ઉપલેટાનો વેણુ ડેમ-2 છલકાયો, 2 દરવાજા ખોલતા નીચાણવાળા ગામોને એલર્ટ

ચોમાસાની સિઝનના પહેલા જ વરસાદે ઉપલેટામાં ધમાલ મચાવી દીધી છે. ગઢેથડ પાસે આવેલો વેણુ ડેમ-2 ઉપરવાસના ધોધમાર વરસાદથી 100 ટકા ભરાઈને ઓવરફ્લો થઈ ગયો છે. તંત્રે તાત્કાલિક 2 દરવાજા 1 ફૂટ ખોલીને નીચાણવાળા 5 ગામોને નદીના પટમાં ન જવાની સૂચના આપી છે.

પ્રથમ વરસાદે જ ડેમ છલોછલ 

રાજકોટ જિલ્લાના ઉપલેટા તાલુકામાં મેઘરાજાએ એન્ટ્રી સાથે જ તોફાન મચાવ્યું. ઉપલેટાના ગઢેથડ ગાયત્રી આશ્રમ નજીક આવેલા વેણુ ડેમ-2 માં ઉપરવાસમાં પડેલા ભારે વરસાદને કારણે રાતોરાત નવા નીરની આવક શરૂ થઈ ગઈ. પરિણામે સિઝનના પહેલા જ વરસાદે ડેમ પૂરી ક્ષમતાએ એટલે કે 100 ટકા ભરાઈને ઓવરફ્લો થઈ ગયો.

આ પણ વાંચો: સરદાર સરોવર ડેમ 64 ટકા ભરાયો, માછીમારોને દરિયો ખેડવા પર બ્રેક

1722 ક્યુસેક આવક સામે 1428 ક્યુસેક જાવક 

ડેમમાં પાણીની સપાટી જોખમી સ્તરે પહોંચતા તંત્ર દ્વારા તાત્કાલિક વેણુ ડેમ-2ના 2 દરવાજા 1 ફૂટ સુધી ખોલી નાખવામાં આવ્યા. હાલ ડેમમાં 1722 ક્યુસેક પાણીની આવક સામે 1428 ક્યુસેક પાણીની જાવક ચાલુ છે. દરવાજા ખોલાતા જ વેણુ નદીમાં પાણીનું વહેણ વધ્યું છે.

5 ગામોને અવરજવર ન કરવા સૂચના 

વેણુ ડેમ-2 ઓવરફ્લો થતા તેની નીચે આવતા ગઢેથડ, વરજાંગજાળીયા, મેખાટીંબી, નાગવદર અને નીલખા ગામના લોકોને વેણુ નદીના પટમાં અવરજવર ન કરવા ખાસ સૂચના આપવામાં આવી છે. નીચાણવાળા વિસ્તારોમાં રહેતા લોકોને સાવચેત રહેવા અને સલામત સ્થળે ખસી જવા માટે એલર્ટ જાહેર કરાયું છે.

172 તાલુકામાં વરસાદ, પ્રિ-મોન્સૂન કામગીરીની પોલ ખુલી 

છેલ્લા 24 કલાકમાં ગુજરાતના 172 તાલુકામાં નોંધપાત્ર વરસાદ પડ્યો છે. કેટલાક વિસ્તારોમાં એટલો ધોધમાર વરસાદ ખાબક્યો કે જળબંબાકારની સ્થિતિ સર્જાઈ અને ચોમાસા પહેલાની કામગીરીની પોલ પણ ખુલી ગઈ. સૌથી વધુ જૂનાગઢના માંગરોળમાં 12.64 ઇંચ અને ગીર સોમનાથના સૂત્રાપાડામાં 12.36 ઇંચ વરસાદ નોંધાયો છે. પહેલા જ વરસાદે જનજીવન પ્રભાવિત થયું છે.