ભારત-ન્યૂઝીલેન્ડ વચ્ચે ૪૦ દિવસમાં રમાશે ૧૨ મેચ, જૂનો બદલો લેવા ટીમ ઇન્ડિયા કમર કસશે

ક્રિકેટપ્રેમીઓ માટે રોમાંચથી ભરેલા ખૂબ જ મોટા સમાચાર સામે આવ્યા છે. ભારતીય ક્રિકેટ ટીમ આ વર્ષના અંતમાં ન્યૂઝીલેન્ડના પ્રવાસે જવાની છે, જે બંને દેશો વચ્ચે રમાયેલી અત્યાર સુધીની સૌથી લાંબી અને મોટી દ્વિપક્ષીય સીરિઝ સાબિત થશે. આગામી ૨૨ ઓક્ટોબરથી ૧ ડિસેમ્બર દરમિયાન યોજાનારા આ ૪૦ દિવસના હાઈ-વોલ્ટેજ પ્રવાસમાં ક્રિકેટના ત્રણેય ફોર્મેટની મળીને કુલ ૧૨ મેચો રમાશે. કિવિ દેશના ક્રિકેટ ઇતિહાસમાં આ પ્રથમ ઘટના છે જ્યારે તેઓ પોતાની ધરતી પર આટલી ભવ્ય અને પ્રચંડ સીરિઝની યજમાની કરવા જઈ રહ્યા છે.

સંબંધોના ૧૦૦ વર્ષની ઐતિહાસિક ઉજવણી:

આ પ્રવાસ માત્ર રમત પૂરતો સીમિત નથી, પરંતુ ભારત અને ન્યૂઝીલેન્ડ વચ્ચેના રમતગમતના સંબંધોના ગૌરવશાળી ૧૦０ વર્ષ પૂર્ણ થવાના અવસરે યોજાઈ રહ્યો છે. આ ઐતિહાસિક ક્ષણને યાદગાર બનાવવા માટે ન્યૂઝીલેન્ડ સરકાર અને બંને દેશોના ક્રિકેટ બોર્ડ (BCCI અને NZC) દ્વારા આ મેગા પ્રવાસનું આયોજન કરવામાં આવ્યું છે.

જૂનો હિસાબ ચૂકતે કરવાની સુવર્ણ તક:

ભારતીય ટીમ વર્ષ ૨૦૧૯-૨૦ની સીઝન પછી પહેલીવાર ન્યૂઝીલેન્ડની ધરતી પર ટેસ્ટ સીરિઝ રમવા જશે. ઉલ્લેખનીય છે કે, ગત ૨૦૨૪-૨૫ની સીઝનમાં ન્યૂઝીલેન્ડે ભારતના પ્રવાસે આવીને ટેસ્ટ શ્રેણીમાં ૩-૦થી ક્લીન સ્વીપ કરીને ભારતીય ફેન્સના દિલ તોડ્યા હતા. હવે રોહિત એન્ડ કંપની પાસે ન્યૂઝીલેન્ડને તેની જ ધરતી પર ધૂળ ચટાડીને એ ઐતિહાસિક પરાજયનો બદલો લેવાની શાનદાર તક રહેશે.

આ પણ વાંચો: કોર્પોરેટ જગતમાં વૈભવ સૂર્યવંશીનો દબદબો: IPL ધમાકા બાદ બ્રાન્ડ વેલ્યૂ બમણી થઈ, એન્ડોર્સમેન્ટ ફી રૂ. ૨ કરોડે પહોંચી

પ્રવાસનું સંપૂર્ણ અને સત્તાવાર શેડ્યૂલ:

૪૦ દિવસના આ પ્રવાસમાં **૫ T20 ઇન્ટરનેશનલ, ૫ વન-ડે અને ૨ ટેસ્ટ મેચ** રમાશે, જેનું સંપૂર્ણ વિવરણ નીચે મુજબ છે:

1. T20 ઇન્ટરનેશનલ સીરિઝ (ફટાફટ ક્રિકેટનો રોમાંચ)

પ્રવાસની શરૂઆત ક્રાઈસ્ટચર્ચથી ટી૨૦ મેચ સાથે ધમાકેદાર અંદાજમાં થશે.

૧લી T20: ૨૨ ઓક્ટોબર, ક્રાઈસ્ટચર્ચ

૨જી T20: ૨૪ ઓક્ટોબર, ક્રાઈસ્ટચર્ચ

૩જી T20: ૨૭ ઓક્ટોબર, વેલિંગ્ટન

૪થી T20: ૩૦ ઓક્ટોબર, ઓકલેન્ડ

૫મી T20: ૧ નવેમ્બર, હેમિલ્ટન

2. વન-ડે (ODI) સીરિઝ (૫૦ ઓવરનો જંગ)

ટી૨૦ શ્રેણી બાદ તુરંત જ બંને ટીમો વન-ડે ફોર્મેટમાં આમને-સામને ટકરાશે.

૧લી વન-ડે: ૪ નવેમ્બર, ઓકલેન્ડ

૨જી વન-ડે: ૭ નવેમ્બર, વેલિંગ્ટન

૩જી વન-ડે: ૧૦ નવેમ્બર, હેમિલ્ટન

૪થી વન-ડે: ૧૩ નવેમ્બર, માઉન્ટ માઉન્ગાનુઈ

૫મી વન-ડે: ૧૫ નવેમ્બર, માઉન્ટ માઉન્ગાનુઈ

3. ટેસ્ટ સીરિઝ (અસલી કસોટી – રેડ બોલ ક્રિકેટ)

આ પ્રવાસનો સૌથી રોમાંચક અને મહત્વનો હિસ્સો ટેસ્ટ મેચો રહેશે, જે વેલિંગ્ટનથી શરૂ થશે.

૧લી ટેસ્ટ: ૧૯ થી ૨૩ નવેમ્બર, વેલિંગ્ટન

૨જી ટેસ્ટ: ૨૭ નવેમ્બર થી ૧ ડિસેમ્બર, ક્રાઈસ્ટચર્ચ

વર્ષના અંતમાં રમાનારી આ મહાશ્રેણીને કારણે ક્રિકેટ જગતમાં અત્યારથી જ ભારે ઉત્સાહનો માહોલ જોવા મળી રહ્યો છે. વિદેશી પિચો અને ઠંડા વાતાવરણમાં ભારતીય સિંહો કેવું પ્રદર્શન કરે છે તે જોવું રસપ્રદ રહેશે.