રાજકોટ એરપોર્ટ પર નવા પાયલોટને ટ્રેનિંગ: 1 વર્ષમાં 843 તાલીમી વિમાનોની ઉડાન, લાંબો રન વે નવા પાયલોટસ માટે અનુકૂળ
રાજકોટ આંતરરાષ્ટ્રીય એરપોર્ટ પર હવે માત્ર પેસેન્જર ફ્લાઈટ્સ જ નહીં પરંતુ પાયલોટ ટ્રેનિંગ માટે આવતાં વિમાનોની સંખ્યામાં પણ સતત વધારો જોવા મળી રહ્યો છે. હાલ દરરોજ સરેરાશ 10થી વધુ તાલીમી વિમાનો રાજકોટ એરપોર્ટને પસંદ કરી રહ્યા છે, જેના કારણે એર ટ્રાફિક કંટ્રોલ (ATC) વિભાગ સતત વ્યસ્ત રહે છે.વર્ષ 2025માં 843 ટ્રેનિંગ ફલાઇટ આવી હતી.આ ઉપરાંત 20 વાયુસેનાનાં વિમાનોએ ટચ ડાઉન મુવમેન્ટ કરી હતી.
પ્રાપ્ત માહિતી મુજબ, સૌથી વધુ અમરેલી અને મહેસાણા સ્થિત ફ્લાઈંગ એકેડેમીના તાલીમી વિમાનો રાજકોટ એરપોર્ટ પર ઓપરેટ થઈ રહ્યા છે. આ ઉપરાંત જામનગર એરફોર્સ સ્ટેશનના વિમાનો પણ નિયમિત રીતે ટ્રેનિંગ ફ્લાઈટ તરીકે રાજકોટના આકાશમાં દેખાઈ છે. વડોદરા અને મુંબઈથી આવતી ખાનગી ફ્લાઈંગ એકેડેમીઓના પાયલોટ્સને પણ રાજકોટ એરપોર્ટ પર તાલીમ આપવામાં આવી રહી છે.
24 કલાક ખુલ્લું રહેતું એરપોર્ટ બન્યું મોટું આકર્ષણ
રાજકોટ એરપોર્ટ 24 કલાક કાર્યરત રહેતું હોવાના કારણે ફ્લાઈંગ ક્લબ અને ટ્રેનિંગ એકેડેમીઓ માટે મોટું આકર્ષણ બની ગયું છે. મોટાભાગે આ તાલીમી વિમાનો ઓવરફ્લાઈંગ, સર્કિટ ટ્રેનિંગ, ઇન્સ્ટ્રુમેન્ટ ફ્લાઈંગ અને એર ટ્રાફિક સંકલન જેવી પ્રેક્ટિસ માટે ઉડાન ભરે છે. લેન્ડિંગ અને ટેકઓફ માટે જો પાર્કિંગની ઉપલબ્ધતા હોય તો ટ્રેનિંગ વિમાનોને ગ્રાઉન્ડ સુવિધા પણ આપવામાં આવે છે.
આ પણ વાંચો :રાજકોટના હજારો અરજદારો હાલાકી ભોગવશે: આ તારીખે RMC, બેન્ક,પોસ્ટ ઓફિસના આધાર કેન્દ્રો રહેશે બંધ
લાંબો રન વે હોવાથી નવા પાયલોટસ માટે અનુકૂળ
લાંબુ અને આધુનિક રનવે (3040 મીટર) છે.લાંબુ રનવે નવીન પાયલોટ્સને નાઇટ લૅન્ડિંગ, ઈમર્જન્સી બ્રેકિંગ અને ડિચેંગ પ્રેક્ટિસ માટે અનુકૂળ બની રહ્યું છે.એવિએશન ગ્રેડ નાઇટ લાઇટિંગ સિસ્ટમ (CAT-I ILS) અદ્યતન ઈન્સ્ટ્રુમેન્ટ લેન્ડિંગ સિસ્ટમ *(ILS) નું માળખું નવાં પાયલોટ્સને પણ પ્રતિકૂળ વાતાવરણમાં લેન્ડિંગની તાલીમ માટે મદદરૂપ છે.
