CM ભૂપેન્દ્ર પટેલે તાત્કાલિક બોલાવી બેઠક: રાહત કામગીરીના આદેશ
દક્ષિણ ગુજરાતમાં મેઘરાજાએ ફરી એકવાર રૌદ્ર સ્વરૂપ ધારણ કર્યું છે. સુરત, વલસાડ અને નવસારી જિલ્લામાં ધોધમાર વરસાદ અને પવનના કારણે સ્થિતિ ગંભીર બની છે. હવામાન વિભાગે આ ત્રણેય જિલ્લામાં ‘રેડ એલર્ટ’ જાહેર કરતા જ રાજ્ય સરકાર પણ દોડતી થઈ ગઈ. પરિસ્થિતિની ગંભીરતાને જોતા મુખ્યમંત્રી ભૂપેન્દ્ર પટેલે તાત્કાલિક ઉચ્ચસ્તરીય બેઠક બોલાવીને રાહત અને બચાવ કામગીરીની સમીક્ષા કરી. સાથે જ મંત્રીઓ અને વરિષ્ઠ અધિકારીઓને તાત્કાલિક અસરગ્રસ્ત વિસ્તારોમાં રવાના કરવાના આદેશ પણ આપી દેવાયા છે.
CM ભૂપેન્દ્ર પટેલની સમીક્ષા બેઠક: મંત્રીઓ-સચિવોને ગ્રાઉન્ડ ઝીરો પર મોકલ્યા
દક્ષિણ ગુજરાતમાં સર્જાયેલી સ્થિતિને લઈને મુખ્યમંત્રી ભૂપેન્દ્ર પટેલે ગાંધીનગરમાં ઉચ્ચસ્તરીય રિવ્યૂ બેઠક યોજી હતી. બેઠકમાં અસરગ્રસ્ત વિસ્તારોમાં રાહત અને બચાવ કામગીરી, વહીવટી તંત્રની તૈયારીઓ અને આગામી પગલાં અંગે વિસ્તૃત ચર્ચા કરવામાં આવી.
બેઠક બાદ CM એ તાત્કાલિક નિર્ણય લેતા નાયબ મુખ્યમંત્રી હર્ષ સંઘવી, આદિજાતિ વિકાસ મંત્રી નરેશ પટેલ તેમજ વરિષ્ઠ IAS અધિકારીઓ રેમ્યા મોહન અને આલોક પાંડેને સુરત, વલસાડ અને નવસારી જિલ્લામાં તાત્કાલિક રવાના થવા સૂચના આપી. આ અધિકારીઓ સ્થળ પર પહોંચીને સ્થાનિક વહીવટી તંત્રને જરૂરી માર્ગદર્શન આપશે અને રાહત-બચાવ કામગીરીની સત સમીક્ષા કરશે.
CM એ અન્ય રેડ એલર્ટ જાહેર કરાયેલા જિલ્લાઓના પ્રભારી સચિવોને પણ તાત્કાલિક પહોંચીને સ્થાનિક તંત્ર સાથે સંકલન સાધી પરિસ્થિતિ પર બાજનજર રાખવાનો નિર્દેશ આપ્યો છે.
આ પણ વાંચો: અમદાવાદમાં જળબંબાકાર, ૧૮ જિલ્લામાં ‘રેડ એલર્ટ’
તાત્કાલિક રાહત અને સાવધાનીની સૂચના: તમામ વિભાગોને એલર્ટ પર રાખાયા
રાજ્ય સરકારે તમામ સંબંધિત વિભાગોને સંપૂર્ણ સજ્જ રહેવા અને અસરગ્રસ્ત વિસ્તારોમાં જરૂરિયાત મુજબ તાત્કાલિક રાહત સામગ્રી પહોંચાડવાની સૂચના આપી છે. NDRF, SDRF અને સ્થાનિક તંત્રની ટીમોને પણ સ્ટેન્ડબાય પર રાખવામાં આવી છે.
વહીવટી તંત્ર દ્વારા નાગરિકોને અપીલ કરવામાં આવી છે કે તેઓ હવામાન વિભાગ અને તંત્રની સૂચનાઓનું પાલન કરે. ભારે વરસાદ અને પવનના કારણે બિનજરૂરી બહાર નીકળવું, નીચાણવાળા વિસ્તારોમાં રહેતા લોકોએ સલામત સ્થળે જવું અને નદી-નાળા પાસે જવાનું ટાળવું.
હાલ સુરત, વલસાડ અને નવસારીમાં વરસાદ યથાવત છે અને હવામાન વિભાગે આગામી 24 કલાક માટે પણ અતિભારે વરસાદની આગાહી કરી છે. જેના પગલે તંત્ર દ્વારા પરિસ્થિતિ પર સતત નજર રાખવામાં આવી રહી છે.
