યાકુબ મોટાણીનો દારૂ જ પકડાય છે, યાકુબ નહીં !
1530 ભંભા' અનેચપલા’ જપ્ત: ચાલક પકડાયો: સપ્લાયર યાકુબ વધુ એકવાર વોન્ટેડ
રાજકોટ પોલીસના ચોપડે દારૂ સપ્લાયના એક નહીં પરંતુ અનેક ગુના જેની સામે નોંધાઈ રહ્યા છે તે યાકુબ મુસા મોટાણીએ રાજકોટ મોકલેલો દારૂ વારંવાર પકડાઈ રહ્યો છે પરંતુ હજુ સુધી યાકુબ સુધી ક્રાઈમ બ્રાન્ચનો છેડો પહોંચી રહ્યો ન હોય તેમ તે હાથમાં આવવાનું નામ લેતો નથી. આવો જ દારૂનો એક મોટો જથ્થો યાકુબે રાજકોટ માટે રવાના કર્યેો હતો. જો કે તે મુળ જગ્યાએ ઉતરે તે પહેલાં જ ક્રાઈમ બ્રાન્ચે પકડી લઈ યાકુબ સામે વધુ એક ગુનો દાખલ કર્યો છે.
ક્રાઈમ બ્રાન્ચ પીઆઈ એમ.આર.ગોંડલિયા, એમ.એલ.ડામોર, સી.એચ.જાદવ, પીએસઆઈ વી.ડી.ડોડિયા સહિતની ટીમે કોઠારિયા રોડ પર રણુજા મંદિર સામે સાકેત બંગ્લોઝ બાજુના રસ્તે પસાર થઈ રહેલા આઈશર નં.જીજે૩બીવી-૮૧૪૫ને અટકાવી તલાશી લેતાં તેમાંથી બે લીટર દારૂ ભરેલી ૯૦ મોટી બોટલ અને ૧૪૪૦ ૧૮૦ એમએલના ક્વાર્ટર સહિત કુલ ૧૫૩૦ નાની-મોટી બોટલ કે જેની કિંમત ૩,૧૩,૩૨૦ રૂપિયા થાય છે તે મળી આવી હતી. આ પછી પોલીસે ટ્રકના ચાલક પ્રવિણ દિલીપભાઈ પાટરિયા (ઉ.વ.૨૯, રહે.કોઠારિયા રોડ)ની ધરપકડ કરી હતી.
પ્રવિણની પૂછપરછમાં તેણે જણાવ્યું હતું કે દારૂનો આ જથ્થો યાકુબ મોટાણીએ તેને વાપીથી ભરી આપ્યો હતો અને રાજકોટમાં તેને ઉતારવાનો હતો. જો કે દારૂ કોને સપ્લાય કરવાનો હતો તેની પ્રવિણને ખબર ન હોવાનું રટણ કર્યું હતું. રાજકોટ પહોંચ્યા બાદ યાકુબ પાસેથી બૂટલેગરનો નંબર મેળવવાનો હતો પરંતુ તે પહેલાં જ પકડાઈ ગયો હતો. ઉલ્લેખનીય છે કે અગાઉ પણ યાકુબે આ પ્રકારે દારૂ મોકલ્યો હતો જે દારૂ પકડાયો છે પરંતુ યાકુબ હાથમાં આવી રહ્યો નથી. પોલીસે દારૂ સહિત કુલ ૧૩.૨૩ લાખનો મુદ્દામાલ કબજે કર્યો હતો.
