આજથી દક્ષિણ ગુજરાતમાં તો આવતી કાલથી સૌરાષ્ટ્રમાં મેઘરાજાની સટાસટી : આ જિલ્લાઓમાં હળવાથી ભારે વરસાદની આગાહી
રાજ્યમાં મેઘરાજાની વિદાયની ગણાતી ઘડીઓ વચ્ચે આજથી દક્ષિણ ગુજરાતમાં અને આવતીકાલથી સુરેન્દ્રનગર, રાજકોટ, અમરેલી, ભાવનગર, ગીર સોમનાથ અને બોટાદ જિલ્લામાં મેઘરાજા ચાર દિવસ સુધી ધોધમાર વરસે તેવી આગાહી હવામાન વિભાગ દ્વારા કરવામાં આવી છે. જો કે, ખાનગી હવામાન એજન્સી દ્વારા મેઘરાજા 10 ઓક્ટોબર સુધી દે ઘનાઘન વરસાદ વરસાવે તેવી શક્યતા દર્શાવી છે. બીજી તરફ શુક્વારે રાજ્યમાં ગરમીનો પારો ઉંચકાયો હતો અને રાજકોટ તેમજ અમદાવાદમાં મહત્તમ તાપમાન 36 ડિગ્રીની નજીક પહોંચી ગયું હતું.
હવામાન વિભાગના જણાવ્યા મુજબ આજથી રાજ્યના નર્મદા, ડાંગ, નવસારી, વલસાડ, તાપી અને દમણ, દાદરા અને નગર હવેલીમાં છૂટાછવાયા સ્થળોએ ભારે વરસાદની સંભાવના છે.ઉપરાંત બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા,અમદાવાદ, આણંદ, પંચમહાલ, દાહોદ અને મહિસાગરમાં છૂટાછવાયા સ્થળોએ હળવા વાવાઝોડા અને પવન સાથે હળવાથી મધ્યમ વરસાદની સંભાવના છે. સાથે જ વડોદરા, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી તેમજ રાજકોટ, જૂનાગઢ, અમરેલી, ભાવનગર, ગીર સોમનાથ, બોટાદ અને દીવમાં પણ હળવો ભારે વરસાદ વરસવાની શક્યતા છે.
દરમિયાન આવતીકાલથી ત્રણ દિવસ સુધી સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહિસાગર, વડોદરા, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી તેમજ સુરેન્દ્રનગર, રાજકોટ, અમરેલી, ભાવનગર, ગીર સોમનાથ, બોટાદ અને દીવમા ભારે વરસાદની હવામાન વિભાગ દ્વારા આગાહી કરવામાં આવી છે.બીજી તરફ શુક્રવારે મેઘવિરામ જેવી સ્થિતિમાં દ્વારકાના કલ્યાણપુરમાં 10 મીમી વરસાદ વરસ્યો હતો જયારે તાપીના વડોદ, રાજકોટના ગોંડલ, ડાંગના સુબીર અને વાપીના વલસાડમાં એકથી બે મીમી વરસાદ વરસ્યો હતો. સાથે જ શુક્રવારે મહત્તમ તાપમાનમાં વધારો થતા રાજકોટ અને અમદાવાદમાં 35.8 ડિગ્રી તાપમાન નોંધાયું હતું.
