રોજ 0.30% વળતરની લાલચ અને ડમી કંપનીઓથી 634 કરોડની ઠગાઈ આચારનાર 6 આરોપી ઝડપાયા

ગુજરાતમાં સાયબર ઠગાઈ અને નાણાકીય કૌભાંડોના વધતા વ્યાપ વચ્ચે અમરેલી સાયબર ક્રાઈમ પોલીસે રાજ્યભરમાં હડકંપ મચાવનાર એક મોટા કૌભાંડનો પર્દાફાશ કર્યો છે. ‘SD Pay’ અને ‘Apna Pay’ જેવી મોબાઇલ એપ્લિકેશનના માધ્યમથી આચરવામાં આવેલા આશરે રૂ. ૬૩૪ કરોડના જંગી નાણાકીય કૌભાંડમાં સ્પેશિયલ ઇન્વેસ્ટિગેશન ટીમ (SIT) દ્વારા કંપનીના ડિરેક્ટર સહિત ૬ આરોપીઓની ધરપકડ કરવામાં આવી છે. આ કૌભાંડે ડિજિટલ રોકાણના નામે ચાલતી ઠગાઈની ભયાનક વાસ્તવિકતા ઉજાગર કરી છે.

આકર્ષક દૈનિક વળતર અને ૧૫ લેયર રેફરલ બોનસનું પ્રલોભન

આરોપીઓએ ‘SD Pay’ એપ દ્વારા સામાન્ય નાગરિકોને ટૂંકા સમયમાં માલામાલ થવાની લાલચ આપી હતી. રૂ. ૧,૦૦૦ થી લઈને રૂ. ૫,૦૦૦૦૦ કે તેથી વધુનું રોકાણ કરાવીને દૈનિક ૦.૧૫% થી ૦.૩૦% સુધીનું આકર્ષક વળતર આપવાની જાહેરાતો કરવામાં આવી હતી. માત્ર એટલું જ નહીં, લોકો વધુમાં વધુ લોકો આ એપ સાથે જોડાય તે માટે ૧૫ અલગ-અલગ લેયર સુધી ૩% થી ૩૦% સુધીના ઊંચા રેફરલ બોનસ અને કમિશનની લાલચ આપીને વિશ્વાસ કેળવવામાં આવ્યો હતો, જેના કારણે ગૂગલ પ્લે સ્ટોર પર ૧૦ લાખથી વધુ ડાઉનલોડ ધરાવતી આ એપ દ્વારા દોઢથી પોણા બે લાખ લોકો આ જાળમાં ફસાયા હતા.

રોકાણના સ્લેબ અને વળતરનું ગણિત

રોકાણકારોને આકર્ષવા માટે કંપનીએ અલગ-અલગ સ્લેબ નક્કી કર્યા હતા, જેમાં:

રૂ. ૧,૦૦૦ થી ૨૫,૦૦૦: ૦.૧૫% દૈનિક વળતર

રૂ. ૨૫,૦૦૦ થી ૧ લાખ: ૦.૨૦% દૈનિક વળતર

રૂ. ૧ લાખ થી ૫ લાખ: ૦.૨૫% દૈનિક વળતર

રૂ. ૫ લાખથી વધુ: ૦.૩૦% દૈનિક વળતર

રેફરલ બોનસ: ૧૫ લેયર સુધી ૩% થી ૩૦% કમિશન

આ પણ વાંચો: નવસારીમાં PMએ ‘નમો કમલમ’નું ઉદ્ઘાટન કરી ભાજપ કાર્યકર્તાઓને આપ્યો સંદેશ

ડમી કંપનીઓનું નેટવર્ક અને રૂ. 634 કરોડની હેરાફેરી

સમગ્ર મામલે અમરેલી સાયબર ક્રાઈમ પોલીસ સ્ટેશનમાં કડક કલમો હેઠળ ગુનો નોંધીને SITની રચના કરવામાં આવી હતી. તપાસ દરમિયાન ખુલાસો થયો કે આરોપીઓએ નાણાં સગેવગે કરવા માટે S.D. Hub (OPC) Pvt. Ltd., Shiv Dharti Communication અને Upay Digi Payment India જેવી ડમી કંપનીઓ ઊભી કરી હતી. આ ડમી કંપનીઓના ૧૫ જેટલા બેંક ખાતાઓમાં કુલ રૂ. ૬૩૪ કરોડની જંગી રકમ જમા થઈ હોવાનું સામે આવ્યું છે, ઉપરાંત આરોપીઓના અંગત ૩૦ થી ૩૫ બેંક ખાતાઓ પણ મળી આવ્યા છે.

ઝડપાયેલા આરોપીઓ અને રાષ્ટ્રવ્યાપી ગુનાહિત ઇતિહાસ

આ કૌભાંડમાં SIT દ્વારા નીચે મુજબના ૬ આરોપીઓની ધરપકડ કરવામાં આવી છે:

સૂર્યસિંહ રાઠોડ (ઉ. ૨૪, રહે. માણસા, ગાંધીનગર)

આશિષ ગેડિયા (ઉ. ૩૮, મૂળ સાવરકુંડલા, હાલ સુરત)

ભાવેશ ચૌહાણ (ઉ. ૪૧, મૂળ સાવરકુંડલા, હાલ સુરત)

નિશી પ્રસાદ (ઉ. ૪૭, રહે. મહેસાણા, મૂળ બિહાર)

સોહિલ મકવાણા (ઉ. ૨૬, રહે. મહેસાણા)

નિરવકુમાર પટેલ (ઉ. ૩૨, રહે. બલોલ, મહેસાણા)

NCCRP પોર્ટલ પર તપાસ કરતા આ ગેંગના ૧૨ બેંક ખાતાઓ સામે દેશભરમાંથી ૮૩ સાયબર ફ્રોડની ફરિયાદો નોંધાયેલી હોવાનું પણ બહાર આવ્યું છે.

SD PAY કૌભાંડ એ સાબિત કરે છે કે કેવી રીતે સોશિયલ મીડિયા અને ડિજિટલ એપ્લિકેશન્સનો દુરુપયોગ કરીને સામાન્ય નાગરિકોની મહેનતની કમાણી લૂંટવામાં આવી રહી છે. ટૂંકા સમયમાં વધુ વળતર મેળવવાની લાલચ કેવી રીતે મોટું આર્થિક જોખમ બની શકે છે તેનું આ ઉત્તમ ઉદાહરણ છે. SIT દ્વારા આ કેસમાં ઝડપથી કાર્યવાહી કરીને આરોપીઓને જેલભેગા કરવામાં આવ્યા છે, પરંતુ આ પ્રકારના ઓનલાઈન ફ્રોડથી બચવા માટે નાગરિકોએ પણ વધુ જાગૃત અને સાવચેત બનવાની અત્યંત આવશ્યકતા છે.