તાવમાં સપડાયેલા ૫ વર્ષના માસૂમને આંચકી આવી સારવાર મળે તે પૂર્વે જ દમ તોડ્યો
ગોંડલમાં સામાન્ય તાવ બાદ આંચકી ઉપડતા ૫ વર્ષના બાળકનું મોત નીપજ્યું છે. વધુ સારવાર માટે બાળકને ગોંડલથી રાજકોટ સિવિલ હોસ્પિટલ ખસેડવામાં આવી રહ્યો હતો, પરંતુ રસ્તામાં જ તેણે અંતિમ શ્વાસ લેતા પરિવાર પર આભ તૂટી પડ્યું છે.
આ પણ વાંચો: રેલનગરમાં માતાના લિવ-ઈન સંબંધનો પસંદ ન હોવાથી ભત્રીજાએ કાકાને છરી ઝીંકી
પ્રાપ્ત વિગતો અનુસાર, ગોંડલના પંચપીરની ધાર વિસ્તારમાં રહેતા અશોકભાઈ સોલંકીના ૫ વર્ષના પુત્ર દિવ્યેશની તબિયત છેલ્લા એક-બે દિવસથી નાદુરસ્ત હતી. પરિવારે જણાવ્યું હતું કે, દિવ્યેશને શનિવારની રાત્રીએ તાવ આવતા તેને ઘરમાં જ રહેલી તાવની દવા આપવામાં આવી હતી. જોકે, દવાથી તેની તબિયતમાં કોઈ સુધારો જોવા મળ્યો ન હતો.રવિવારે સવારે બાળકની તબિયત વધુ લથડી હતી અને તેને અચાનક આંચકી ઉપડવા લાગી હતી. આથી ગભરાયેલા પરિવારજનો દિવ્યેશને તાત્કાલિક ગોંડલ હોસ્પિટલમાં લઈ ગયા હતા. અહીં ફરજ પરના તબીબોએ બાળકની નાજુક સ્થિતિ જોતા વધુ સારવાર માટે રાજકોટની ઝનાના હોસ્પિટલમાં રીફર કરવાની સલાહ આપી હતી. દિવ્યેશને રાજકોટ લાવવામાં આવી રહ્યો હતો. પરંતુ કમનસીબે, રસ્તામાં કોટડા સાંગાણી નજીક પહોંચતા જ માસૂમ બાળકે દમ તોડી દીધો હતો. મૃતક દિવ્યેશ બે બહેનોનો એકનો એક ભાઈ હતો. માસૂમના મોતથી પરિવારમાં કલ્પાંત છવાઈ જવા પામ્યો હતો.
