ગુજરાત અને MPમાંથી પ્રતિબંધિત જૈશ-એ-મોહમ્મદના 8 આતંકીની ધરપકડ
દેશની આંતરિક સુરક્ષા પર ખતરો બનેલા જૈશ-એ-મોહમ્મદના મોટા ષડયંત્રનો સુરક્ષા એજન્સીઓએ પર્દાફાશ કર્યો છે. ગુજરાત ATS અને કેન્દ્રીય એજન્સીઓના સંયુક્ત ઓપરેશનમાં ગુજરાત અને મધ્ય પ્રદેશમાંથી JeM સાથે સંકળાયેલા 8 આતંકીઓ ઝડપાઈ ગયા છે. આરોપીઓ ગુજરાતમાં આતંકી નેટવર્ક ઉભું કરી યુવાનોને ગેરમાર્ગે દોરવાના પ્લાનમાં હતા.
સંયુક્ત ઓપરેશનમાં 8 આતંકી ઝડપાયા
ગુજરાત ATSએ મધ્ય પ્રદેશમાં મોટી કાર્યવાહી હાથ ધરીને પ્રતિબંધિત આતંકી સંગઠન જૈશ-એ-મોહમ્મદના 8 સક્રિય સભ્યોને ઝડપી પાડ્યા છે. કેન્દ્રીય અને રાજ્યની સુરક્ષા એજન્સીઓને મળેલી ચોક્કસ ગુપ્ત માહિતીના આધારે ટેકનિકલ સર્વેલન્સ ગોઠવી ગુજરાત અને મધ્ય પ્રદેશના અલગ અલગ જિલ્લાઓમાં એકસાથે દરોડા પાડવામાં આવ્યા હતા. આ ઓપરેશનમાં બનાસકાંઠા, પાટણ, નવસારી અને મધ્ય પ્રદેશના દેવાસથી આરોપીઓને પકડવામાં આવ્યા.
આ પણ વાંચો: ઉપલેટાનો વેણુ ડેમ-2 છલકાયો, 2 દરવાજા ખોલતા નીચાણવાળા ગામોને એલર્ટ
ગુજરાતમાં નેટવર્ક મજબૂત કરવાનો મનસૂબો
પ્રાથમિક તપાસમાં ખુલાસો થયો છે કે પકડાયેલા તમામ આરોપીઓ આંતરરાષ્ટ્રીય સ્તરે પ્રતિબંધિત JeM માટે લાંબા સમયથી ગુપ્ત રીતે કામ કરતા હતા. તેઓ આતંકી સંગઠનના સંપર્કમાં રહીને ગુજરાતમાં સંગઠનનું નેટવર્ક મજબૂત કરવા, આતંકવાદી પ્રવૃત્તિઓને આગળ ધપાવવા અને દેશવિરોધી કૃત્યો કરવા સક્રિય હતા. સ્થાનિક સ્તરે રેકી કરવી અને યુવાનોનું બ્રેઈનવોશ કરી તેમને ગેરમાર્ગે દોરવા પાછળ પણ આ મોડ્યુલનો હાથ હોવાની આશંકા છે.
મહત્વના દસ્તાવેજો જપ્ત, સ્લીપર સેલની તપાસ
સર્ચ ઓપરેશન દરમિયાન આરોપીઓ પાસેથી અનેક મહત્વના દસ્તાવેજો મળી આવ્યા છે. આ દસ્તાવેજોના આધારે ATS હવે રાજ્યમાં ફેલાયેલા સ્લીપર સેલ અને આતંકી નેટવર્ક અંગે ઊંડી તપાસ કરી રહી છે. પકડાયેલા તમામ આતંકીઓને કોર્ટમાં રજૂ કરવાની તજવીજ હાથ ધરવામાં આવી છે.
સુરક્ષા વ્યવસ્થા સઘન બનાવાઈ
આ મોટા ઓપરેશન બાદ ગુજરાત અને મધ્ય પ્રદેશમાં સુરક્ષા વ્યવસ્થા વધુ સઘન બનાવી દેવામાં આવી છે. સંવેદનશીલ વિસ્તારોમાં ચાંપતો બંદોબસ્ત ગોઠવી દેવાયો છે. સુરક્ષા એજન્સીઓનું માનવું છે કે સમયસર કાર્યવાહીથી દેશની આંતરિક સુરક્ષાને પ્રભાવિત કરતું મોટું આતંકી ષડયંત્ર નિષ્ફળ બનાવવામાં સફળતા મળી છે.
