વિવાદ બાદ અંબાલાલ પટેલે કરી મોટી જાહેરાત: હવે નહીં કરે વરસાદની આગાહી, કહ્યું ‘રામ રામ’
ગુજરાતમાં વરસાદની આગાહીને લઈને છેડાયેલા વિવાદ વચ્ચે રાજ્યના જાણીતા આગાહીકાર અંબાલ પટેલે મોટી જાહેરાત કરી છે. વિજ્ઞાન જાથાના ચેરમેન જયંત પંડ્યાએ પરંપરાગત આગાહીકારો પર “ગેરમાર્ગે દોરવાનો” આક્ષેપ કર્યા બાદ અંબાલાલ પટેલે કહ્યું કે સરકાર તરફથી યોગ્ય સહયોગ ન મળે ત્યાં સુધી તેઓ હવામાનની આગાહી બંધ કરી રહ્યા છે. તેમના આ નિવેદન બાદ ખેડૂતો અને સામાન્ય લોકોમાં ચર્ચા જાગી છે.
અંબાલ પટેલે શું કહ્યું?
વિવાદ બાદ અંબાલાલ પટેલે પ્રતિક્રિયા આપતા કહ્યું,
“અમે દખલગીરીથી હવામાનની આગાહી બંધ કરીએ છીએ. અમને લોકોનો સહકાર તો છે જ, પરંતુ સરકારનો પણ સપોર્ટ મળે તેવી આશા છે. સરકાર તરફથી અગાઉ અમને બોલાવવામાં આવતા હતા અને અમે જતા પણ હતા. હવે જ્યાં સુધી સરકારનો સપોર્ટ નહીં મળે ત્યાં સુધી રામ-રામ… જય શ્રીકૃષ્ણ.”
છેલ્લા ઘણા વર્ષોથી તેઓ પરંપરાગત પદ્ધતિથી વરસાદ અને હવામાનની આગાહી કરતા આવ્યા છે અને તેમની આગાહીઓ ખેડૂતો મોટા પ્રમાણમાં અનુસરે છે.
જયંત પંડ્યાએ શું આક્ષેપ કર્યા?
વિજ્ઞાન જાથાના ચેરમેન જયંત પંડ્યાએ તાજેતરમાં જણાવ્યું હતું કે:
– જુલાઈના મધ્ય સુધી કરાયેલી ઘણી આગાહીઓ ખોટી સાબિત થઈ છે
– રાજ્યના અનેક વિસ્તારોમાં પૂરતો વરસાદ ન પડતા વાવણી અને પાણીની સમસ્યા છે
– કેટલાક આગાહીકારો તારીખો બદલીને લોકોને ભ્રમિત કરી રહ્યા છે
તેમણે માંગ કરી કે ખોટી આગાહી કરીને લોકોને ગેરમાર્ગે દોરનારાઓ સામે ગુનો નોંધવો જોઈએ. તેમના મતે IMD વૈજ્ઞાનિક મોડલ, ઉપગ્રહ અને ડેટાનો ઉપયોગ કરે છે, જ્યારે પરંપરાગત આગાહીકારો અનુમાન અને અનુભવના આધારે આગાહી કરે છે.
અન્ય આગાહીકારનું ચેલેન્જ
જયંત પંડ્યાના નિવેદન બાદ આગાહીકાર કિશોરભાઈ ભાડજાએ પણ જવાબ આપ્યો. તેમણે કહ્યું કે તેમણે 3 સ્પષ્ટ આગાહીઓ કરી છે અને હવે જયંત પંડ્યાએ પણ એ જ સમયગાળા માટે આગાહી જાહેર કરવી જોઈએ. કિશોરભાઈએ ઉમેર્યું કે જો તેમની આગાહી ખોટી પડે તો તેઓ પંડ્યાની શરતો સ્વીકારશે, પરંતુ જો સાચી પડે તો પંડ્યાએ પણ જવાબદારી લેવી પડશે.
વિવાદની અસર
અંબાલાલ પટેલના આ પગલાથી રાજ્યમાં પરંપરાગત vs વૈજ્ઞાનિક આગાહીનો મુદ્દો ફરી ચર્ચામાં આવ્યો છે. એક તરફ ખેડૂતો અંબાલાલની આગાહીઓ પર વિશ્વાસ કરે છે, તો બીજી તરફ વિજ્ઞાન જાથા વૈજ્ઞાનિક આધાર વગરની આગાહીઓનો સતત વિરોધ કરી રહ્યું છે.
હવે સરકાર આ મામલામાં શું વલણ અપનાવે છે અને અંબાલાલ પટેલ ફરી આગાહી શરૂ કરે છે કે નહીં તેના પર સૌની નજર છે.
