2 દિવસમાં ચાંદી 6600 તૂટી, સોનું પણ 2000થી વધુ સસ્તું થયું
બજારમાંથી રોકાણકારો માટે સારા સમાચાર નથી. સોના અને ચાંદીના ભાવમાં સતત બીજા દિવસે પણ મોટો ઘટાડો નોંધાયો છે. MCX પર ચાંદી બે દિવસમાં 6600થી વધુ અને સોનું 2000થી વધુ સસ્તું થઈ ગયું છે. વર્ષની શરૂઆતમાં ઐતિહાસિક સપાટી વટાવનારી બંને કિંમતી ધાતુઓ હવે પોતાના હાઈ લેવલથી ઘણી નીચે આવી ગઈ છે.
MCX પર ચાંદીમાં 5296નો કડાકો
મંગળવારે બજાર ખુલતાની સાથે જ ચાંદીમાં મોટો ઘટાડો જોવા મળ્યો. 4 સપ્ટેમ્બરની એક્સપાયરીવાળી ચાંદી MCX પર 5296 ઘટીને 2,30,803 પ્રતિ કિલોગ્રામ પર આવી ગઈ. સોમવારે તે 2,36,099 પર બંધ થઈ હતી. આમ સતત બીજા દિવસે ચાંદીમાં હજારો રૂપિયાનો ઘટાડો નોંધાયો.
બે દિવસમાં 6607નો ઘટાડો
આ સપ્તાહની શરૂઆત શુક્રવારે 2,37,410 પર થઈ હતી. ત્યારથી અત્યાર સુધીમાં ચાંદી 6607 પ્રતિ કિલોગ્રામ સસ્તી થઈ ચૂકી છે. વર્ષ 2026ની શરૂઆતમાં જાન્યુઆરીમાં ચાંદી 4 લાખની સપાટી વટાવીને 4.20 લાખના ઓલ ટાઈમ હાઈ પર પહોંચી હતી. તેની સરખામણીએ હાલ ચાંદી લગભગ અડધી કિંમતે મળી રહી છે.
સોનામાં પણ 1566નો ઘટાડો
ચાંદીની જેમ સોનાના ભાવ પણ નીચે આવ્યા છે. MCX પર 10 ગ્રામ 24 કેરેટ સોનું 1566 ઘટીને 1,45,351 પર ટ્રેડ થઈ રહ્યું છે. સોમવારે તે 1,46,917 પર બંધ થયું હતું. શુક્રવારના 1,47,378ના ભાવથી ગણીએ તો બે દિવસમાં સોનામાં 2027નો ઘટાડો આવ્યો છે. ઉલ્લેખનીય છે કે જાન્યુઆરી 2026માં સોનાએ પણ પહેલીવાર 2 લાખ પ્રતિ 10 ગ્રામનો આંકડો પાર કર્યો હતો.
રોકાણકારો માટે ચિંતાનો વિષય
સતત ઘટતા ભાવના કારણે રોકાણકારોમાં ચિંતા જોવા મળી રહી છે. નિષ્ણાતોના મતે આંતરાષ્ટ્રીય બજારના દબાણ અને નફા વસૂલીના કારણે કિંમતી ધાતુઓમાં આ કડાકો આવ્યો છે.
