ભારતીય મૂળ ધરાવતા અમેરિકન મતદારોનું ટ્રમ્પને નહીં, કમલા હેરીસને પ્રચંડ સમર્થન

• અનેક રાજ્યોમાં મૂળ ભારતીય નાગરિકો ચૂંટણીનું પરિણામ નક્કી કરવામાં નિર્ણાયક

અમેરિકામાં પાંચમી નવેમ્બરે પ્રમુખ પદ માટેની ચૂંટણી યોજવાની છે અને ડેમોક્રેટિક પક્ષના ઉમેદવાર કમલાહેરી અને રિપબ્લિકન પાર્ટીના ઉમેદવાર ડોનાલ્ડ ટ્રમ્પ વચ્ચે રસાકસી નો જંગ જામ્યો છે ત્યારે ભારતીય મૂળ ધરાવતા અમેરિકન નાગરિકોએ કમલા હેરીસ ને સમર્થન આપ્યું હોય તેવું ચિત્ર અનેક સર્વેમાં ઉપસ્યું છે. નોંધનીય છે કે ભારતમાં ઘણા લોકો ટ્રમ્પના વિજય માટે હોમ હવન અને પૂજા પાઠ કરી રહ્યા છે પણ તેનાથી વિપરીત અમેરિકામાં વસતા મૂળ ભારતીય નાગરિકો ટ્રમ્પ ને બદલે કમલા હેરીસને વિજય બનાવવા તનતોડ પ્રયાસ કરી રહ્યા છે.

પ્રમુખ પદની ચૂંટણીમાંથી ઓગસ્ટ મહિનામાં બાઇડેન હટી ગયા અને કમલા હેરીસ ની ઉમેદવારી નક્કી થઈ તે પછી અનેક ઇન્ડિયન અમેરિકન અને સાઉથ એશિયન અમેરિકન જૂથોએ કમલા હેરીસને ટેકો જાહેર કર્યો હતો. આ સંગઠનો એ કમલા હેરિસના પ્રચાર માટે આર્થિક ભંડોળ મેળવવામાં પણ મહત્વની ભૂમિકા ભજવી હતી.

અમેરિકામાં ભારતીય મૂળ ધરાવતા 53 લાખ લોકો વસે છે અને તેમાંથી 23 લાખ લોકોને મત અધિકાર પ્રાપ્ત છે. અમેરિકામાં ઇલેક્ટોરલ કોલેજ વોટના આધારે પરિણામ નક્કી થઈ છે ત્યારે કમ સે કમ સાત રાજ્યોમાં ભારતીય મૂળ ધરાવતા મતદારોના મત નિર્ણાયક સાબિત થતા રહ્યા છે.

એ પૈકીના એક રાજ્ય જ્યોર્જિયાના ફેડરેશન ઓફ ઇન્ડિયન અમેરિકન એસોસિયેશન ઓફ જ્યોર્જિયા નામના વગદાર સંગઠનના પ્રમુખ ડોક્ટર વાસુદેવ પટેલે તેમના સંગઠન વતી કમલા હેરીસ ને ટેકો જાહેર કર્યો હતો. તેમણે કહ્યું કે ભારતીય મૂળ ધરાવતા એક મહિલા પ્રથમ વખત પ્રમુખ પદની ચૂંટણી લડી રહ્યા છે ત્યારે ભારતીયો ગૌરવની લાગણી અનુભવી રહ્યા છે.

દિલ્હીમાં ઉછરેલા અને અમેરિકન નાગરિકત્વ ધરાવતા મેરીલેન્ડના યુવાને ગત ચૂંટણીમાં તેણે ડોનાલ્ડ ટ્રમ્પને મત આપ્યો હતો પણ આ વખતે તે કમલા હેરિસને વિજય બનાવવા પ્રયત્ન કરી રહ્યો છે.

રસાકસી ની લડાઈમાં મૂળ ભારતીયોનું રાજકીય વલણ અતિ મહત્વનું

પ્રમુખ પદની ચૂંટણીને હવે માત્ર પાંચ જ દિવસ બાકી રહ્યા છે ત્યારે અમેરિકામાં થયેલા વિવિધ સર્વેમાં કમલા હેરીસ અને ટ્રમ્પ લગોલગ દોડી રહ્યા હોય તેવું ચિત્ર ઉપસ્યું છે. સીએનએન અને ન્યૂયોર્ક ટાઇપ્સના સર્વેમાં બંને ઉમેદવારોને 47- 47 પોઈન્ટ મળ્યા હતા. એક માત્ર ફાઇનાન્સિયલ ટાઈમ્સ ના સર્વેમાં કમલા હેરીસ કરતા ટ્રમ્પ 1 પોઇન્ટ આગળ હતા. આવી અત્યંત રસાકસી ભરેલી ચૂંટણીમાં ભારતીય મૂળ ધરાવતા નાગરિકો અનેક રાજ્યોમાં પરિણામ નક્કી કરવામાં નિર્ણાયક સાબિત થશે તેવું માનવામાં આવે છે.

એ નાગરિકોમાંથી 55 ટકા મતદારો ડેમોક્રેટ્સ પાર્ટીના અને 26% રિપબ્લિકન પાર્ટીના નોંધાયેલા મતદારો છે. આ મહિને થયેલા છેલ્લા સર્વેમાં ભારતીય મૂળ ધરાવતા 61 ટકા નાગરિકોએ કમલા હેરીસને અને માત્ર 26 ટકા મતદારોએ ટ્રમ્પને પસંદ કર્યા હતા. 67 ટકા ઇન્ડિયન અમેરિકન મહિલાઓ અને 63 ટકા પુરુષોએ કમલા હેરીસ ને સમર્થન જાહેર કર્યું હતું. ભારતીય મૂળ ધરાવતી માત્ર 22 ટકા મહિલા અને 37 ટકા પુરુષોએ જ ટ્રમ્પ ઉપર પસંદગી ઉતારી હતી.