અમદાવાદમાં જળબંબાકાર, ૧૮ જિલ્લામાં ‘રેડ એલર્ટ’
ચોમાસાની ઋતુ વચ્ચે ગુજરાતમાં મેઘરાજા ફરી એકવાર પૂર્ણ કળાએ ખીલ્યા છે. દક્ષિણ ગુજરાતમાં વીજળીના કડાકા-ભડાકા સાથે શરુ થયેલી ઇનિંગ બાદ હવે અમદાવાદ શહેરમાં પણ વહેલી સવારથી જ મેઘરાજાએ ધમાકેદાર બેટિંગ શરૂ કરી દીધી છે. અવિરત વરસતા વરસાદને કારણે વાતાવરણમાં ગુલાબી ઠંડક પ્રસરી ગઈ છે, પરંતુ બીજી તરફ સવારના સમયે નોકરી-ધંધે કે સ્કૂલ-કોલેજે જવા નીકળેલા નાગરિકો માટે આ વરસાદ આફત બનીને આવ્યો છે.
પશ્ચિમ અમદાવાદ અને રિંગ રોડના વિસ્તારોમાં નીચાણવાળા ભાગો જળમગ્ન
સવારના પીક અવર્સ દરમિયાન જ તૂટી પડેલા ધોધમાર વરસાદના કારણે શહેરના મુખ્ય માર્ગો પર વરસાદી પાણી ફરી વળ્યા છે. ખાસ કરીને પશ્ચિમ અમદાવાદના વિસ્તારોમાં સ્થિતિ વધુ કફોડી બની છે:
મુખ્ય વિસ્તારો: SG હાઈવે, ગોતા, જોધપુર, સેટેલાઈટ, વેજલપુર, મકરબા, સરખેજ, શેલા, બોપલ, ઘુમા, શાંતિપુરા, સનાથલ, બાકરોલ, વિસલપુર અને કાસિનદ્રા.
ટ્રાફિક અને મુશ્કેલી: નીચાણવાળા વિસ્તારોમાં ઘૂંટણસમા પાણી ભરાઈ જવાથી વાહનચાલકો અટવાયા હતા. અનેક જગ્યાએ વાહનો બંધ પડી જવાના દ્રશ્યો સર્જાયા છે. પાણીના ભરાવા અને ભારે વરસાદના કારણે રસ્તાઓ પર સામાન્ય દિવસોની સરખામણીએ વાહનોની અવરજવર ઓછી જોવા મળી રહી છે.
હવામાન વિભાગની આગાહી: ૧૮ જિલ્લાઓમાં ‘રેડ એલર્ટ’
હવામાન વિભાગ (IMD) દ્વારા જાહેર કરવામાં આવેલા તાજા નાઉકાસ્ટ મુજબ રાજ્યમાં ભારેથી અતિભારે વરસાદની ચેતવણી આપવામાં આવી છે.
‘રેડ એલર્ટ’ ધરાવતા ૧૮ જિલ્લાઓ:
જૂનાગઢ, ગીર સોમનાથ, અમરેલી, બોટાદ, ભાવનગર, અરવલ્લી, મહીસાગર, પંચમહાલ, દાહોદ, વડોદરા, ભરૂચ, છોટા ઉદેપુર, નર્મદા, સુરત, વલસાડ, ડાંગ, નવસારી અને તાપી.
હવામાન વિભાગે આ ૧૮ જિલ્લાઓમાં અત્યંત સચેત રહેવાની સલાહ આપી છે, જ્યારે રાજ્યના બાકીના તમામ જિલ્લાઓમાં ભારે વરસાદનું ‘ઓરેન્જ એલર્ટ’ જારી કરવામાં આવ્યું છે. તંત્ર દ્વારા લોકોને પણ બિનજરૂરી બહાર ન નીકળવા અને નીચાણવાળા વિસ્તારોથી સાવચેત રહેવા અપીલ કરવામાં આવી છે.
