1 દિવસમાં 6 મેડલ જીતતા કુલ 23 મેડલ સાથે ભારત 10માં ક્રમે પહોંચ્યું

Sat, August 1 2026

ગ્લાસગો ખાતે ચાલી રહેલી કોમનવેલ્થ ગેમ્સ ૨૦૨૬ ના ૯મા દિવસે (૩૧ જુલાઈ) ભારતીય ખેલાડીઓએ મેડલનો વરસાદ કરીને ઇતિહાસ રચી દીધો છે. આ દિવસ ભારત માટે ટૂર્નામેન્ટનો સૌથી સફળ દિવસ સાબિત થયો છે, જેમાં ટ્રેક એન્ડ ફિલ્ડ અને જૂડો જેવી સ્પર્ધાઓમાં ભારતે ૨ ગોલ્ડ, ૨ સિલ્વર અને ૨ બ્રોન્ઝ સહિત કુલ ૬ મેડલ પોતાની ઝોલીમાં પાડ્યા છે. આ شાનદાર પ્રદર્શન સાથે ભારતના કુલ મેડલની સંખ્યા ૨૩ થઈ ગઈ છે અને ભારત મેડલ ટેલીમાં ૧૦મા ક્રમે મજબૂતીથી યથાવત છે.

જૂડોમાં સુવર્ણ ઇતિહાસ અને જેવલિન થ્રો માં રોમાંચ

અસ્મિતા ડે અને હર્ષ સિંહનો ગોલ્ડ: મહિલાઓની ૪૮ કિગ્રા જૂડો કેટેગરીમાં અસ્મિતા ડેએ શાનદાર રમત દાખવીને કોમનવેલ્થ ગેમ્સના ઇતિહાસમાં ભારત માટે પ્રથમ જૂડો ગોલ્ડ મેડલ જીતવાની ઐતિહાસિક સિદ્ધિ મેળવી છે. જ્યારે પુરુષોની ૬૦ કિગ્રા ઇવેન્ટમાં હર્ષ સિંહે વિરોધી ખેલાડીને ૧૦-૦ થી એકતરફી હરાવી દેશને બીજો ગોલ્ડ અપાવ્યો. આ ઉપરાંત યામિની મૌર્યએ ૫૭ કિગ્રા કેટેગરીમાં સિલ્વર મેડલ મેળવ્યો છે.

નીરજ ચોપડાનો સિલ્વર અને યશવીરનો બ્રોન્ઝ: દેશના સ્ટાર જેવલિન થ્રોઅર નીરજ ચોપડા પાસેથી ગોલ્ડની અપેક્ષા હતી, પરંતુ ૮૫.૮૩ મીટરના થ્રો સાથે તેને સિલ્વર મેડલથી સંતોષ માનવો પડ્યો. બીજી તરફ, ભારતના અન્ય ખેલાડી યશવીર સિંહે પોતાની કારકિર્દીનું સર્વશ્રેષ્ઠ પ્રદર્શન (૮૫.૪૧ મીટર) કરીને ચોંકાવનારો બ્રોન્ઝ મેડલ જીત્યો છે.

તેજસ્વિન શંકરનો ઐતિહાસિક ડેકાથલોન મેડલ: એથ્લેટ તેજસ્વિન શંકરે ડેકાથલોન સ્પર્ધામાં બ્રોન્ઝ મેડલ જીતીને કોમનવેલ્થ ગેમ્સના ઇતિહાસમાં આ ઇવેન્ટમાં મેડલ જીતનારા પ્રથમ ભારતીય એથ્લેટ બનવાનું ગૌરવ પ્રાપ્ત કર્યું છે.

બોક્સિંગમાં ૧૦ ફાઇનલિસ્ટ: ભારતીય મુક્કાબાજોએ રીંગમાં દબદબો જાળવી રાખતા તમામ ૧૦ સેમીફાઇનાલિસ્ટ બોક્સર્સે ફાઇનલમાં પ્રવેશ કરી લીધો છે, જેનાથી ભારતના ૧૦ સિલ્વર મેડલ પાકા થઈ ગયા છે અને ગોલ્ડની આશા વધી છે.

આ પણ વાંચો: આગામી ૩ કલાક અતિભારે વરસાદની આગાહી: 13 જિલ્લામાં રેડ એલર્ટ, દુર્ઘટનાઓમાં 4 નાગરિકોના મોત