આજનો યુવા સવાલો કરશે જ, એમને આદેશ ન આપો, ચર્ચા કરો: ડો. મોહન ભાગવતની સલાહ
RSS તરફથી જો કે આંદોલન અંગે સત્તાવાર નિવેદન નથી આવ્યું
પરીક્ષાના પેપર લીક મુદ્દે દિલ્હીમાં વિદ્યાર્થીઓનું આંદોલન ઉગ્ર બન્યું છે ત્યારે રાષ્ટ્રીય સ્વયંસેવક સંઘ (RSS)ના સરસંઘચાલક મોહન ભાગવતે યુવાપેઢીને લઈને આપેલી ટિપ્પણીઓએ રાજકીય વર્તુળોમાં ચર્ચા જગાવી છે. જોકે તેમણે ક્યાંય પણ CJPના આંદોલનનો સીધો ઉલ્લેખ કર્યો નહોતો, તેમ છતાં તેમના નિવેદનને વર્તમાન પરિસ્થિતિ સાથે સાંકળીને જોવામાં આવી રહ્યું છે.
શુક્રવારે ‘વિશ્વ માંગલ્ય સભા’ કાર્યક્રમમાં સંબોધન કરતાં ભાગવતે કહ્યું હતું કે આજની યુવાપેઢી ગેરમાર્ગે દોરાયેલી કે દિશાહીન નથી, પરંતુ તે દરેક બાબતે પ્રશ્ન પૂછે છે. તેથી તેને આદેશ આપવાને બદલે સમજાવવાની, તેની સાથે સમય વિતાવવાની અને પ્રેમપૂર્વક સંવાદ કરવાની જરૂર છે. તેમણે કહ્યું કે અમારા યુગમાં આજ્ઞાપાલનનું મહત્ત્વ હતું, પરંતુ આજનો સમય અલગ છે અને નવી પેઢી દરેક વાત પાછળનું કારણ જાણવા ઇચ્છે છે.
ભાગવતે ભારપૂર્વક જણાવ્યું હતું કે યુવાનોનો વિશ્વાસ જીતવો હોય તો તેમની સાથે ચર્ચા કરવી પડશે. “ડિક્ટેશન નહીં, ડિસ્કશન. આદેશ નહીં, સહમતી.” યુવાનોમાં પોતાના હોવાનો ભાવ ઉભો કરવો અને તેમની સાથે સતત સંવાદ જાળવવો એ આજની સૌથી મોટી જરૂરિયાત હોવાનું તેમણે જણાવ્યું હતું.
ભાગવતે પોતાના સંબોધનમાં દિલ્હીના જંતર-મંતર પર ચાલી રહેલા વિદ્યાર્થી આંદોલનનો કોઈ સીધો ઉલ્લેખ કર્યો નહોતો. જોકે પરીક્ષા પેપર લીક મુદ્દે દેશભરમાં ચાલી રહેલા વિરોધ પ્રદર્શનની વચ્ચે તેમના આ નિવેદનને મહત્વપૂર્ણ માનવામાં આવી રહ્યું છે.
બીજી તરફ RSS નેતાએ વિદેશી હાથનો આક્ષેપ કર્યો
વિદ્યાર્થી આંદોલન વચ્ચે RSSના વરિષ્ઠ નેતા ઇન્દ્રેશ કુમારે દાવો કર્યો હતો કે CJPના વિરોધ પ્રદર્શન પાછળ દેશની અંદર અને વિદેશમાં કાર્યરત એવી તાકાતો સક્રિય છે, જે ભારતને વિકસિત, મજબૂત અને શિક્ષિત રાષ્ટ્ર બનતું જોવા ઇચ્છતી નથી. તેમના આ નિવેદનથી આંદોલનને લઈને રાજકીય ચર્ચા વધુ તેજ બની છે.
ભાગવતના મૌન સામે સવાલ
જંતર-મંતર પર ચાલી રહેલા વિદ્યાર્થી આંદોલન અંગે મોહન ભાગવતે અત્યાર સુધી કોઈ સીધી ટિપ્પણી કરી નથી. તેમના આ મૌન અંગે વરિષ્ઠ વકીલ અને રાજ્યસભાના સભ્ય કપિલ સિબ્બલે સોશિયલ મીડિયા પર પ્રશ્ન ઉઠાવતા લખ્યું કે છેલ્લા એક મહિનાથી આપનું મૌન આપના પ્રવચનો કરતાં વધુ બોલકું છે. ત્યારબાદ ભાગવતના તાજેતરના નિવેદનને પણ વિવિધ રાજકીય અર્થઘટનો સાથે જોવામાં આવી રહ્યું છે.
