NEET – UG માટે JEE માફક બે તબક્કાની પરીક્ષા પર વિચારણા
કમ્પ્યુટર આધારિત પરીક્ષાનો પણ વિકલ્પ: સુપ્રીમ કોર્ટમાં કેન્દ્રની રજૂઆત; નીલેકણી સમિતિની ભલામણો અને પરામર્શ બાદ જ લેવાશે અંતિમ નિર્ણય
દેશની સૌથી મોટી મેડિકલ પ્રવેશ પરીક્ષા NEET-UGના માળખામાં મોટા ફેરફારની શક્યતા ઉભી થઈ છે. કેન્દ્ર સરકારે સુપ્રીમ કોર્ટમાં જણાવ્યું છે કે નીટ-યુજીને જેઈઈ મેઈન અને જેઈઈ એડવાન્સ્ડની જેમ બે તબક્કામાં યોજવાની તેમજ વર્તમાન પેન-એન્ડ-પેપર પદ્ધતિને બદલે કમ્પ્યુટર આધારિત પરીક્ષા (CBT) અમલમાં મૂકવાની શક્યતાઓ પર ગંભીરતાથી વિચારણા ચાલી રહી છે. જોકે, આ અંગે હજી કોઈ અંતિમ નિર્ણય લેવાયો નથી.
નેશનલ ટેસ્ટિંગ એજન્સી (NTA)ની પરીક્ષાઓમાં પ્રશ્નપત્ર લીક સહિતની ગેરરીતિઓને લઈને દાખલ થયેલી અરજીઓની સુનાવણી દરમિયાન કેન્દ્ર સરકારે એફિડેવિટમાં જણાવ્યું કે પરીક્ષા પદ્ધતિમાં કોઈપણ ફેરફાર નંદન નીલેકણીની અધ્યક્ષતામાં રચાયેલી હાઈ પાવર્ડ ટાસ્ક ફોર્સની ભલામણો અને સંબંધિત તમામ હિતધારકો સાથે ચર્ચા બાદ જ અમલમાં મૂકવામાં આવશે.
આ પણ વાંચો: ભારતનું FCRA સુધારા બિલ એટલે ચર્ચ ઉપર હુમલો: અમેરિકી સાંસદનો આક્ષેપ
કેન્દ્રે જણાવ્યું કે ટાસ્ક ફોર્સ ટેક્નોલોજી, પરીક્ષા સુરક્ષા, ઈન્ફ્રાસ્ટ્રક્ચર, સમાન તક, સુલભતા અને શૈક્ષણિક પાસાઓ સહિત તમામ મુદ્દાઓનું મૂલ્યાંકન કરી રહી છે. હાલમાં એનટીએની આઠ મુખ્ય પરીક્ષાઓમાંથી સાત પરીક્ષાઓ કમ્પ્યુટર આધારિત છે, જ્યારે નીટ-યુજી એકમાત્ર મોટી પરીક્ષા છે જે હજુ પણ પેન-એન્ડ-પેપર મોડમાં લેવાય છે.
કેન્દ્રે સ્પષ્ટ કર્યું કે નીટ-યુજી આરોગ્ય અને પરિવાર કલ્યાણ મંત્રાલય તથા નેશનલ મેડિકલ કમિશન (NMC)ના અધિકારક્ષેત્ર હેઠળ આવતી પરીક્ષા હોવાથી તમામ સંબંધિત સંસ્થાઓ સાથે પરામર્શ બાદ જ કોઈ નવું મોડલ અમલમાં આવશે. સાથે જ પરીક્ષા પદ્ધતિમાં કોઈપણ ફેરફાર કરવામાં આવશે તો વિદ્યાર્થીઓને અગાઉથી પૂરતો સમય આપવામાં આવશે, જેથી તેમને કોઈ મુશ્કેલી ન પડે.
નીટ પરીક્ષા બધાથી અલગ, જટિલ: સરકારની સુપ્રીમ કોર્ટમાં રજૂઆત
કેન્દ્ર સરકારે સુપ્રીમ કોર્ટમાં જણાવ્યું કે નીટ-યુજી અન્ય તમામ પ્રવેશ પરીક્ષાઓ કરતાં અલગ અને વધુ જટિલ છે. દર વર્ષે 22 લાખથી વધુ ઉમેદવારો પરીક્ષા આપે છે, જેમાં મોટા પ્રમાણમાં ગ્રામ્ય વિસ્તારોના તથા મહિલા વિદ્યાર્થીઓ સામેલ હોય છે. ઉપરાંત, એમબીબીએસ ઉપરાંત બીડીએસ, આયુષ, વેટરિનરી અને નર્સિંગ જેવા વિવિધ અભ્યાસક્રમોમાં પ્રવેશ માટે પણ આ જ પરીક્ષા લેવામાં આવે છે. તેથી પરીક્ષા પદ્ધતિમાં કોઈપણ ફેરફાર સુરક્ષા, પારદર્શિતા, ટેક્નોલોજી, સુલભતા અને સમાન તક જેવા તમામ પાસાઓને ધ્યાનમાં રાખીને જ કરવામાં આવશે, એમ સરકારે કોર્ટને જણાવ્યું હતું.
