રાજકોટ : ટ્રાફિકનો લાભ લઈ સોની બજારમાં ગઠિયાએ કરી મહિલાના સોનાના ચેનની ચીલ ઝડપ

• ટ્રાફિકનો લાભ લઇ મહિલાની થેલીમાં ચરકો મારી રૂા.43 હજારનો ચેન સેરવી લીધો : સીસીટીવી આધારે તપાસ

દિવાળીના તહેવારમાં લોકો બજારોમાં ખરીદી કરવા દોડી જતાં હોય છે અને ટ્રાફિકનો લાભ લઇ ગઠિયાઓ થેલી, પર્સમાંથી રોકડ, મોબાઈલની ચોરી કરી નાસી છૂટતાં હોય છે. ત્યારે રાજકોટમાં સોની બજારમાં ખરીદી કરી પરત ફરી રહેલ મહીલાની થેલીમાં ચરકો મારી રૂ.43 હજારના ચેઇનની ચિલઝડપ કરી ગઠિયો નાસી છૂટતાં પોલીસે ગુનો નોંધી તપાસ કરી છે.

વિગત મુજબ ભગવતીપરા ઓમ શાંન્તી સ્કુલની પાછળ નંદનવન સોસાયટી શેરીમાં રહેતાં કસ્તુરબેન ગોપાલભાઇ સીંધવ (ઉ.વ.52) એ નોંધાવેલ ફરીયાદમાં જણાવ્યું હતું કે, ગત તા.30 ના દીવાળીનો તહેવાર આવતો હોય જેથી તેઓ તેમના નણંદના દીકરી મીનાબેન, તેમના દીકરી દીવ્યાબેન સાથે સાંજના છ એક વાગ્યે સોની બજારમાં ખરીદી કરવા માટે ગયા હતા.

ધનતેરસ હોય જેથી સોની બજારમાં નવાનાકા ચોક પાસે આવેલ જેવેલર્સમાં સોનાની ચેન એક જોડી રૂ.43 હજારની ખરીદી કરી હતી.જે થેલીમાં રાખીને જતા હતા.ત્યારે ભીડનો લાભ લઇ કોઈ ગઠિયાએ થેલીમાં ચરકો મારી રૂા.43 હજારનો ચેન સેરવી લીધો હતો.બાદમાં તેમને માલુમ પડતા ફરીયાદ નોંધાવી હતી. એ. ડિવિઝન પોલીસે ગુનો નોંધી સીસીટીવી આધારે તપાસ હાથ ધરી હતી.