બાબા બર્ફાનીના દ્વારે યાત્રાનો ભવ્ય શુભારંભ, 7 હજારથી વધુ શિવભક્તો રવાના

“આવો, કોલ આવ્યો છે, બાબા બર્ફાનીએ બોલાવ્યો છે” ના નાદ સાથે આજે અમરનાથ યાત્રાનો ભવ્ય અને ભક્તિમય પ્રારંભ થયો છે. દેશના ખૂણે ખૂણેથી આવેલા હજારો શિવભક્તોના “હર હર મહાદેવ” ના જયઘોષ વચ્ચે લેફ્ટનન્ટ ગવર્નર મનોજ સિન્હાએ કડક સુરક્ષા વચ્ચે જમ્મુથી બાલતાલ અને પહેલગામ તરફ પ્રથમ જથ્થાને લીલી ઝંડી આપી. આ વર્ષે 57 દિવસ સુધી ચાલનારી આ પવિત્ર યાત્રા માટે વહીવટી તંત્ર સજ્જ બન્યું છે.

વહેલી સવારે થયો શુભારંભ 

ગુરુવારે વહેલી સવારે લગભગ 4 વાગ્યે લેફ્ટનન્ટ ગવર્નર મનોજ સિન્હાએ જમ્મુના ભગવતી નગર બેઝ કેમ્પ ખાતે ધાર્મિક વિધિ અને પૂજા-અર્ચના બાદ અમરનાથ યાત્રાના પ્રથમ જથ્થાને રવાના કર્યો. તેમણે યાત્રાના સફળ અને સુરક્ષિત આયોજન માટે શુભકામનાઓ પાઠવી. આ સાથે જ 57 દિવસ સુધી ચાલનારી પવિત્ર અમરનાથ યાત્રાનો સત્તાવાર રીતે પ્રારંભ થયો છે.

આ પણ વાંચો: પીપળીયા પાળ ગામ પાસેની સોસાયટીમાં પ્રાથમિક સુવિધાના મુદ્દે લોકોનું હક્કાબોલ

બેઝ કેમ્પમાં ભક્તિમય માહોલ 

જમ્મુ, શ્રીનગર, બાલતાલ અને પહેલગામના તમામ બેઝ કેમ્પમાં મોટી સંખ્યામાં શ્રદ્ધાળુઓ ઉમટી પડ્યા છે. યાત્રાની શરૂઆત પહેલા જ બેઝ કેમ્પ ભક્તિમય બની ગયા હતા. શ્રદ્ધાળુઓ શિવ સ્તોત્રો અને ભજન-કીર્તનમાં લીન જોવા મળ્યા. શુક્રવારે સવારે આ યાત્રાળુઓ પવિત્ર અમરનાથ ગુફા તરફ આગળ વધશે અને બાબા બર્ફાનીના દર્શન કરશે.

ચુસ્ત સુરક્ષા વ્યવસ્થા અને વહીવટી તૈયારી 

યાત્રાને ધ્યાનમાં રાખીને વહીવટીતંત્રે ચુસ્ત સુરક્ષા વ્યવસ્થા ગોઠવી છે. લેફ્ટનન્ટ ગવર્નર મનોજ સિન્હા અને મુખ્ય સચિવ અટલ દુલ્લૂએ વરિષ્ઠ અધિકારીઓ સાથે બેઝ કેમ્પની મુલાકાત લઈ સુરક્ષા, નોંધણી, આરોગ્ય સેવા, લંગર, પીવાનું પાણી, સ્વચ્છતા અને ટ્રાફિક વ્યવસ્થાની સમીક્ષા કરી. યાત્રાળુઓને કોઈ તકલીફ ન પડે તે માટે દરેક વિભાગને જરૂરી સૂચનાઓ આપવામાં આવી છે. યાત્રાળુઓના કાફલાના પ્રસ્થાન સમયે રાષ્ટ્રીય ધોરીમાર્ગ સાથે જોડાયેલા કેટલાક માર્ગો પર સામાન્ય વાહનવ્યવહાર અસ્થાયી રીતે બંધ રાખવામાં આવશે. સુરક્ષા દળો સમગ્ર માર્ગ પર તૈનાત છે અને દરેક વાહનની કડક તપાસ થઈ રહી છે.

ભક્તોમાં ઉત્સાહ, 7 હજારથી વધુ પહોંચ્યા 

યાત્રા પ્રત્યે ભક્તોમાં ભારે ઉત્સાહ જોવા મળી રહ્યો છે. મોડી સાંજ સુધીમાં 7 હજારથી વધુ યાત્રાળુઓ જમ્મુ બેઝ કેમ્પમાં પહોંચી ચૂક્યા હતા. બુધવારે મોડી સાંજ સુધીમાં લગભગ 5 હજાર યાત્રાળુઓ શ્રીનગરના પંથાચોક બેઝ કેમ્પ તેમજ બાલતાલ અને પહેલગામના નુનવાન બેઝ કેમ્પમાં પહોંચી ગયા હતા. યાત્રાળુઓ માટે દૈનિક ભજન-કીર્તન, શિવ આરતી અને વિશાળ લંગરની વિશેષ વ્યવસ્થા કરવામાં આવી છે.

ટેન્ટ સિટી અને સુવિધા કાઉન્ટર તૈયાર 

યાત્રાળુઓની સુવિધા માટે બાલતાલ અને પહેલગામમાં વિશાળ ટેન્ટ સિટી તૈયાર કરવામાં આવી છે અને લંગર સંસ્થાઓ પણ કાર્યરત છે. શ્રીનગર એરપોર્ટથી પંથાચોક સુધી યાત્રાળુઓ માટે 40 સ્થળોએ કુલ 131 સુવિધા કાઉન્ટર અને તાત્કાલિક નોંધણી કેન્દ્રો શરૂ કરવામાં આવ્યા છે. વહીવટીતંત્રને આશા છે કે આ વર્ષની અમરનાથ યાત્રા સુરક્ષિત, સુવ્યવસ્થિત અને સફળ રીતે પૂર્ણ થશે.