વડોદરાથી મુંબઈનું અંતર હવે માત્ર દોઢ કલાકમાં: રેલ મંત્રીએ કરી જાહેરાત, મે 2027 માં થશે ટ્રાયલ

ભારતીય રેલવે ઇતિહાસમાં એક નવો અને ક્રાંતિકારી અધ્યાય શરૂ થવા જઈ રહ્યો છે. દેશના મુસાફરોનું બુલેટ ટ્રેનમાં સફર કરવાનું સ્વપ્ન હવે વાસ્તવિકતામાં ફેરવાઈ રહ્યું છે. વડાપ્રધાન નરેન્દ્ર મોદીના ‘આત્મનિર્ભર ભારત’ના સ્વપ્નને સાકાર કરતી દેશની પ્રથમ સ્વદેશી બુલેટ ટ્રેનની ટ્રાયલ ડેટ જાહેર થઈ ચૂકી છે, જે ગુજરાત અને મહારાષ્ટ્ર વચ્ચેની કનેક્ટિવિટીને સંપૂર્ણપણે બદલી નાખશે.

મે-જૂન 2027માં શરૂ થશે ‘સ્વદેશી’ બુલેટ ટ્રેનનું ટ્રાયલ રન

ગુજરાતના વડોદરા ખાતે યોજાયેલા ‘નમો ફોર વિકસિત ભારત’ કાર્યક્રમમાં કેન્દ્રીય રેલ મંત્રી અશ્વિની વૈષ્ણવે એક અત્યંત મહત્વપૂર્ણ જાહેરાત કરી છે. તેમણે જણાવ્યું કે ભારતની પ્રથમ સ્વદેશી બુલેટ ટ્રેનની બોડી ફ્રેમ તૈયાર થઈ ગઈ છે અને તેને હાલમાં સ્ક્વિઝ ટેસ્ટિંગ માટે મોકલવામાં આવી છે. આ ટ્રેનનું પ્રથમ ટ્રાયલ રન આગામી વર્ષે એટલે કે મે અથવા જૂન 2027 દરમિયાન સત્તાવાર રીતે શરૂ થઈ જશે.

વડોદરાથી મુંબઈની સફર માત્ર દોઢ કલાકમાં

હાલના સમયમાં વડોદરાથી મુંબઈ સેન્ટ્રલ વચ્ચેનું આશરે 391-392 કિલોમીટરનું અંતર કાપવા માટે અત્યારની સૌથી ઝડપી ‘વંદે ભારત’ ટ્રેનને પણ લગભગ ૪ કલાક અને ૪૪ મિનિટ જેટલો સમય લાગે છે. પરંતુ, બુલેટ ટ્રેન સેવા શરૂ થવાથી મુસાફરો આ જ લાંબુ અંતર માત્ર ૧.૫ કલાક (દોઢ કલાક) ની અંદર જ પૂરું કરી શકશે, જેનાથી મુસાફરોના કિંમતી સમયની ભારે બચત થશે.

આ પણ વાંચો: ગુજરાત કોંગ્રેસના ઈન્ચાર્જ બાદ હવે બે સહ પ્રભારીની પણ વિદાય નક્કી

કલાકના 350 કિમી સુધીની ગતિ અને 12 સ્ટેશનોનું નેટવર્ક

મુંબઈ-અમદાવાદ બુલેટ ટ્રેન કોરિડોર પર આ હાઇ-સ્પીડ ટ્રેન ૨૮૦ કિમીથી લઈને ૩૫૦ કિલોમીટર પ્રતિ કલાકની પ્રચંડ ઝડપે દોડવા માટે સક્ષમ હશે. ૫૦૮ કિલોમીટર લાંબા આ સમગ્ર રૂટ પર કુલ ૧૨ મુખ્ય સ્ટેશનો બનાવવામાં આવી રહ્યા છે, જેમાં મુંબઈ (BKC), થાણે, વિરાર, બોઇસર, વાપી, બિલીમોરા, સુરત, ભરૂચ, વડોદરા, આણંદ, અમદાવાદ અને સાબરમતીનો સમાવેશ થાય છે. આ પ્રોજેક્ટ અંતર્ગત સુરતથી વાપી વચ્ચેનો સિવિલ સેક્શન આ વર્ષે ડિસેમ્બર સુધીમાં તૈયાર થઈ જશે.

સફળ પરીક્ષણ બાદ વડાપ્રધાન મોદી કરશે ઉદ્ઘાટન

રેલ મંત્રીના જણાવ્યા અનુસાર, ટ્રાયલ શરૂ થયા બાદ ૨ થી ૪ મહિના સુધી વિવિધ તબક્કામાં ટ્રેનની સુરક્ષા અને ઝડપનું સઘન પરીક્ષણ કરવામાં આવશે. આ તમામ ટ્રાયલ સફળ થયા બાદ દેશના વડાપ્રધાન નરેન્દ્ર મોદી પોતે આ મહત્ત્વાકાંક્ષી બુલેટ ટ્રેન પ્રોજેક્ટનું લોકાર્પણ કરીને દેશવાસીઓને સમર્પિત કરશે.

બુલેટ ટ્રેન પ્રોજેક્ટ માત્ર સમયની બચત જ નહીં કરે, પરંતુ દેશના આર્થિક હબ ગણાતા મુંબઈ અને ગુજરાત વચ્ચેના વ્યાપારિક સંબંધોને પણ નવી ગતિ આપશે. ‘મેડ ઇન ઇન્ડિયા’ કોન્સેપ્ટ હેઠળ તૈયાર થતી આ હાઇ-સ્પીડ ટ્રેન ભારતની ટેકનોલોજીકલ પ્રગતિનું ઉત્તમ ઉદાહરણ બની રહેશે.