ગુજરાતમાં દિવાળીએ ઇમરજન્સી કેસોમાં ભારે ઉછાળો: આગની 366 ઘટનાઓ, સુરત-અમદાવાદ મોખરે અને 62 દાઝ્યા

દીપોત્સવ પર્વની રંગેચંગે ઉજવણી વચ્ચે ગુજરાતભરમાં ઇમરજન્સી સેવાઓ માટે ભારે દોડધામભરી સ્થિતિ સર્જાઈ હતી. રાજ્યની સુરક્ષા અને આરોગ્ય સેવાઓ ‘112’ અને ‘108’ દ્વારા જારી કરાયેલા સત્તાવાર આંકડા અનુસાર, સામાન્ય દિવસોની સરખામણીએ દિવાળીના દિવસે આગ લાગવાના બનાવોમાં રેકોર્ડબ્રેક 565.45% નો જંગી ઉછાળો નોંધાયો હતો. રાજ્યભરમાં આગ સંબંધિત નાની-મોટી કુલ 366 ઘટનાઓ સામે આવી હતી, જેમાં મહાનગરોમાં સુરત અને અમદાવાદ સૌથી આગળ રહ્યા હતા. આ ઉપરાંત ફટાકડા કે દીવાઓથી દાઝી જવાના 62 ગંભીર કેસોમાં 108 એમ્બ્યુલન્સ દ્વારા ત્વરિત ઇમરજન્સી સારવાર પૂરી પાડવામાં આવી હતી.

આગની ઘટનાઓમાં સુરત (82) અને અમદાવાદ (56) સૌથી વધુ પ્રભાવિત

‘112’ ઇમરજન્સી હેલ્પલાઇન પર નોંધાયેલા આગના 366 કોલમાં સુરત શહેરે 82 બનાવો સાથે રાજ્યભરમાં પ્રથમ સ્થાન મેળવ્યું હતું. ત્યારબાદ અમદાવાદ શહેરમાં 56 અને રાજકોટ શહેરમાં 44 સ્થળોએ આગની ઘટનાઓ બની હતી. જિલ્લા અને ગ્રામ્ય વિસ્તારોમાં પણ સુરત ગ્રામ્યમાં 37, વડોદરા શહેરમાં 22, જામનગરમાં 14, જ્યારે ગાંધીનગર અને કચ્છ પૂર્વમાં 12-12 જગ્યાએ ફાયર બ્રિગેડની ટીમો દોડતી થઈ હતી.

દાઝી જવાના 62 કેસ: અમદાવાદમાં સર્વાધિક 13 દર્દીઓ

ફટાકડા ફોડતી વખતે દાઝી જવાના કારણે 108 ઇમરજન્સી એમ્બ્યુલન્સ સેવાને રાજ્યભરમાંથી 62 કોલ મળ્યા હતા. જેમાં સૌથી વધુ 13 દર્દીઓ એકલા અમદાવાદ જિલ્લામાંથી નોંધાયા હતા. સુરતમાં 12 વ્યક્તિઓ દાઝી ગઈ હતી, જ્યારે કચ્છ અને રાજકોટમાં 5-5 તેમજ ગાંધીનગર અને વડોદરામાં 4-4 કેસોમાં દર્દીઓને તાત્કાલિક હોસ્પિટલ પહોંચાડી સારવાર અપાઈ હતી. આણંદ, ભાવનગર, જામનગર, નર્મદા, તાપી અને વલસાડમાં પણ 2-2 લોકો દાઝ્યા હતા.

112 હેલ્પલાઇન: સામાન્ય દિવસો કરતાં 56.54% વધુ કોલ

કાયદો-વ્યવસ્થા અને સામાન્ય ઇમરજન્સી માટેની 112 હેલ્પલાઇન પર સામાન્ય દિવસોની સરેરાશ 3,610 ફરિયાદો સામે દિવાળીએ 56.54% ના વધારા સાથે કુલ 5,651 કોલ આવ્યા હતા. જાહેરમાં ઝઘડાના કેસોમાં 62.67% (1,651 કેસ) અને મારામારી-હુમલાના બનાવોમાં 78.93% (1,104 કેસ) નો વધારો જોવા મળ્યો હતો. મોડી રાત સુધી ફટાકડા ફૂટવાને કારણે અવાજના પ્રદૂષણની ફરિયાદોમાં સૌથી મોટો 205.04% નો ઉછાળો નોંધાયો હતો.

