ભાજપના રાષ્ટ્રીય પ્રવક્તા શહેજાદ પુનાવાલાએ પક્ષમાંથી આપ્યું રાજીનામું

રાજકારણની રમત પણ કોઈ અજબ નાટક જેવી છે, જ્યાં ક્યારે કયું પાત્ર કઈ ચાલ ચાલશે તે કોઈ કળી શકતું નથી. વિરોધીઓની બોલતી બંધ કરી દેનાર અને ટીવી ડિબેટ્સમાં ભાજપનો અવાજ બનીને ગુંજતા રહેલા શહેઝાદ પૂનાવાલા હવે ચર્ચાના કેન્દ્રમાં આવ્યા છે. પીએમ મોદીના કટ્ટર સમર્થક અને ભાજપના તેજસ્વી વક્તા ગણાતા પૂનાવાલાના રાજીનામાના અહેવાલોએ રાજકીય કોરિડોરમાં ગરમાવો લાવી દીધો છે. એક તરફ સોશિયલ મીડિયા પરથી ‘ભાજપ’ નામ હટી જવું અને બીજી તરફ અંગત કારણોસર પદ છોડવાની ચર્ચાઓએ અનેક સવાલો ખડા કર્યા છે. શું આ કોઈ મોટા રાજકીય પરિવર્તનની પૂર્વભૂમિકા છે કે પછી માત્ર એક અટકળ? આવો જાણીએ આ સમગ્ર મામલાની વિગતવાર હકીકત…

રાજીનામું સુપરત, સત્તાવાર નિવેદન બાકી

ભારતીય જનતા પાર્ટી (BJP)ના તેજસ્વી પ્રવક્તા શહેઝાદ પૂનાવાલા દ્વારા પાર્ટીમાંથી રાજીનામું આપવામાં આવ્યું હોવાના અહેવાલો સામે આવ્યા છે. જાણીતી ન્યૂઝ ચેનલ CNN-News18ના અહેવાલ મુજબ, લાંબા સમયથી પક્ષની વિચારધારાને મજબૂતાઈથી રજૂ કરનાર પૂનાવાલાએ વ્યક્તિગત કારણોસર આ પગલું ભરીને પાર્ટીના ટોચના નેતૃત્વને પોતાનું રાજીનામું સુપરત કરી દીધું છે.

સત્તાવાર નિવેદન ટૂંક સમયમાં: સૂત્રોના જણાવ્યા અનુસાર, આ મામલે શહેઝાદ પૂનાવાલા દ્વારા ટૂંક સમયમાં જ એક સત્તાવાર નિવેદન જાહેર કરવામાં આવશે, જેમાં તેમના રાજીનામા પાછળના અસલી કારણો સ્પષ્ટ થઈ શકે છે.

સોશિયલ મીડિયા પર બદલાયેલી પ્રોફાઇલ: આ અટકળોને ત્યારે વધુ બળ મળ્યું જ્યારે સોશિયલ મીડિયા પ્લેટફોર્મ X (અગાઉનું ટ્વિટર) પર તેમના બાયોમાંથી ‘ભાજપ’ નો ઉલ્લેખ ગાયબ જોવા મળ્યો. જો કે, આશ્ચર્યજનક રીતે તેમના ઈન્સ્ટાગ્રામ બાયોમાં હજુ પણ તેમને ભાજપના રાષ્ટ્રીય પ્રવક્તા તરીકે દર્શાવવામાં આવ્યા છે. X પર તેમણે પોતાને વડાપ્રધાન નરેન્દ્ર મોદીના આજીવન સમર્થક તરીકે ઓળખાવ્યા છે.

આ પણ વાંચો: આફત સામે શાસન દ્વારા સલામતી એટલે 247 કાર્યરત ‘સ્ટેટ ઈમરજન્સી ઓપરેશન સેન્ટર

શહેઝાદ પૂનાવાલાની રાજકીય સફર: કોંગ્રેસથી ભાજપ સુધીની રોચક કહાની

શહેઝાદ પૂનાવાલા ભારતીય રાજકારણમાં પોતાના તીક્ષ્ણ વક્તવ્ય અને તર્કો માટે જાણીતા ચહેરા રહ્યા છે. વ્યવસાયે વકીલ અને નાગરિક અધિકાર કાર્યકર્તા રહેલા પૂનાવાલાએ પોતાની રાજકીય સફરની શરૂઆત કોંગ્રેસ પક્ષથી કરી હતી.

2017નો ઐતિહાસિક બળવો: વર્ષ 2017માં તેઓ ત્યારે રાષ્ટ્રીય સ્તરે ચર્ચામાં આવ્યા જ્યારે તેમણે કોંગ્રેસ પક્ષની આંતરિક ચૂંટણી પ્રક્રિયા સામે ખુલ્લેઆમ મોરચો ખોલ્યો. તેમણે આરોપ લગાવ્યો હતો કે આ ચૂંટણી પ્રક્રિયા રાહુલ ગાંધીને પક્ષના અધ્યક્ષ બનાવવા માટે પૂર્વ-આયોજિત અને ધાંધલીવાળી છે.

પરિવારથી પણ અલગ થવું પડ્યું: આ જાહેર વિવાદ બાદ કોંગ્રેસ પક્ષની સાથે-સાથે તેમના પોતાના પરિવારના સભ્યો (જેમાં તેમના ભાઈ તેહસીન પૂનાવાલા પણ સામેલ હતા) પણ જાહેરમાં તેમનાથી દૂર થઈ ગયા હતા.

ભાજપમાં એન્ટ્રી: કોંગ્રેસ સામે બળવો કર્યા બાદ તેઓ ભારતીય જનતા પાર્ટીમાં જોડાયા હતા. ભાજપે તેમની વક્તવ્ય કુશળતા અને આક્રમક શૈલીને ધ્યાનમાં રાખીને તેમને રાષ્ટ્રીય પ્રવક્તાની જવાબદારી સોંપી હતી, જ્યાં તેમણે મુખ્ય સામાજિક-રાજકીય મુદ્દાઓ પર પક્ષનું વલણ હંમેશાં મજબૂતાઈથી દેશ સામે રજૂ કર્યું છે.

હવે આ રાજીનામાના અહેવાલો બાદ રાજકીય વર્તુળોની નજર આગામી સમયમાં શહેઝાદ પૂનાવાલાના સત્તાવાર નિવેદન અને તેમના આગામી પગલાં પર ટકેલી છે.