બેંગકોક ફલાઇટમાંથી સુરત એરપોર્ટ પર ઉતરેલા પેસેન્જરની બેગમાંથી 6.18 કરોડનો હાઇબ્રીડ ગાંજો પકડાયો,3 શખ્સની ધરપકડ
સુરત એરપોર્ટ પર બેંગકોક ફલાઇટમાંથી ઉતરેલા મહિલા-પુરૂષની જોડીને અટકાવીને સુરત પોલીસે અન્ય એજન્સીની મદદથી બંનેની પાસે રહેલી ચાર બેગની તલાસી લેતા અંદરથી 17.658 કિલોગ્રામના 6,18,030,000ની કિંમતના હાઇબ્રીડ ગાંજાના 16 પેકેટ મળી આવ્યા હતાં.
ચોક્કસ માહિતીના આધારે સુરત પોલીસે વોચ ગોઠવી હતી. ફલાઇટમાંથી ઉતરેલા ચેન્નાઇના મોહમ્મદ ઇકબાલ અહેમદખાન તથા તામિલનાડુના બેલોરની રાસીયા અબ્દુલ કપુર (ઉ.વ.53) નામની મહિલાને રાઉન્ડઅપ કરી હતી. બંને પાસે રહેલી ટ્રોલી બેગ ચકાસાઇ હતી. કરોડોનો ગાંજો લાવવા બેગમાં ખાસ પ્રકારના ગુપ્ત ખાના બનાવાયા હતાં જે ગુપ્ત ખાના પોલીસે ચીરતા જ અંદરથી હાઇડ્રોપોનીક કેનાલીસ હાઇબ્રીડ ગાંજાના 16 પેકેટ મળી આવતા બંનેને અરેસ્ટ કરાયા હતાં. ગાંજાનો જથ્થો તમિલનાડુના કાંચીપુરમનો રહેવાસી તમીલ ઇબ્રાહીમ અન્સારી લેવા આવ્યો હતો તેની પણ પોલીસે ધરપકડ કરી હતી.
આ પણ વાંચો :હવે રાજકોટના લાખાજીરાજ રોડ ‘નો હોકર્સ ઝોન’બનશે! ટૂંક સમયમાં મળનારી સ્ટેન્ડિંગ કમિટીમાં ઠરાવ કરવા નિર્ણય
સ્કેનરમાં ન પકડાય માટે ખાસ પ્રકારે પેકીંગ કરવામાં આવ્યું હતું
એરપોર્ટ પર સ્કેનરમાં બેગ અંદર ગાંજો છે તેવો ખ્યાલ ન આવે માટે બેગની અંદર ગુપ્ત ખાના બનાવયેલા હતા અને તેમાં ગાંજાના પેકેટ કાર્બન પેપર અને ખાસ પ્રકારના પોલીથીનમાં વીંટળાયેલા હતા જેથી દેખાય નહીં.
ચેન્નાઇના બે શખસોનું નેટવર્ક
બેંગકોક અને થાઇલેન્ડમાં રહીને ભારતમાં હાઇબ્રીડ ગાંજો કે આવા પદાર્થ મોકલવાનું નેટવર્ક ચેન્નાઇના બે શખસો મોહમદઅલી અને મોહમદ અબ્રાહીમ ચલાવતા હોવાનું ખુલ્યુ છે. કેરીયરને ટ્રીપ દીઠ 50 હજારથી એક લાખ રૂપીયા ચુકવાતા હતા. અત્રે ઉલ્લેખનીય છે કે, થોડા દિવસ પહેલા જૂનાગઢ પોલીસે બેંગકોકથી આવેલા યુવક-યુવતીને બે કરોડના ગાંજા સાથે પકડ્યા હતાં.
