કેરળના વાયનાડમાં ભૂસ્ખલન થતા 2 લોકોના મોત અને 7 ગંભીર રીતે ઘાયલ,અનેક દટાયા હોવાની આશંકા

2024ના મુંડક્કાઈ ભૂસ્ખલનના ઘા હજુ રુઝાયા નથી ત્યાં કેરળના વાયનાડમાં ફરી એક મોટી દુર્ઘટના સર્જાઈ છે. સતત પડી રહેલા ભારે વરસાદ વચ્ચે મંગળવારે અનાક્કામપોયલ-મેપ્પાડી ટનલ પ્રોજેક્ટ નજીક મોટું ભૂસ્ખલન થતાં 2 લોકોના મોત થયા છે અને અનેક શ્રમિકો કાટમાળમાં દટાયા હોવાની આશંકા છે. સરકારે આને કુદરતી નહીં પણ “માનવસર્જિત ભૂસ્ખલન” ગણાવી તપાસના આદેશ આપ્યા છે.

ક્યાં અને કેવી રીતે બની ઘટના? 

આ ભયાનક ભૂસ્ખલન વાયનાડના કલ્લાડી ખાતે મીનાક્ષી બ્રિજ પાસે બન્યું છે. મલપ્પુરમ અને વાયનાડને જોડતા અનાક્કામપોયલ-મેપ્પાડી ટનલ રોડ પ્રોજેક્ટની કન્સ્ટ્રક્શન સાઇટ પર જમીન ધસી પડી હતી. ઘટના સમયે ત્યાં કામ કરી રહેલા શ્રમિકો અને વાહનો કાટમાળ નીચે દટાયા હતા. છેલ્લા 24 કલાકમાં આ વિસ્તારમાં 265 મીમી ભારે વરસાદ નોંધાયો હતો, જેના કારણે જમીન ધસી પડી હોવાનું માનવામાં આવે છે.

‘મેન-મેડ લેન્ડસ્લાઇડ’નો આક્ષેપ 

કેરળના મંત્રી ટી. સિદ્દીકે આ ઘટનાને કુદરતી આફત ગણવાનો ઇનકાર કર્યો છે. તેમણે કોંકણ રેલવે પર ગંભીર આરોપ લગાવતા કહ્યું કે જિલ્લા કલેક્ટરે આ સ્થળે ભૂસ્ખલનનું જોખમ હોવાની લેખિત ચેતવણી અગાઉથી આપી હતી. 20 જૂને વહીવટીતંત્રે સાઇટ પરથી માટી હટાવવાનો આદેશ પણ આપ્યો હતો, પરંતુ કોન્ટ્રાક્ટરે તેનું પાલન કર્યું નહીં. મંત્રીએ કહ્યું કે 2024માં મુંડક્કાઈમાં 298 લોકોના મોત બાદ પણ બેદરકારી દાખવવામાં આવી છે અને આ બાબત સહન કરવામાં નહીં આવે.

આ પણ વાંચો: 2 દિવસમાં ચાંદી 6600 તૂટી, સોનું પણ 2000થી વધુ સસ્તું થયું

યુદ્ધના ધોરણે રેસ્ક્યૂ ઓપરેશન 

માહિતી મળતા જ NDRFની વાયનાડ અને કોઝીકોડની 2 ટીમના 60 જવાનો, ફાયર બ્રિગેડ અને સ્થાનિક લોકો રેસ્ક્યૂમાં જોડાયા છે. અત્યાર સુધીમાં કાટમાળમાંથી 6 ઘાયલોને બહાર કાઢીને હોસ્પિટલમાં ખસેડવામાં આવ્યા છે. તેમની હાલત સ્થિર હોવાનું કહેવાય છે. કેટલાક પ્રોજેક્ટ વાહનો પણ કાટમાળમાં દબાયા હોવાના અહેવાલ છે.

CMની કટોકટી બેઠક  

ઘટનાની ગંભીરતા જોતા મુખ્યમંત્રી વી.ડી. સતીશને તાત્કાલિક બેઠક યોજી હતી. તેમણે અધિકારીઓને તાત્કાલિક રાહત અને બચાવ કામગીરી કરવા સૂચના આપી છે. સાથે જ મહેસૂલ મંત્રી એ.પી. અનિલ કુમાર અને મંત્રી ટી. સિદ્દીકને તાત્કાલિક વાયનાડ પહોંચીને સ્થિતિનો તાગ મેળવવા અને બચાવ કાર્યોની દેખરેખ રાખવાનો આદેશ આપ્યો છે. હાલ કાટમાળ હટાવવાની કામગીરી ચાલુ છે અને દટાયેલા લોકોને બહાર કાઢવાના પ્રયાસો તેજ કરવામાં આવ્યા છે.