10 ફૂટનો સાવેણો: નિયમ કરતા વધારે કામ સામે રાજકોટમાં સફાઈ કામદારોનો નવતર વિરોધ
રાજકોટ મહાનગરપાલિકામાં સફાઈ કામદારોએ આજે પોતાના હક માટે હાથમાં ઝાડુ નહીં, પણ 10 ફૂટનું સાવેણું પકડ્યું. વધારાની કામગીરીના ભાર સામે પ્રતિકાત્મક રીતે વિરોધ નોંધાવવા માટે કાયમી, કોન્ટ્રાક્ટ અને મિત્ર મંડળના કર્મચારીઓ એક સાથે આવ્યા અને “દસ ફૂટનું સાવેણું – હજાર મીટરની સફાઈ” ના સૂત્ર સાથે 20 ફૂટથી વધુ પહોળી શેરીઓ સાફ કરીને તંત્રને સીધો સંદેશ આપ્યો.
નિયમ વિરુદ્ધ વધારાની કામગીરીનો આક્ષેપ
સરકારી નિયમ અનુસાર એક સફાઈ કામદારને 250 થી 750 મીટર સુધીના વિસ્તારની જ સફાઈ કરવાની હોય છે. પરંતુ કામદારોનો આક્ષેપ છે કે RMC તંત્ર દ્વારા નિયમ કરતા અનેક ગણો વધારે વિસ્તાર ફાળવવામાં આવે છે. આટલું જ નહીં, સફાઈ ઉપરાંત અન્ય વિભાગોના કામ પણ તેમના માથે નાખવામાં આવે છે.
તેમાં બાંધકામ વિભાગ માટે રોડ પરથી ધૂળ ભરાવવી, બાગ-બગીચા વિભાગ માટે રોડ સાઈડનું ઘાસ કાપવું અને ડોર-ટુ-ડોર કચરા ગાડીમાં અલગ મજૂર હોવા છતાં કાયમી કામદારો પાસે કામ કરાવવું જેવી બાબતો સામેલ છે. કામદારોએ ગંભીર આરોપ લગાવ્યો કે કચરા સફાઈમાં ઓછા કામદારો રાખીને મોટું કૌભાંડ આચરવામાં આવી રહ્યું છે અને આડકતરી રીતે કાયમી કર્મચારીઓનું શોષણ થઈ રહ્યું છે.
આ પણ વાંચો: મોદી સામે મોટો રાજકીય પડકાર, કોઈના દબાણ સામે ન ઝૂકતા હોવાનો ભ્રમ ભાંગ્યો
અધિકારીઓની ખાતરી કાગળ પર, ઉકેલ ‘શૂન્ય’
આ મુદ્દે અગાઉ પણ રજૂઆત થઈ ચૂકી છે. ત્યારે પર્યાવરણ ઈજનેર શ્રી પ્રજેશ સોલંકીએ નાયબ ઈજનેર શ્રી વિરલ ચાવડાને વિસ્તારોની યોગ્ય માપણી કરી નિયમ મુજબ કામગીરી કરાવવા અને વિસ્તાર મોટા હોય તો કોન્ટ્રાક્ટમાંથી વધારાના કામદારો ફાળવવા સૂચના આપી હતી. પરંતુ કામદારોનું કહેવું છે કે આજદિન સુધી તે આદેશનો કોઈ અમલ થયો નથી.
તંત્રની આ બેદરકારીથી કામદારોમાં ભારે રોષ છે. વોર્ડ નંબર-4 ના કાયમી સફાઈ કામદારોએ ચીમકી આપી છે કે જો તાત્કાલિક નિયમ મુજબ કામગીરી ફાળવવામાં નહીં આવે તો આવનારા દિવસોમાં વોર્ડ-4 ની તમામ સફાઈ કામગીરી સંપૂર્ણપણે બંધ કરી ઉગ્ર આંદોલન કરવામાં આવશે. જેની સંપૂર્ણ જવાબદારી મ્યુનિસિપલ કોર્પોરેશનની રહેશે.
