે પ્રથમ રીલ પર મળેલા સકારાત્મક પ્રતિસાદ બદલ દેશવાસીઓ અને ખાસ કરીને યુવાનોનો આભાર વ્યક્ત કર્યો હતો.
બીજા વિડિયોમાં વડાપ્રધાન મોદીએ કહ્યું, ‘ધન્યવાદ મિત્રો. ગઈકાલે મોડી રાત્રે મને તમારી સાથે જોડાવાનો અવસર મળ્યો. પહેલા વિડિયો પર મળેલા તમારા સકારાત્મક પ્રતિસાદ અને સૂચનો માટે હું દિલથી આભારી છું. આપણો આ સંબંધ વધુ મજબૂત બનતો રહેશે.’