આ પણ વાંચો: કુંજાપુરી મેળાના વિવાદ બાદ દલેર મહેંદીની ભાવુક પોસ્ટ: મુશ્કેલ સમયમાં સાથ આપનારા પરિવાર અને ચાહકોનો માન્યો આભાર

108 મેડિકલ ઇમરજન્સી: માર્ગ અકસ્માતોમાં 87.49% નો વિસ્ફોટક વધારો

108 એમ્બ્યુલન્સ સેવાને દિવાળીના દિવસે કુલ 5,934 ઇમરજન્સી કોલ મળ્યા હતા, જે સામાન્ય દિવસો કરતાં 13.12% વધુ હતા. તહેવારના દિવસે માર્ગ અકસ્માત (Trauma – Vehicular) ના કિસ્સાઓમાં ભયાનક 87.49% નો ઉછાળો જોવા મળ્યો હતો, જેમાં સામાન્ય દિવસોના 646 કેસ સામે સીધા 1,212 અકસ્માતો નોંધાયા હતા. આ ઉપરાંત બિન-વાહન ઇજાઓમાં પણ 75.17% નો વધારો થયો હતો.

સાવરકુંડલા, ગોધરા અને છોટાઉદેપુરમાં આગની મોટી હોનારત ટળી

અમરેલીના સાવરકુંડલામાં મહુવા રોડ પર નવા બસ સ્ટેન્ડ સામે આવેલા વજન કાંટાના કારખાનામાં ફટાકડાના કારણે અચાનક આગ ભભૂકી ઊઠતાં લાખોનું નુકસાન થયું હતું, જ્યાં 2 કલાકની જહેમત બાદ કાબૂ મેળવાયો હતો. પંચમહાલના ગોધરા-દાહોદ રોડ પર પુઠ્ઠાના ગોડાઉનના ત્રીજા માળે મોડી રાત્રે ભીષણ આગ લાગતાં ફાયર વિભાગે પાણીનો મારો ચલાવી સ્થિતિ સંભાળી હતી. છોટાઉદેપુરના કિલ્લા વિસ્તારમાં PWD કમ્પાઉન્ડમાં લાગેલી આગ પર સમયસર કાબૂ મેળવી લેવાતાં મોટી જાનહાનિ ટળી હતી.

112 આગ સંબંધિત બનાવો: જિલ્લાવાર સ્થિતિ

108-EMS દાઝી જવાના ઇમરજન્સી કેસ: જિલ્લાવાર વિગતો

112 ઇમરજન્સી: સામાન્ય દિવસો વિરુદ્ધ દિવાળી સરખામણી

108-EMS મેડિકલ ઇમરજન્સી: સામાન્ય દિવસો વિરુદ્ધ દિવાળી સરખામણી

દિવાળી પર્વ પર આગની ઘટનાઓમાં થયેલો પાંચ ગણાથી વધુનો ઉછાળો અને વાહન અકસ્માતોમાં 87 ટકાથી વધુની વૃદ્ધિ દર્શાવે છે કે ઉત્સવની ઉજવણી દરમિયાન સુરક્ષા અને સાવચેતીની ઘોર ઉપેક્ષા થઈ છે. જોકે ફાયર બ્રિગેડ, 112 પોલીસ હેલ્પલાઇન અને 108 એમ્બ્યુલન્સ સ્ટાફની રાઉન્ડ-ધ-ક્લોક સતર્કતાના કારણે સેંકડો બનાવોમાં સમયસર પહોંચીને મોટી જાનહાનિ ટાળી શકાઈ હતી. આગામી દિવસોમાં બેસતા વર્ષ અને ભાઈબીજ દરમિયાન પણ લોકો ફટાકડા ફોડતી વખતે અને વાહન ચલાવતી વખતે સંપૂર્ણ સાવચેતી રાખે તે અનિવાર્ય છે.