ગુજરાતમાં ડ્રગ્સ ઘુસાડવાનો વધુ એક પ્રયાસ અમદાવાદ કસ્ટમ્સે નિષ્ફળ બનાવ્યો છે. અમદાવાદના સરદાર વલ્લભભાઈ પટેલ ઇન્ટરનેશનલ એરપોર્ટ પરથી 8.9 કિલો હાઇડ્રોપોનિક ગાંજાનો જથ્થો ઝડપાયો છે. કસ્ટમ્સના એર ઇન્ટેલિજન્સ યુનિટ (AIU) એ બેંગકોકથી આવેલા મુંબઈના એક મુસાફરની ધરપકડ કરી છે.
શું છે સમગ્ર મામલો?
મળતી માહિતી મુજબ, તારીખ 21 સપ્ટેમ્બરના રોજ બેંગકોકથી અમદાવાદ આવતી થાઈ એરવેઝની ફ્લાઇટ નંબર TG 343 એરપોર્ટ પર લેન્ડ થઈ હતી. અગાઉથી મળેલી બાતમી અને પેસેન્જર પ્રોફાઇલિંગના આધારે AIUની ટીમ એલર્ટ હતી.
આ દરમિયાન મુંબઈના રહેવાસી એક પુરુષ મુસાફરની હિલચાલ શંકાસ્પદ લાગતા તેને અટકાવવામાં આવ્યો હતો. તેની ચેક-ઇન બેગેજની ઝીણવટભરી તપાસ હાથ ધરવામાં આવી હતી.તપાસ દરમિયાન બેગમાં કપડાંની વચ્ચે ખૂબ જ ચાલાકીપૂર્વક છુપાવવામાં આવેલા 14 એરટાઇટ પારદર્શક પ્લાસ્ટિકના પેકેટ મળી આવ્યા હતા. પેકેટ ખોલતા અંદર લીલા રંગનો ગાંજા જેવો પદાર્થ જોવા મળ્યો હતો. તાત્કાલિક NDPS ફિલ્ડ ટેસ્ટિંગ કિટથી તેનું પરીક્ષણ કરવામાં આવ્યું હતું, જેમાં તે ઉચ્ચ ક્વોલિટીનો હાઇડ્રોપોનિક ગાંજો હોવાનું સામે આવ્યું હતું.
8,913 ગ્રામ ગાંજો જપ્ત
કસ્ટમ્સ અધિકારીઓ દ્વારા જપ્ત કરાયેલા જથ્થાનું વજન કરવામાં આવતા કુલ વજન 8,913 ગ્રામ એટલે કે 8.9 કિલો જેટલું થયું હતું. આંતરરાષ્ટ્રીય બજારમાં તેની કિંમત કરોડોમાં આંકવામાં આવી રહી છે.
હાઇડ્રોપોનિક ગાંજો સામાન્ય ગાંજા કરતા અનેક ગણો વધુ નશીલો અને મોંઘો હોય છે, તેની ખેતી પાણીમાં ખાસ ટેકનોલોજીથી કરવામાં આવે છે.
કસ્ટમ્સ વિભાગે NDPS એક્ટ 1985ની કલમ હેઠળ સમગ્ર જથ્થો જપ્ત કરી મુસાફરની ધરપકડ કરી છે. પ્રાથમિક પૂછપરછમાં તે આ જથ્થો કોના કહેવાથી લાવ્યો હતો અને અમદાવાદ કે મુંબઈમાં કોને ડિલિવરી આપવાનો હતો તે અંગે તપાસ શરૂ કરવામાં આવી છે.ઉલ્લેખનીય છે કે છેલ્લા કેટલાક મહિનાઓમાં બેંગકોકથી હાઇડ્રોપોનિક ગાંજો લાવવાના કિસ્સાઓમાં વધારો થયો છે.
